نزل من فوق وشافت ليلى وبناتها عند المدخل ينزلون عباياتهم ويعدلون اشكالهم قدام المرايه ، ابتسمت راحت لهم
ملاذ: يا مرحبا والله ، وانا اقول وراه الدار منور
ليلى: يا بعد روحي يا ملاذ
سلمت عليهم ودخلت ليلى للمجلس ووقفت ملاذ تعدل شكلها مع وعد وطيف ، طلعت وعد جوالها
وعد: بنات قربو خل نتصور
قربو منها البنات وتصورو اكثر من صوره وباكثر من وضعيه
طيف: بسم الله علينا اشكالنا تفتح النفس
وعد: هذا دم آل حازم ، الجمال يسوي بعروقنا
ملاذ: يا ذا الفلسفه امشو امشو قبل يفقدوننا
وعد بضحكه: وتجي نجلاء تفرشنا هنا عشان ماتصورت معنا
ملاذ: والله تسويها ، بس امشو
دخلو مع بعض وسلمو على الموجودين وجلسو
{ في المقلط عند الرجال }
ريحة العود والقهوة تارسه المكان ، والقهوجيين يصبون القهوة
قامو كلهم بكل رزانه يوم دخل مسلط وعياله
صقر: يا بركها من ليله دامها جمعتكم عندي
مسلط وهو يسلم عليه: عساني ما اخلى منك يا ابو حازم ، علومكم واخباركم
صقر: العلوم تسرك ، انت طمني عنك وعن العيال
مسلط: نبشرك كل شيء على ما توده
صقر: الله يجعله، اقلطو اقلطو حياكم
بعد مارحبوا فيهم جلسو يتقهوون وخذتهم السوالف
قرب أصيل من اخوه فهد وساله: هذا مسلط خوي جدي الي بالديره؟
فهد بنفس الهمس: اي هو
أصيل: وراه اختفى معد نشوفه ولعد يزورنا
فهد: والله مدري مير سمعت لي علم يقولون انه رجع يسكن في ديرته ولعد وده بالمدينه ابد
أصيل: العرق يحن
طقه فهد مع كتفه وناظر فيه بحده
أصيل: خلاص بسكت
- في الحوش -
كان واقف ويكلم تركي
بندر: اجل تقولي محكمته بعد اسبوع؟
تركي: ايه ، ولازم البنت تجي تشهد عليه
بندر وهو يحك دقنه: ايه يصير خير بعلم متعب اول شيء
تركي: يلا فمان الله
سكر الخط واتجه لباب الحوش يوم سمع الطق ، قرب من الباب وكان مفتوح اصلاً لو الي واقف برا يمدي يدفه ، عقد حاجبه وسحب الباب وكانت واقفه عنده بنت
بندر: عسى ما شر يا اختي؟
بلعت ريقها ونطقت بتوتر: هذا بيت آل حازم؟
عقد حاجبه باستغراب ، الصوت ما كان غريب عليه بس ما يدري وين سامعه: وصلتي خير ، هذا بيت آل حازم
أميره: انا بنت خال ملاذ وجيت عشانها
بندر: اهااا تذكرتك الحين ، انتي بنت حمد صح؟
اميره: ايوه انا
بندر: يالله حيها ، حياك بنادي ملاذ لك
دخلت اميره وراه وهي منصدمه من وسع القصر ، الحوش لحاله يركض فيه الخيل وفيه نخل وزرع ونافوره كبيره وجلسات على جنب ، كانت سرحانه بس قاطع سرحانها بندر: من هنا ادخلي ، دقيت على ملاذ وبتجيك
مشت للمدخل الي اشر لها علي وطلعت لها ملاذ بعبايتها
ملاذ بصراخ: امييرررره
ضمتها بكل قوتها: يمه ملاذ وحشتيني
ملاذ: والله اكثثررر ، طمنيني عنك كيفك؟
اميره بابتسامه: والله بخير وصرت بخير يوم شفتك
سحبتها ملاذ معها لين وقفو قدام المرايه الكبيره: هيا نزلي عباتك خل ندخل واعرفك عليهم مره متحمسه
اميره بتوتر: ياويلي والله ميته توتر
ملاذ: يا بنت الحلال اخلصي ما بياكلونك
نزلت اميره عبايتها وكانت لابسه فستان ازرق مخصر وقصير
وكانت مسويه شعرها ستريت ومغطي اكتافها
ملاذ: تف تف ما شاء الله طالعه قمر
اميره بحياء: مسويه طالعه منها والله انك تشقييين
ملاذ: حياتيي انتي
بعد ما خلصت دخلت عليهم ورا ملاذ وسلمت عليهم كلهم
وقفت ملاذ جنب اميره وقالت بابتسامه: هذي اميره بنت خالي واختي الي تربيت معها وكانت سند لي ومصدر قوه
منيره: والله مدري كيف اشكرك يا بنتي على وقفاتك مع ملاذ ، حكت لنا كثير عنك من يوم جت وهي تسولف فيك عاد كلنا تحمسنا نعرف منهي ذا الاميره
اميره: يا روحي يا خالتي ماسويت الا واجبي والله ، وصدق تشرفت بمعرفتي لكم
نجلاء: ما شاء الله البنت ذربه بعد
منيره: تعلمي يا الرفلا
نجلاء بصدمه: هيه جده حنا عند عرب استري علي
ضحكو كل الي بالمجلس عليهم وجلست ملاذ وجلست اميره جنبها وجنب البنات الي قعدو يسولفون معها وواضح حبوها
بعد دقايق دخلت عليهم ساميه وبنتها رهف ومعهم باقة ورد لترف
وسعت نجلاء عيونها بصدمه وناظرو البنات للباب وصدمتهم ما تقل عن صدمة نجلاء ، قامت سلطانه ترحب فيها وتهلي ، الكل كان مصدوم لكن ما يمدي يطردونها ولا يقولون شيء دامها جت الله يحييها ، هذا الكلام الي قالته منيره بقلبها ، قامو البنات يسلمون عليها بالغصب عشان امهم ، الا ملاذ الي كانت جالسه ولا ناظرت فيهم حتى ، نادتها منيره واشرت لها بعينها تقوم تسلم عليهم وهزت ملاذ راسها بمعنى لا ، شدت منيره بنظرها باصرار وتأففت ملاذ وقامت تسلم بدون نفس ، جلسو بعدها وبحكم ان الخدم موب فيه نجلاء هي الي تقهوي الضيوف من اليوم
طيف وهي ماسكه الضحكه: يلا يا نجلاء قومي قهوي اعدائك
نجلاء: علي الحرام ما..
قاطع كلامها منيره: نجلاء القهوة!
وعد: قومي يا حسرتي لا تفضحك عند متعب لا تنسين عقابك
نجلاء بهسهسه: قسم بالله ان فضيحتي عند متعب تهون من اني اقهويهم وانذل
منيره بحده: يا بنت
فزت نجلاء من غير نفس وصبت لهم القهوه ، مدت فنجال ساميه واتجهت لرهف ومدت عليها الفنجال ، شافت رهف طولت على ما اخذت الفنجال وقبل تاخذه صاغت الفنجال لين انكبت نص القهوه على فستان رهف ، فزت رهف وهي تصارخ: خير ماتشوفين!!
ابتسمت ملاذ برضى على الي سوته نجلاء ، كان مزاجها قالب بسبب حضورهم لكنها رضت من الي سوته بنت عمها ، كل البنات مبسوطين لكن اخفو سعادتهم عشان محد ينتبه لهم
ساميه: سلامات ماتشوفين انتي؟
رهف بحزن: والله انها قاصده
نجلاء وهي تمثل الصدمه: لا تحلفين يروحي مايصير الحلف بالكذب
منيره بحده: نجلاء روحي اجلسي وحسابي معك بعدين!!
جلست نجلاء قدام البنات الي بدو يعززون لها
ترف: والله تعجبيني
ابتسمت نجلاء بفخر ونطقت وهي ترجع شعرها لوراء: حبيبتي انا بنت حازم والله ما انذل لها
همست اميره لملاذ: شالسالفه شفيكم عليها؟
ملاذ بابتسامه: بعدين اقولك سالفه طويله
اميره: الله يستر منك
طلعت رهف تغسل فستانها وهي منهاره عشانه توصخ ، دخلت المطبخ ودورت على الخدم وما حصلتهم: مو وقتهم يختفون ابي منشفه اف
بدت تدور على المنشفه وما لقتها ، غسلت فستانها بشويه ماء ولما انتهت سمعت صوت متعب وهو يكلم وصوته يقترب من المطبخ
وبسرعه تخبت وراء الثلاجات ، دخل متعب يجيب علاج جده
وقبل يطلع طلعت رهف من ورا الثلاجه ووقفت على باب المطبخ
انصدم متعب من جرئتها ولا يدري من هي حتى ، صد بنظره بسرعه للا ض ونطق بحده: وش تسوين يا بنت الناس ، ابعدي عن طريقي
رهف وهي تتصنع الدلع: افا انا صرت بنت الناس الحين! تراني رهف بنت خالتك مسرع تنساني ولا عشانك تزوجت خلاص
متعب بحده: ابعدي عن طريقي
رهف: ليه فصخت الخطوبه ؟ عشان وحده ماتعرفت عليها الا من فتره قصيره!!
كان بيتكلم بس فزع يوم سمع صوت صراخ رهف وبكائها ، ما يدري وش الي صار ولا وده يرفع انظاره لان رهف كاشفه
لكنه ابتسم يوم سمع صوت ملاذ الي نطقت بحده: ما تستحين على وجهك طالعه بهالمنظر قدام واحد متزوج
رهف ببكاء: فكي شعررييي يا وصخه
ملاذ بغضب: الوصخخخ انتيي يا الرخيصه ، لابو ذالوجه يا قليلة التربيه ، والله ثم والله لو اشوفك قدام زوجي لا ادفنك ولا اعدك بني ادم مثلنا اني لادب فيك مثل ما يندب الحمار
رهف: متعب سووو شيييي
ملاذ: انا بنت سطام بنته وتقولين اسمه بعد
شدتها اكثر من شعرها وكملت كلام: والي على قولتك ماعرفها الا من وقت قصير جابته من اقصاه وانتي طول عمرك جنبه ولا عبرك ، تقلعي ولعد اشوفك عنده مره ثانيه
فكتها وتقدمت لمتعب الي كان مبسوط من الي سوته ، مبسوط لدرجه ان ابتسامته ماقدر يمسكها ، وكلامها لرهف للحين يدور براسه
سحبت متعب من يده واخذته معها لاقرب غرفه من المطبخ
دخلت وللحين ماسكه بيده ، سكرت الباب وراها ولفت له بغضب
ملاذ: ماتقولي وش كنت تسوي مع قليلة التربيه هذي!!!
حاول متعب يمسك ابتسامته ونطق وهو يبرر لها: كنت داخل اخذ علاج جدي
رفع العلاج عشان تشوفه وكمل: ويوم جيت بطلع مدري من وين جت ووقفت قدام الباب ومنعتني من اني اطلع
ملاذ بحده: بزر انت عشان تمنعك من انك تطلع؟؟ ترا فيه باب خلفي يمديك تطلع منه يمديك تدفها تصرف بس ماتوقف قدامها بذا المنظر!!!
متعب: اخو العيال وتبيني ادف بنت!!
حست بنار تحرق صدرها وبلعت غصتها ، ماتدري وش هالشعور الي داهمها يوم شافت رهف بذا المنظر قدامه وتتكلم معه ، كانت بتتكلم بس رجفت شفتها الي تنذر بانها شوي وتبكي ، كان يراقب ملامحها وتعابيرها وعرف انها بتبكي ، التفتت بتطلع عشان ما يشوف دموعها وقبل تحط يدها على مقبض الباب مسك معصمها وسحبها لين لصقت بصدره وبحركه سريعه حاوط وجهها بكفوفه
وانحنى يقبل ثغرها ، طاحت دموعها على خدها ورفعت يدها تحاوط رقبته ، نزل يده يحاوط خصرها ويده الثانيه ارتفعت لورا راسها يقربها له اكثر ويعمق القبله ، مشى فيها لين صدم بالباب
ما كان بيفكها لو ما ضربت كتفه تطلب التنفس ، بعد عنها وحط جبينه فوق جبينها وخذو نفس
عض شفته ونطق بابتسامه: تغارين يا بنت سطام
ملاذ: تخسي
متعب باصرار: تغارين يا ملاذ المتعب
لانت ملامحها يوم سمعت اللقب الي اطلقه عليها وماقدرت تمسك نفسها وانفجرت تبكي ورفعت يدها تحضنه
متعب: افا تبكين؟
ملاذ بقهر: الله ياخذها قهرتني بالي سوته
متعب: احرقها واحرق ابوها معها ولا تطيح منك دمعه عشانها ، عيون المتعب معد تشوف الا ملاذه ونور قلبه ، طول عمري ما اؤمن بالحب لين جيتي انتي وجبتيني من اقصاي على قولتك
ضحكت يوم تذكرت كلامها لرهف الي كانت تكذب عليها فيه
بس هو الحين قاعد يثبت انه صدق!
بعدت عن حضنه ومسحت دموعها ، رفع يده وهو يمسح دموعها عنها ونطق: لعد اشوفك تبكين ، كلي لك لحالك ، انا وقلبي
ملاذ: غصب عنك
عقد حاجبه وابتسم: لسانك طايل يا بنت سطام
ملاذ بابتسامه: من يومها بنت سطام كذا
متعب: هذا الي حببني فيها
ملاذ: اقول يلا بس ، بطلع تاخرت على البنات
متعب: بدينا بالتغلي
ملاذ بضحكه: يحق لي اتغلى
متعب: انا اقول عجلي واطلعي لان لو التفت لك علي الحرام ما افكك
بلعت ريقها وهي تعرف زين انه جاد بكلامه ، وطلعت بسرعه وخلته بالغرفه يصارع مشاعره ، حط يده على قلبه وهو يحسه بيطلع من مكانه: انشهد انها جابتك من اقصاك يالقلب الثقيل
مشت بسرعه باتجاه المجلس الي هم فيه وقبل تدخل عدلت شكلها بالمرايه ، كان شعرها محيوس شوي ، انتبهت لروجها الممسوح والجرح الي على شفتها: والله احراج شذا
حاولت قد ماتقدر ترقع من باقيا الروج ودخلت للمجلس
ما شافت رهف وامها وحمدت ربها انهم موب فيه لانه احتمال ترجع تفرشها لو شافتها مره ثانيه ، شافت نجلاء تشر لها وراحت بسرعه
جلست جنبها وقالت: وش مسويه ببنت ساميه؟ دخلت علينا تصيح
ملاذ: دبغتها لكم وقطعت شعرها مره ثانيه
نجلاء: قسم بالله انك محزم
اميره انتبهت للجرح على عليها وشهقت: بسم الله عليك لايكون ضاربتك ذي؟
ملاذ: لا تخسي ما مدت يدها علي
اميره: اجل وراه فمك كذا؟
توترت ملاذ ولا تدري وش ترد ونطقت: هذا اتوقع نامس اي نامس
نجلاء: نامس ببيتنا؟
ملاذ: اي شفيك بكل بيت موجود
مسكت نجلاء فك ملاذ ولفت وجهها لها: والنامس يبلع الروج بعد؟
وسعت ملاذ عيونها بصدمه: وش تقولين انتي!
وعد بضحكه: خلاص شفيكم اتركو البنت موب تحقيق هو
نجلاء: حسبي عليك يالنامس فشلت بنتنا
استحت ملاذ يوم فهمو عليها وقامت تصب القهوه عشان تشغل نفسها
{ في الحوش }
طلع متعب من البيت وشاف بندر واقف يدخن بالحوش
متعب: وش عندك هنا
بندر: طلعت اشم هوا ما جازت لي سواليفهم
متعب: اها
عقد بندر حاجبه باستغراب من منظر متعب المبعثر: شبلاه فمك
متعب بورطه: هذا فمتو لقيت النجلاء مسويته وشربت منه
بندر: فمتو مع ذا الليل؟
رفع متعب حاجبه: لايكون له اوقات معينه!
بندر: لا ابد اشربه متى ماتبي حلالك
ابتسم متعب وتنهد: اي والله حلالي
بندر وهو ناقد عليه: ما انت بصاحي مير الله يخلف عليك
ورجع ينفث دخانه وكمل: ترا محكمه حمد معد هي ببعيده ولازم ملاذ تجي تشهد ضده
متعب: مافيه طريقه ثانيه للشهاده؟ ما ابيها توقف قدامه ولا تشوفه هذا الادمي صار من الماضي بحياتها ، ذكرى وابيها تنمحي
بندر: ماش قاعد افكر من اليوم وش نسوي ولا فيه حل غيرها
تنهد متعب ودخل للمقلط يعطي جده علاجه
بعد ما خلصوا العشاء وراح مسلط وعياله وجارتهم نوره وبناتها طلعت ملاذ تودع اميره الي بترجع مع السواق زي ماجت
ملاذ: والله كنت ابيك تنامين عندي
اميره: ماقصرت من اليوم عندكم وان شاء الله دايم بجي بعدين تراني حبيت اهلك وحبيت البنات
ملاذ: بعد عمري انتي حتى هم حبوك
اميره: واااضح عليهم يازينهم
ملاذ: اجل استودعتك الله ياروحي واتصلي علي اذا وصلتي
اميره: ابشري
طلعت اميره ودخلت ملاذ بسرعه
- في المدخل -
كان مار من المدخل ولمح طيفها وعرفها زيييين ، مستحيل ينسى وجهها وملامحها الي خذت قلبه ، رجع وقف قدام المدخل وشافها تلبس عبايتها والواضح انها مستعجله تبي تطلع
نايف: طيف؟
التفتت بسرعه يوم سمعت صوته وحطت طرحتها على راسها
طيف بتوتر: بسم الله وش الي جابك!
ابتسم نايف: جابني الشوق والله
طيف: ما طبك الشوق لو هو طابك رديت على رسالتي
نايف: من صدمتي ماعرفت وش ارد قلت بخليها لين اشوفك وجهاً لوجه وهذا هو اليوم المنتظر
طيف: موب فاضيه الحين يا نايف ابعد خلني امر ابوي بالسياره ينتظر
نايف: طيب بس ابي اسالك سوال اخير قبل تطلعين
طيف: اسال؟
نايف: هو انتي صادقه بالي رسلتيه لي ومن قلبك؟
ابتسمت طيف وهي تعرف زين بداخلها انه ماصدق الرساله وخاف تكون بالغلط او حد غيري مرسلها
طيف: ما اقول الا الصدق انا وهذاني عطيتك الجواب فسح لي طريق
بعد شوي عنها لين مرت وطلعت ورجع يحط يده على قلبه وقال:
"الحب يفضح صاحبه يا اريش العين
يبيح كل اللي خفى في كنينه
ننطرعلى الطيف الخفي بيننا لبين
عل او عسى قلبي يوقف ونينه"
-
