{ العصر ، بيت مسلط }
بعد ما خلصو من التنظيف والشغل طلعت نوره تبسط الفرشه بالحوش يوم تاكدو ان العيال كلهم راحو للبل وحطت المراكي، كان الجو جميل ومن الصبح والشمس مختفيه ورا الغيم ، تقدمت نوت وحطت القهوة ودخلت تنادي الحريم ، بعد دقايق طلعو كلهم وجلسو بالحوش على الفرش ، التفتت صيته لنوت: قومي قومي خلي الوغدان ينادون فيصل والسلوقي الي معه يروحون للبقاله يجيبون بساكيت وشقلاطات للبنيات
نجلاء: وينها بقالتكم؟
اشرت صيته بيدها: هذاهي في الفه الي هنيه
ابتسمت نجلاء: قريبه يا خاله اجل بنروح لها حنا والبنات ونجيب اغراضنا و..
اختفت ابتسامتها يوم قاطعتها صيته بحده: معصي ماعندنا بنات يروحون للبقايل
نجلاء: تراها بقاله ماهيب نوادي ليليه يا خال..
قاطعتها مره ثانيه صيته: يا ويلي ويلاه يا كثر قرقرتك الي مالها لزوم
تأففت نجلاء وتجاهلت الي ماسكين ضحكتهم
انتبهت منيره للي سرحانه ولاهيب ملاذ الي تعرفها ، ملاذ الي تحيي القعده وتضحك وتسولف وتونس الي حولها ، ملاحظه من يوم جت من المزرعه وخاطرها متكدر تنهدت تنطق: يامي ملاذ
ما ردت عليها كانت سرحانه ولا انتبهت ، دقت وعد كتفها وفزت تلتفت لهم: هلا وشو
منيره: وش بلاك يا بنيتي من يوم جيتي وانتي سرحانه ومانتي بعلى بعضك
تنهدت ملاذ وابتسمت بتكلف: ابد يا جده بس احس بصداع خفيف
نطقت نجلاء وهي تناظر للارض وشايله بخاطرها على ملاذ كثييير لانها تجاهلتهم من اليوم وماهي راضيه تقولهم وش فيها: طبيعي بيصدع من امس ما اكلتي شيء
منيره: افا يا بنتي وليه ما تاكلين وانا اشوفك اليوم زحفتي عن السفره بدري واحسبك شبعانه لو اني داريه غصبتك
صيته: يا فري جيبي من امس ما اكلتي ياوليدي وش تونسين وش يوجعتس؟
ملاذ حست بكتمه من ضغطهم عليها مع انها تدري انه من خوف عليها لكنها ماتعودت على احد يصر عليها كل هالاصرار ويخاف عليها كذا: مافيني الا العافيه شوي صداع ومغص وبيختفي
كذبت عليهم ولا هي وجعها داخلي يحرق جوفها وقلبها ومشغل بالها
التفتت صيته على منيره: ابك البنيه لا تكون حامل وانتم مهملينها
كلهم ناظرو في صيته بصدمه من كلامها الا ملاذ الي وسعت عيونها بضيق وصدمه وودها لو تصيح هي وين وهم وين بتفكيرهم ، وهذا الي زعلها اكثر محد يفهمها هنا ابداً رغم حبهم لها لكن التفهم مطلوب ، ناظرت نجلاء بحقد في صيته وودها لو تقوم تذبحها الحين ، قامت ملاذ من عندهم ودخلت داخل ولحقتها نجلاء بسرعه ، قفلت باب الغرفه عليها ووقفت نجلاء عند الباب متردده تطقه ولا لا ، تجاهلت زعلها منها وطقت الباب: ملاذ افتحي
ملاذ بغصه: نجلاء ما ابي اكلم احد تكفين خلاص خلوني ارتاح
تنهدت نجلاء بضيق وراحت تجلس في المطبخ احسن من جلستها قدام صيته لانها لو جلست دقيقه زياده خربتها و تهاوشت معها
- في الحوش -
حاولت صيته تغير الجو المشحون الي دخلو فيه: قومي انتي خليهم ينادون اخوتس
قامت نوت ونادت واحد من الورعان ينادي فيصل لها وانطلق البزر لعزبة مسلط ينادي فيصل ، وصل العزبه وشافهم متجمعين على الفرشه قدام الخيمه ، التفت سعود للبزر وهو يركض: جاك المنادي يا فيصل
كان كل عصر اذا احتاجو شيء البنات يرسلون واحد من البزران ينادي فيصل يجيبه لهم وصارو معتادين على هالشيء ، فز فيصل
واشر على عزام يقوم معه ، قام عزام معه وحك دقنه وهو يفكر يقدم ولا مايقدم لكنه قرر يتقرب منهم ونطق: هيه انتم
رفعو روسهم اصيل ونايف يوم شافوه يشر عليهم
اشر نايف على نفسه: حنا؟
فيصل: ايبالله انت والي جنبك فزو بسرعه
عقد حاجبه اصيل: على وين؟
ابتسم فيصل: ابك قمم واعلمكم والله ما تندمون
ناظر سعود في فيصل بحده ونطق: لا تورط عيال الناس معك انت والسلوقي الي جنبك الزمو اعماركم
فيصل: افا يبه تشك بولدك
سعود: اشك وزود بعد
عزام بصوت خافت: لابو ذا الوجه يا فيصل سمعتي مخربها عند اهلك ماينادوني الا سلوقي تفو علاك
فيصل: وانت سلوقي صدق بس صمها
عزام: اوريك من فينا السلوقي خلنا نمشي بس
ناظر نايف في اصيل: ها نقوم؟
قام اصيل: قم يا ولد عمي بدال الطفش الي حنا فيه
مشو الاربعه متجهين لبيت مسلط وفي نص الطريق التفت عزام يتاكد انهم ابتعدوا عن العزبه ونزل نعاله ، انتبه له فيصل ورفع ثوبه بسرعه وبدا يركض وانطلق وراه عزام بالنعال: والله لا امحطك ابها واعلمك منهو السلوقي
حب اصيل يده وجه وقفى وقال: الحمد لله والشكر
ضحك نايف عليهم وقال: والله ودي اركض يا اصيل
التفت له اصيل: تسابق؟
رفع نايف ثوبه وربطه على خصره وسوا اصيل نفسه
نايف بابتسامه: مثل ايام زمان
اصيل: انطلققق
وبدو يركضون لبيت مسلط وقدامهم عزام الي يلحق فيصل بالنعال
يوم وصلو كانو تعبانين من الركض ، وقف فيصل يتنهد وضربه عزام بالنعال خلاه يصارخ صرخه وصلت للي بالحوش
صيته بصراخ: وجع يا سلقه
فيصل: ابك يا جده ضربني
صيته: خلني لين امسكك اضربك زياده مير اخذ الفلوس الي مع اختك وازرق للبقاله جب شقاليط واغراض بيتقهوون عليها البنات
ضحك نايف والتفت يهمس لاصيل: شقاليط
ضحك معه اصيل على تقليده ، تقدمت نوت ومعها الفلوس ، حطت شرشفها على راسها ووقفت ورا الباب تمد يدها على فيصل بالفلوس ، انتبه عزام لليد وابتسم يوم عرفها ، عرفها من حبة الخال الي في يدها ومميزتها ،
فيصل: نوتوه خذي لنا طريق تكفين نبي نشرب ماء
نوت: وجعوه ما بتخليك جدتك
فيصل: جربي معها يازفت
التفتت نوت على جدتها وقالت: يبون طريق بيشربون ماء
صيته: واجبهم من يخليهم يموتون ضمى مير تعالي اجلسي وخليهم يدخلون ،
حطو البنات شراشفهم على روسهم لين مرو متجهين للمطبخ ، كانت نجلاء جالسه هناك وتتامل الجو بس فزت يوم سمعت تضاحيك عيال ودخلت للصاله داخل بسرعه ، وقفت تنتظرهم يطلعون ، بعد ما شربو ماء وخلصو طلعو برا وقبل يطلعون سمعت صوت اصيل ، حطت شرشفها على راسها بسرعه وخذت نظره للمطبخ من ورا الباب وكان بس اصيل ونايف خلصو شرب الماء وكانو بيطلعون بس صوتت له: اصيل
التفت يوم سمع صوتها وميزه ، التفت يدور يمين ويسار لعله يلقى صاحبه الصوت ، لف على نايف الي كان يضحك على شكله الي يتخبط وقال: سمعت لا تخاف ما انهبلت للحين بس عجل علي بنتظرك برا
طلع نايف واول ماطلع وخرت شرشفها عن راسها ودخلت للمطبخ وهي تتافف وتحاول تعدل شعرها الي طاح على وجهها من الشرشف ، اما اصيل انصدم من منظرها لاول مره يشوفها بقميص الروز والشرشف ، اعجبه شكلها جددااا وابتسم زي الاهبل وهو يتاملها ، ناظرت فيه ونطقت: وش لايكون شكلي بالروز مب حلو
تنهد اصيل: اقسم بالله ماعمري شفت وحده مزيونه بقميص الروز مثلك
نجلاء: طبيعي لانك ماعمرك شفت بنات الا لو مجرب من وراي
اصيل: اخسي واعقب تنعمي عيني ان لمحت غيرك وامعنت النظر لها
مسكت نجلاء شرشفها الي على كتفها والتفتت يمين ويسار
اصيل بضحكه: وراه خايفه كانه اول مره توقفين قدامي
تنهدت نجلاء: اخ يا اصيل اخ وقسم بالله العجوز ذي بلوى منكده علي عيشتي هنا هذا وحنا مالنا الا كم ساعه
عقد اصيل حاجبه ونطق: والله لاحرقها واحرق بيتها معها لعيونك
التفت بيطلع ومسكته مع معصمه وهي تضحك: هيه شفيك تراك مهبول بتسويها
اصيل: وانا صادق علي الحرام اسويها لعيونك
نجلاء: لاتسويها بس ابي منك معروف تكفى يا اصيل
ناظر اصيل ليدها الي متمسكه في معصمه وكيف تترجاه وتنهد وهو يقول: لابو من يردك اطلبي عيوني يالنجلاء اطلبي قلبي والله مايغلون عليك ولا تسمعين مني رفض
ابتسمت وهي متاكده انه يسويها عشانها: ابيك تنادي متعب قوله ان جدتك تبيك عشان زوجتك تعبانه تكفى يا اصيل والله ان البنت تعبانه من امس ولا ندري وش فيها وانا ماني مرتاحه وهي كذا ابدا
حط يده فوق يدها الي على معصمه ورفعها يقبلها ونطق: تامرين امر بوصل له هالكلام وانتي لا تشيلين هم طيب؟
نجلاء: منعيوني يا جعلني ما انحرم منك
قاطعهم صوت نايف: يلا ياولد لايشكون
اصيل: يلا جايك جايك
التفت لها وكمل: تبين شيء ثاني؟ ترانا رايحين للبقاله علميني وش بغيتي ، تبين نفس دايم صح؟
ضحكت وهزت راسها وحط يده على خشمه ونطق: على هالخشم
بعدها طلع ورا نايف وخلاها ضايعه بمشاعرها وهي تحس برضى وسعاده بسببه ما عمرها كانت متضايقه وتقابل اصيل الا ويغير مزاجها للافضل
