~ الساعه 6 المغرب ~
وقفت على الباب الشفافه تتامل المطر وهو داخل يسوي القهوه وبعد دقايق جاء وبيده كوبين ، مد عليها كوبها وابتسمت: تسلم يدك
وقف جنبها يتأمل جمال المطر وجاه اتصال من تركي ، رفع جواله ورد: هلا
تركي: وينك فيه يمديك تجي؟
متعب: بعيد ما اقدر ، فيه شيء؟
تركي: نادر جاي اليوم وقلت ابلغك عشان تجي قبله
عقد متعب حاجبه: ووينه فيه الحين يمديني الحق عليه؟
تركي: توه نزل الخط يقولي بيصلي العشاء ويجي
تنهد متعب: طيب جايكم
نزل الخط ولف عليها كانت تناظره وترتشف من قهوتها: الشغل؟
هز راسه: اي ولازم اروح لهم
هزت راسها بتفهم: تمام اجل خل نشيل اغراضنا قبل تتاخر
بدو يجمعون الاغراض الي يحتاجونها ويحطونها بالسياره ، نزلت مظلتها ووقفت تحت المطر قبل تركب السياره ، رفعت يدها تستمتع بكل قطره تنزل عليها ، انتبه وتقدم لها: بتمرضين اركبي
هزت راسها بالنفي: احب المطر انتظرني ثواني بس ، ابتسم يتاملها كيف رافعه راسها للسماء ومغمضه عيونها والماء يتساقط على راسها نزولاً لباقي جسمها ، راح يجيب فروته من السياره وغطاها فيها: بـ تمرضين يا بنت الحلال ادخلي
تمسكت بفروته وهي تغطي نفسها فيها وركبت السياره وساعدها، بعد ما سكر الباب وراها اتجه لباب السواق وركب محركين للفندق
بعد ساعه وشوي وصلو وناظرت له: بموت عباتي وينها
عقد متعب حاجبه: لايكون ماجبتيها!
ضحكت ملاذ: الا والله نسيناها جيت بفروتك بس
تنهد متعب ونزل: الله يهديك كان ذكرتيني
فتح لها الباب ونزل غترته يحطها على راسها ويثبتها زين وقفل فروته عليها وضحك على شكلها ونطقت: خير تضحك وش شايف قدامك
متعب: شايف متعب المصغر لابسه شماغي وفروتي
ملاذ ناظرت نفسها وتو تستوعب: اقول وديني جناحنا بسرعه والله يفشل مابي احد يشوفني
التفتت يمين ويسار تتاكد ان مافيه احد منتبه لهم وضحك يحاوطها ويساعدها في المشي لين وصلو جناحهم ، دخلها وطلع يجيب الاغراض من السياره ، نزلت الفروه والغتره ، كانت تحس ببرد وتقدمت تطفي التكييف ويدها باقي ترجف ، جمعت يدينها ببعض تنفث فيها لعلها تحس بدفا ، دخل الجناح ينزل الاغراض وانتبه لها ونطق: ليه للحين ما بدلتي بتمرضين!
ملاذ: مافيه لبس شسوي
تنهد متعب وتقدم لشنطته يدور اي شيء يناسبها ، اخذ بلوفره الازرق وبنطلون ومده عليها: شوفي ان شاء الله يكونون كبرك
عقدت حاجبها تناظر للبنطلون وله باستغراب ونطقت وهي تاشر عليه: منجدك! ذا البنطلون ادخل فيه انا ونجلاء مع بعض
ضحك على كلامها: شسوي فيك طيب مافيه الا ذا
تاففت تسحب البلوفر من يده ودخلت الحمام تبدل ، ابتسم على ردة فعلها المنفعله واتجه للباب وقبل يطلع قال بصوت عالي عشان تسمعه: انا طالع انتبهي لنفسك وتدفي زين ، وطلع للقسم
{ بيت مطلق }
كانو بالمطبخ يسوون كيك وفجاه تذكرت وعد اخر مره سوو فيها كيك وطلعت نجلاء تجيب الطحين وقابلت اصيل وقفطتهم جدتها
انهارت ضحك والتفتوا عليها البنات ونطقت نجلاء: الحمد لله والشكر ، اوك ادري انك مجنونه بس موب لدرجه تضحكين لوحدك
وعد: بموت نجلاء تذكرت يوم جدتي قفطتك انتي والصعلوك
ضحكو البنات ونطقت نجلاء: اقول على طاريه والله وحشني
ترف وهي تخلط الخليط: ترا تكلمينه اربعه وعشرين ساعه
نجلاء: بس منزمان ماشفته كل وقته مشغول قلك بأمن مستقبلنا قبل العرس
طيف: شرايك تدقين عليه يجي
نجلاء: والله فكره حلوه يقعد مع نايف ومنها اعطيهم من كيكتنا
طيف: بالضبط يلا اتصلي عليه
تقدمت نجلاء تاخذ جوالها من على الطاوله وتتصل على اصيل ورد عليها بسرعه: يا مرحبا
ابتسمت نجلاء: اصيل وينك؟
اصيل: في الشركه مع جدي
نجلاء: طيب يمدي تجي لبيت عمي مطلق؟
عقد اصيل حاجبه: وراه فيه شيء؟
هزت راسها: لا بس متجمعين مع البنات هنا كنت ابيك تجي تجلس مع نايف من الصبح لوحده ومنها اخليك تذوق كيكتي الي سويتها
ابتسم اصيل: دام فيها طبخه من يدينك ف انا جايك الحين
نجلاء: يلا اجل ننتظرك
اصيل: فمان الله
سكرت الخط ونطت تصارخ بفرح: بيجي بيجي
ضحكو البنات على ردة فعلها وقالت ترف: انتي اطلعي عدلي شكلك وحنا بنكمل الكيكه
لفت عليهم نجلاء: صدق؟؟
هزت وعد راسها: ايوه صدق بس روحي تجهزي انتي بتقابلين الهازبند
ضحكت نجلاء: منعيوني اجل
طلعت نجلاء تعدل ميكبها ولبسها وكملو البنات الي تسوي القهوه والي يسوون الكيكه ويزينونها
بعد نص ساعه انتهو من كل التجهيزات وتقدمت نجلاء تاخذ الكيكه الي حطوها على جنب لنايف واصيل واخذت صينيه القهوه
وعد: اووه والله يا انك صاروخ بالفستان ذا
كانت لابسه فستان ابيض قصير وماسك وبـ اكمام طويله فضفاضه
ابتسمت نجلاء: تسلمين حياتي
ترف: استودعتك الله هيا روحي
طلعت نجلاء وهي شايله الصينيه الي فيها الكيك والقهوه ووقفت عند باب المجلس تاخذ نفس قبل تدخل ، التفتو عليها نايف واصيل الي نطق: يا هلا وغلا
حطت الصينيه على الطاوله وبدت تصب لهم قهوه ونطق نايف: ما شاء الله مين الي مسوي الكيك
نجلاء وهي تمد له فنجاله: انا والبنات تساعدنا فيه
ابتسم نايف واخذ قطعه من الكيك يجربها ، والتفتت للي كان يتاملها من يوم دخلت ومدت عليه الفنجال ، ابتسم ياخذه منها وعيونه ما انزاحت عنها ، قام نايف يرد على جواله الي دق وطلع برا يكلم ومسك اصيل يد نجلاء يجلسها جنبه ، ورفعت انظارها له: تدرين ان لي اسبوع اكرف مع جدي بالشركه؟ هذي اول ليله ارجع بدون تعب لاني يوم شفتك انزاح كل هالتعب وقاعد اشوف ثمراته
ابتسمت نجلاء: يا بعد روحي انتبه تتعب نفسك بعدين انا بعد ما اخلص جامعه بستلم منصبي بشركة جدي معك وبساعدك
رفع يده يلعب بشعرها ويرجعه ورا اذنها ونطق: الله يخليك لي ان شاء الله
نجلاء باحراج: يمه اصيل صاير هاجد وعاقل وترتني
ضحك اصيل يعدل جلسته: ياحلوك وانتي مستحيه كذا بس
تنهد يتأمل تفاصيلها وكمل كلامه: ما تحسين استاهل مكافئه اليوم؟
عقدت حاجبها وناظرت بالكيكه تشر عليها ورجعت تناظر فيه: وهذي ايش اعتبرها مكافئها
ضحك يهز راسه: ابي مكافئه الذ من الكيكه
عقدت حاجبها باستغراب وما امداها تفكر انحنا يقبل ثغرها ويدم شفايفهم ببعض ، رجع يده لورا ظهرها يشدها له ويعمق القبله اكثر ورفعت يدها تحطها على كتفه ، بعد دقيقه كامله فصل القبله ورجعت تناظر لكل شيء الا عيونها ، ابتسم يوم شاف خجلها وعدل جلسته: الحين راضي عن كل التعب الي تعبته
دخل نايف ومد اصيل يده لفنجال قهوته يرتشف منها وانتبه نايف على توتر وبعثرة نجلاء الي قامت اول ماشافت نايف وطلعت بسرعه من المجلس ، ناظر فيها باستغراب ورجع يناظر لاصيل الي انفجر ضحك: عسى ماشر شفيها؟
اصيل بضحكه: ابد قلت لها مافيه خادمه اذا استقلينا ببيتنا
نايف: اها
مسك فنجال قهوته يرتشف منها ويخز اصيل بنظراته الي مسك جواله يرسل لنجلاء
دخلت نجلاء بسرعه وشافت البنات جالسين بالصاله يسولفون و يتقهوون ، رجعت للمدخل قدام المرايه تناظر بوجهها ، رفعت يدها لقلبها: كريه حمار وقح قليل ادب
بلعت ريقها ورجعت تضحك يوم تذكرت اللحظه ، كانت اول قبله لهم ولا توقعت بيوم بتكون بهالشكل وبذا المكان ، عدلت روجها وشعرها ورجعت للبنات واول ما شافوها صبو لها قهوه وحطو لها قطعة كيكه وبدو يتقهوون كلهم مع بعض
