دخلت المطبخ وشافت نجلاء تغسل المواعين لوحدها
ملاذ: عالقوة
نجلاء: وين الي يبون يساعدوني وماراح يتركوني لحالي !
ضحكت ملاذ: بغير لبسي واجيك تراني عند كلمتي للحين
نجلاء: يلا عجلي تعبت وربي
طلعت ملاذ للغرفة وطلعت لها بجامه ودخلت تلبسها ، بعد ماخلصت مرت على الورد الي جابه لها متعب ، ابتسمت وهي تتفقدهم ، رجعت لهم الحياه وازهرت من جديد ، بعد ما انتهت نزلت لنجلاء
وبدو يغسلون وينظفون
{ في المقلط }
جلس متعب جنب جده وكانو كلهم متجمعين ما عدا نايف الي استأذن وراح لغرفته
متعب: البنات يبون المزرعه ما ودكم تخاوونا؟
صقر: وانا جدك مسلط عازمنا للديره على عرس ولده البكر ويقول دامه ما بقى على المدارس الا اسبوعين تعال اقضوا اسبوع عندنا بعد وجب عوالك معك
أصيل بصدمه: ووش قلت له ياجدي؟
صقر: معد قدرت ارفض عاد اصر علي
متعب: اجل اسمع العلم ياجدي ، انا باخذ البنات نقعد يوم يومين هناك في المزرعه وبعدها نلحقكم
أصيل: بخاوي متعب انا
بندر: دربي على دربكم ماعندي استعداد اواجه الديره مره ثانيه
فهد: اجل حتى انا معكم
حازم: دام الوضع كذا نص للمزرعه ونص للديره وبعلم مطلق اشوف من الي بيروح من البنات معكم وحنا يالكبار بنروح للديره
متعب: اجل بكره الصبح ان شاء الله نبي نسرح
صقر: ما تشوفون شر يا ولدي
{ في المطبخ }
بعد ما خلصو شغل جلسو يتقهوون في المطبخ ويسولفون
نجلاء: وربي تعب الله يسامح جدتي بس
تنهدت ملاذ: ماعليه لحقنا وخلصنا بدري
عدلت نجلاء جلستها: ما قلتي لي ليه ضربتي المقروده رهف؟
ملاذ: يووه لا تذكريني قسم بالله قهرتني الله يقهرها
نجلاء وهي تشرب من القهوه: اسلمي
ملاذ: تخيلي اني لقيتها واقفه وهي كاشفه قدام اخوك
شرقت نجلاء بقهوتها
ملاذ وهي تضرب ظهرها: بسم الله عليك بسم الله عليك
نجلاء: تخوف هذي ماعندها كرامه؟ مو طبيعيه شكثر رخيصه
ملاذ: والله نرفزتني بس قطعت شعرها مره ثانيه
نجلاء: والله زين سويتي لها كان كسرتي رقبتها عشان تتربا
ملاذ: ماعليه يجيبها الوقت واكسر رقبتها
نجلاء: طيب متعب وش سوا؟؟
قلبت ملاذ عيونها يوم تذكرت شكله وهو واقف قدامها وقامت تقلده
ملاذ: تبين اعلمك وش كان يسوي؟
نجلاء بضحكه: اي اي
فتحت ملاذ الثلاجه وطلعت منها علاج ووقفت قدام نجلاء تقلد وقفة متعب وكيف يناظر للارض ولا انتبهت للي كان واقف وراها على الباب ومتكتف ، حاولت نجلاء تمسك ضحكتها وقالت: ايوه كملي وش كان يسوي متعب
ملاذ: تخيلي كان واقف كذا ومسوي يناظر للارض
تحمحمت وقلدت نبرة صوته: ابعدي عن طريقي!
ماتحملت نجلاء وانهارت ضحك وضحكت معها ملاذ لكن فزت يوم سمعت صوت متعب يتحمحم وراها التفتت بسرعه وشافته واقف ومتكتف: لا كملي المسرحيه
ناظرت ملاذ بحده في نجلاء الي كانت منهاره ضحك على شكلها
ورجعت تناظر لمتعب: من متى وانت هنا؟
رفع متعب حاجبه: من يوم بديتي المسرحيه
نجلاء: يلا انا استاذن
مرت من جنب ملاذ ال ضربتها على كتفها: انا اوريك
تقدمت لمتعب وهمست له: والله يا ان زوجتك ميته غيره
ملاذ بحده: خير وش تتهامسون!
نجلاء: ابد سلامتككك
طلعت نجلاء بسرعه وتركتهم لوحدهم في المطبخ ، ناظرت ملاذ فيه بفشله وقالت: انا بعد بطلع انام تعبت اليوم
متعب: اي يلا امشي قدامي
صعدو لغرفتهم ودخل متعب الحمام يتروش ، واستغلت الفرصه وراحت تنام قبل يجي ، ما تبيه يفاتحها بموضوع المسرحيه الي سوتها تحت قدام نجلاء ، انسدحت على الجانب الايمن وتلحفت واعطته ظهرها ، بعد دقايق طلع وعقد حاجبه يوم شافها نايمه ، تقدم يطفي النور وانسدح على الطرف الثاني من السرير يحاول ينام.
