{ يوم العرس ، ديرة مسلط }
تجهزو الحريم وبدو يستقبلون الضيوف والمعازيم في الحوش نفس كل مناسبه تصير عندهم ، في الغرفه كانت ملاذ والبنات يتجهزون
ملاذ وهي تتعطر: عمتي جود راحت؟
هزت راسها نجلاء: اي راحو الفندق هي وماما منيره وصيته واتوقع بدريه
وعد: اهم شي صيته راحت
ضحكت نجلاء: حبيبتي لا تتحمسين بترجع بسرعه تقول بتزف ولدها وترجع لضيوفها
دخلت عليهم ترف: بنااات
التفتو بخرشه ونطقت ملاذ: بسم الله وش بلاك انتي!!
ترف: اخلصو تعالو معنا الضيوف كثرو ولا نقدر نسوي شيء لوحدنا
نجلاء: على اساس بنسوي شيء احنا
ترف: اي بتساعدونا
جت طيف من ورا ترف: للحين ما خلصو ذول؟
هزت راسها ترف: لا تخيلي
قامت ملاذ ومشت لهم: انا خلصت
نجلاء: انتظروني دقايق واجيك
وقفت وعد: اما انا خلصت بعد
طلعو البنات يقهوون الضيوف ويستقبلونهم وقعدت نجلاء تكمل كشختها وبعد ما خلصت طلعت معهم
- عند الرجال في العزبه -
العقود منوره المكان واصوات الرجال بكل مكان وصقر ومسلط متوسطين الجلسه يتبادلون الحديث ، متعب وفهد وبندر وسعد وسعود واقفين يستقبلون الرجال ويرحبون فيهم ، اما فيصل وعزام ونايف واصيل كانو ورا بيت الشعر، بعد ما نادا عليهم عزام
تكتف اصيل: اخلص وش تبي
طلع عزام جوال من جيب ثوبه وشهق فيصل: ابك هذا جوال من؟
عزام بضحكه انتصار: من سيارة مروان
انفجر فيصل ضحك وضرب كتف عزام: يا حمار والله ليرثع فينا
التفتو اصيل ونايف لبعض ومو فاهمين شيء ، تقدم فيصل يوقف بالنص ويحط يد فوق كتف اصيل ويد فوق كتف نايف ونطق بهمس: هذا يا طويلين العمر جوال السربوت مروان ولد عمي وعزام متوعد فيه يشرشحه ويفضح سوالفه قدام عمي
عقد اصيل حاجبه: وانت ترضاها على ولد عمك!
تافف فيصل بملل: ياليل النفسيات وسوالف القرابه
بدا يشرح لهم بيده من الحماس وكمل: شف انا حركات هذا ولد عمي وهذا ولد خالي ما تمشي معي انا سيده امشي مع الصح
ضحك نايف: حي عينك
فتحه عزام وكان بدون رمز واول شيء دخل عليه الانستا ، شاف مروان ينزل تصويره وستوريات بس الدايركت كله نضيف ، اتجه للسناب ووسع عيونه بصدمه من حسابات البنات فيه وصاح: ياااوك ذا السربوت طلع راعي بنات
قرب فيصل يشوف معه واصيل ونايف من الفضول قربو يشوفون معهم ، بدا عزام يدخل الرسايل وحده وحده ويصورها بجواله ونطق بخبث: هذا موب راعي بنات وبس هذا يكذب عليهم الله يقلعه
نايف: قسم بالله موب صاحي ذا المروان
ابتعد اصيل متقرف من رسايل مروان ولاهوب عاجبه حركه عزام
شهق عزام يوم انضرب مع ظهره والتفت شاف سعود وبلع فيصل ريقه بتوتر: يبه!
سعود: وحطبه الا ابك يوم اني تارككم تقهوون الضيوف ومندسين هنيا وش تسوون
دخل عزام الجوال في جيبه بسرعه
فيصل: يبه الله يعافيك جينا نسولف شوي وبنرجع
سعود بحده: امش انت وياه!
مشى اصيل اول واحد ووراه فيصل ونايف وعزام الي اتجه لسيارة مروان يوم سهى سعود عنه وحط الجوال هناك ورجع للعيال
~ وقت العشاء ~
وقفو العيال عند الباب الخلفيه بيدخلون صحون العشاء للحريم وبدو يجدلونها على السفر الي بالحوش الخلفي ، التفت فيصل على عزام وهمس: بدخل اخذ لنا عصير من حق الحريم
وسع عزام عيونه: انت صاحي؟ امش امش الحريم كلهم داخل
التفت فيصل يمين وشمال: ابك اعقب انا عندي طرق اخذه بسرعه واطلع مانيب مطول وماراح المح احد لا تشيل همم
هز راسه: اخلص بحتريك عند الباب
هز راسه فيصل وطلع عزام بسرعه ، نية فيصل ما كانت العصير لمح ترف وهي داخله لغرفه نوت وده يقول لها كلامً في باله ومن زمان يفكر فيه ، مشى بخطوات بطيئه لين وقف قدام باب غرفة نوت وقبل لا يطق الباب فتحت نوت وصرخت بخوف يوم شافته ، صد عنها بسرعه ونطق: ابك انتي علامك تصيحين اسكتي ما بسوي شيء جاي اهرجك بس
تنهدت ترف بخوف والتفتت حولها: وش الي جابك للبيت الحريم برا بالحوش اطلع!
تنهد فيصل ونطق: جاي اقولك كلمتين بس وبعدها بطلع ، الحقيقه كان ودي اقول..
قبل يتكلم مسكت نوت معصمه تسحبه للغرفه وتسكر وراه تحت صدمته: وش تسوين!!
حطت يدها على قلبها بخوف: اختي دخلت البيت وشكل الحريم بيمرون للحوش من ورا
رفع يده يحك جبينه: ياليل ابتلشت الحين
ضحكت ترف وقالت: وش جايبك هنا وش الكلمتين الي خلتك تجي وتخاطر
فيصل وهو صاد: ابي اسالك ، قد حبيتي؟
عقدت ترف من سؤاله الغريب: وانت شدخلك
فيصل: انا طالبك تجاوبيني
تنهدت ترف وتكتفت: لا
اتسعت ابتسامته ونطق: طيب لو اقولك اني احبك وابيك من نصيبي بس تنتظريني لين القا شغلي واثبت نفسي اني استحقك واجي اخطبك من ابوك ؟
صنمت ترف من كلامه الي قاله وطولت بالرد وكمل: ماراح اطالبك بالرد الحين ، يمر الوقت وان سمعت خبر عرسك ياعزتي لنفسي وان انتظرتيني لين اجيك واخطبك انشهد انه من حظي
كانت اخر جمله يقولها قبل يفتح الباب ويلتفت يمين وشمال ويوم شاف الطريق فاضي مشى للحوش الامامي بخطوات سريعه وطلع برا ، من هول الصدمه الي حط ترف فيها جلست على الارض تحاول تستوعب الي صار ، يحبها؟ يبي يخطبها وينتظرها! مو قادره تستوعب الي صار ابداً ، داهمتها نجلاء واستغربت من وضعها وسرحانها حتى انها مانتبهت لدخولها: بنت شفيك؟
رفعت ترف انظارها وقامت بسرعه: ولا شيء ولا شيء
طلعت بسرعه تاركه نجلاء بحيره من وضعها ولحقتها لبرا
،
انتهى العرس على خير واهل صقر نامو في بيت مسلط لين الصباح ويرجعون للقصر وكالعاده العيال عند العزبه والبنات في البيت الا متعب وملاذ الي اصر عليها ياخذها من عندهم ومسكو طريق للفندق
ملاذ بتملل: متعب بالله عليك ليه تاخذني من عندهم
متعب وهو يسوق: لاني ما ابيك تنامين بعيده عني ابيك تحت عيوني
تاففت ملاذ: والله انك اوفر بخوفك وحرصك ذا ولا كان الحين سهرانه مع البنات نضحك ونسولف
عقد حاجبه والتفت لها: عادي نسهر انا وانتي ونضحك ونسولف وش ورانا
التفتت له تضحك: في فرق بينك وبينهم!
متعب: وش الفرق!
مسكت ملاذ يدينه تلعب فيها باصابع يدها ونطقت بغنج: الفرق انك زوجي وحبيبي واربعه وعشرين ساعه معي وجنبي لابد من التغيير شوي ابي اعرف اخبارهم وسوالفهم منزمان عنهم
تنهد يعض شفته من طريقة كلامها وغنجها ونطق: ماعليه بسرقك منهم اليوم وبكره كله نقعد عنهم بالقصر ونسافر بعده
شهقت بسعاده: صدق!!
هز راسه: اينعم
ملاذ: قسم بالله احبك
مسك يدها يرفعها ويقبلها: وانا اعشقك
ابتسمت برضى وبعد دقايق وصلو الفندق ، نزلو الاثنين متجهين لغرفتهم واول ما دخلت نزلت عبايتها وواضح النعاس بعيونها ، التفتت بتكلمه بس داهمها بقبله ، حطت يدها على صدره وابتسمت داخل القبله وبادلته ، رفع يدينه الثنتين يحاوط خصرها ويعمق القبله اكثر وبعد ما انتهى منهى ابتعد عنها بابتسامه وبدون لا ينطق بشيء دخل دورة المياه يتروش واتجهت هي تلبس بجامتها على السريع وتمسح الميكب ، بعد ما انتهت انسدحت بتعب على السرير ورفعت يدها على بطنها تفكر ، طلع من الحمام وابتسم يوم شافها سرحانه ، طفى الاضواء وقرب ينسدح جنبها ويحسبها لحضنه: وش تفكرين فيه؟
حاوطت صدره واتسعت ابتسامتها: افكر بولدنا ، وين بتكون غرفته وايش بنسميه لو كانت بنت وكيف بنربيه مع بعض كل هالافكار تطري على بالي دايم
ضحك يوم شافها مستعجله على هالتفاصيل ونطق وهو يمسح على شعرها: شفتي الغرفه الي جنب غرفتنا؟
هزت راسها: ايوه
متعب: بناثثها ونجهزها مع بعض له ، وتدرين وشو؟ احسه ولد ف مايحتاج ندور اسم بنت
ملاذ: بعد اربع ايام موعدنا عند الدكتوره بنشوف عاد وش يصير
متعب: خير ان شاء الله
