صباح يوم جديد على ابطالنا
طلعت من الحمام وشافته جالس على الكنب وجواله بيده ، جلست جنبه: رديت عليهم؟
هز راسه: فتحت الرسايل
ملاذ بتوتر: ايش صاير ليه وجهك انقلب؟
التفت لها متعب: ابوي قبل امس جته جلطه ونقلوه للمستشفى
شهقت بخوف وفزت: طيب قوم خل نزوره نتطمن عليه!
اشر لها متعب تجلس: اجلسي واهدي ، طلعوه كانت خفيفه والحين هو بالبيت
تنهدت ملاذ براحه: طيب خلنا نروح له
متعب: انا بروح له لحالي ماراح اخذك معي
ملاذ: وليه !
متعب: ما ابي الي صار اخر مره يتكرر افهميني ، بروح وافهم منه كل شيء وبجيب اغراض لك من البيت وبجي ما بطول
هزت ملاذ راسها بتفهم: تمام ، على خير
متعب: لا تخافين بتنحل ان شاء الله
قام ياخذ غترته ولبسها قبل يطلع وعدلها بعدها طلع وتركها وراه تصارع الافكار والوساوس ، ماهي متطمنه لذا اليوم وما تدري ليه ، حطت يدها على قلبها وهمست: ان شاء الله خير
{ في قصر آل حازم }
نزلت هي ونجلاء من فوق متجهين للصاله ولفت وعد على نجلاء: مين الي يبيني؟
نجلاء: جدي وعمي بندر
تنهدت وعد وكملت مشي واول ماجتهم قالت: صباح الخير
الكل بصوت واحد: صباح النور
اشر على بندر تجلس جنبه: تعالي هنا ياروحي
ابتسمت وعد وقربت تجلس عنده ومسك كف يدها وابتسم لها: ها كيفك اليوم عساك بخير؟
هزت راسها الحمد لله افضل
تنهد وناظر في ابوه ينتظره يتكلم والتفتت على جدها : الكلب هذا طلقك ابشرك
وعد: الحمد لله ذا الي ابيه
بندر: وصار الي تبينه وغصب عنه
صقر: اسمعي يا بنتي عمك بندر وفهد قالو لي انهم يبون يرفعون عليه قضيه عنف ويخسرونه وضيفته وانا وقفتهم لين اسمع موافقتك ما ابي نتصرف من وراك
تنهدت وعد: ما ابي اكون سيئه مثله خلوه يروح بحاله
بندر: بس وعد هذا حقك !
صقر بحده: بندر ، البنت هي الي تقرر موب انت
تنهد بندر ونطق: ابشر
لفت عليه وعد: عمي ما ابي اكون شخص سيء يخسره وظيفته خله يروح بحاله
تدخلت نجلاء: والله لو مكانك لا اشرشحه وافضحه قدام الناس
ليلى: وبنت عمك معها حق
التفت مطلق لليلى: لا تضغطون عليها
وعد: ما ابي افهموني
ربت بندر على كتفها: ابشري ما يصير خاطرك الا طيب
التفتو على صوت متعب: الله بالخير
فزو كلهم يرحبون فيه ويسلمون عليه وطلعت سلطانه من المطبخ على صوته وقربت تسلم عليه ، انبسط صقر بشوفته والتفت يدور ملاذ وخاب ظنه ، جلس متعب جنب جده: عساك بخير يبه؟
صقر: الحمدلله بخير ، وينها مرتك؟
تنهد متعب وشافهم كلهم يناظرون فيه وينتظرون اجابته: بالفندق
صقر: وراه ما جبتها معك راميها هناك لوحدها
متعب: ماهيب لوحدها انا برجع لها ، جيت اسلم على ابوي واتطمن عليه
سلطانه: ابوك في المجلس الي برا مع فهد وعمك مصعب والعيال
هز راسه متعب بتفهم وقام: اجل استاذن انا وان بغيتو شيء اتصلو
سلطانه: على اساس لو اتصلنا بترد يعني لك يومين مسكر ذا الجوال
تنهد متعب وهز راسه باسف وطلع ، قامت وراه نجلاء بخطوات سريعه وهمست تناديه: هيه متعب
وقف والتفت لها: هلا
نجلاء: امانه متعب ملاذ كيفها؟ ماترد على رسايلنا حتى
تنهد متعب وحط يده على كتفها يطمنها: بخير لا تشيلين هم وانا قايل لها ماترد على احد ما ابي يضيق خاطرها من شيء
نجلاء بحزن: طيب متى بترجعون اشتقنا لكم والله
ابتسم متعب: بحاول في ابوي يهدا وان شاء الله بنجي
قربت نجلاء تحضنه وبادلها يربت على ظهرها وابتعدت عنه: موفق مع القائد
ضحك متعب: يلا ادخلي
دخلت نجلاء وطلع متعب متجه للمجلس واول ما دخل: السلام عليكم
فزو العيال ومصعب يسلمون عليه
فهد: اخيراً تذكرت عندك اهل
ابتسم متعب: هذانا جينا اجحدها
تقدم مصعب يسلم عليه ونطق متعب: علومك عمي؟
مصعب: زينه ابشرك
متعب: الله يجعله
قرب نايف يحضن اخوه وضحك متعب: ها اشتقت لي؟
نايف: اي بالله البيت بدونك ما يسوى
متعب: يا بعد راسي انت
وخر وتقدم اصيل يسلم عليه: يالله حيه
متعب: تبقى يالنسيب
ابتسم اصيل على كلمه النسيب وتقدم متعب يسلم على ابوه الي كان جالس وما يقدر يقوم: كيف صرت يبه؟
هز راسه حازم بدون لا يناظر فيه: الحين تذكرت ان عندك ابو
تنهد متعب وجلس جنبه: الله يسامحك انت الي اجبرتني اطلع
التفت له حازم: وعساك فكرت بالموضوع؟
متعب: يعني كل ما اجلس بترجع تفتحه معي؟
حازم بحده: ايه بفتحه ماني مجنب عنه لين تسوي الي قلت لك عليه
متعب: دام هذي عندك ، انا استاذن اجل
وقف متعب والتفت له فهد: توك واصل اجلس يا ابن الحلال
طلع بدون لا يرد عليه واستوقفه حازم: وقف
وقف متعب بدون لا يلتفت وكمل حازم: معك اثنين مالهم ثالث ، يا اما تطلقها ولا تتزوج بنت خالتك
التفت متعب بصدمه ولا قدر يتكلم حتى من صدمته ، لف مصعب على حازم: يا ابن الحلال انت وش جاك عليهم
متعب: انت تعرفني زين لا مطلق ولا متزوج وان كانك صامل انسى اجل ان عندك ولد اسمه متعب والبيت يتعذرني مع مرتي
نايف: استهد بالله يا متعب!
حازم بحده: والله ثم والله يا متعب انها تحرم علي امك ومطلقه بالثلاث ان ما تزوجت بنت خالتك ولا طلقت
صرخ فهد: عمي وش هالكلام استهد بالله
حط مصعب يده على راسه: لا حول ولا قوه الا بالله
بلع متعب ريقه بتوتر وخوف من كلام ابوه ، لاول مره يداهم قلبه الخوف ، يعرف ابوه زين ان قال كلمه ما يثنيها وان ما سوى الي يبيه بيطلق امه ، احتدت ملامحه وشد على قبضه يده اكثر ،
نطق متعب بضعف ونبرة ترجي لاول مره يسمعونها منه: يبه لا تكسرني
حازم وهو يناظر فيه بحده: انا حلفت وعلمتك بالعلم الي يجمد على الشارب
التفت فهد لحازم : انا طالبك يا عمي
اشر حازم باصبعه على فهد: انت لا تتدخل بيني وبين ولدي
رجع بناظر في متعب وكمل: الليله ملكتك وعرسك ما نبي تاخير وان ماجيت تحرم علي امك
طلع متعب بدون لا يرد عليه وفز فهد وراه ، التفت نايف على ابوه: يبه الله يهديك ليه تجبره كذا
حازم: لا تعال اضربني؟ قم قل لامك والي بالبيت ان اليوم عرس متعب على بنت خالتك
تنهد نايف بضيق واتجه للصاله الي هم جالسين فيها والتفتوا عليه ونطق وهو يناظر للارض: ابوي يقول اعلمكم ان اليله عرس متعب على بنت خالتي
وسعو عيونهم وقام صقر بعصاه: انت وش تقول يا ولد!
نايف: هذا الي صار
فز بندر: انت صادق؟
هز نايف راسه وطلع بندر بسرعه متجه للمجلس والحريم كلهم تحت الصدمه الا سلطانه الي ابتسمت برضى ورفعت جوالها ترسل لساميه يتجهزون لليله
ركب سيارته وضرب الدركسيون بغضب: لعنه لعنه لعنه
ركب فهد جنبه وسكر الباب وراه ، التفت له متعب: تكفى يا فهد وقفوه حاولو فيه
تنهد فهد بضيق: شفته بعينك ماعطانا مجال مصمل
رجع متعب راسه على المرتبه وراه: ماقدر اسويها
فهد: حلف عليك
تنهد متعب بضيق: وعدتها يا فهد
فهد: تهون وانا اخوك خل هاليوم يعدي على خير وبعدها علمها واكيد بتتفهمك ، خذ ايام وطلق بنت خالتك
متعب: ماش ما اقدر
رفع فهد يده وحطها على كتف متعب: هونها تهون
شد متعب على قبضه يده: ان شاء الله
طلع من البيت معصب وانتبه له فهد: تفضل جاك الثاني
التفت متعب وشاف بندر طالع من البيت ونزل له فهد ، نزل راسه على الدركسيون قدامه بضيق وهو يفكر بحل غير الزواج ، ابوه مصمل وحلف عليه ومعد بيده حيله ولا يدري لمن يلجئ بذي اللحظه الا لرب العالمين وقعد يدعي بداخله ان الله يهدي ابوه
بعد دقايق ركب بندر جنبه وفهد ورا والتفت عليهم ، ناظر فيه بندر بحده: حرك
تنهدت متعب وشغل سيارته متجه لمكانهم المعتاد ، بنص الطريق دق جواله ورفعه بسرعه ، شاف اسمها ولا قوى انه يرد ، سكر الجوال ورماه على الطبلون قدامه
