وفاتو شهرين علي غياب موسى وهما ميعلموش عليه ولا خبر 💔
طبعا الاغلبية تأقلمو علي الوضع وغياب موسى وعائشة كانت حزينة بس تخلي في روحها عادية وتحسنت حالتها وكان طبعا المتشمت اكثر من يلي واجعه الحال كيف انه راجلها طلع يخدم تاجر ممنوعات وانه يهرب في السلاح وهادا الشي يلي خلا عائشة تنقم علي موسى بعض الشي
في حوش الحاج محمد ...
نجوى : خلاص عاد قرب عرسك اسماء
اسماء: اي ان شاء الله
نجوى : ههه سبحان الله كل ما يجي يقرب موعد عرسك تجي مصيبة
نجوى كان قصدها انه المرة الاولا تأجل عرس اسماء سبب وفاة لي امالي لعريس ومرة تانية موسى كيف مفقود
انتصار : مكتوب هادا كله بتساخير ربي مسخرلها انه يكون عرسها توا
دنيا : اي والله
في مكان تاني ...
موسى
كانو حوايجي كلهم دم كنت حفيان نجري نجري ومش عارف روحي وين ولا في اي حدود لين لقيت روحي واصل لي زي هكي باين زي قرية ناس متاعها واضح عليهم البساطة بكل قعدت بعيد ولابد كنت منبيش نطلع في النهار قعدت لابد في جيهة هكي كلها نخل وكان صقع وكنت عطشان وننزف خلاص بنفقد الوعي
عن مصباح ...
احلام : اني نقولك من اول طلع ولدك من السريب هادا لاكن انت راضي كنت ي مصباح كنت راضي
مصباح : خلاص عاد نفس القصة كل يوم حتا هوا ولدي وواجعني مش ولدك بس
احلام : حسبي الله ونعم الوكيل لاكن كيف ماحرقتلي قلبي علي ولدي
مصباح طلع وخلاها واحلام قعمزت وقعدت تبكي بحرقة علي ولدها 💔
وهادي كانت حالة عيلة مصباح من يوم ماموسى مشي كل يوم عراك وكل يوم احلام تبكي ومفيش حد كان يجيهم من عيلة حاج محمد هلبا كانو زي لمحملينهم المسؤولية علي يلي صار وانه بمعنى كيف موسى دار هكي في عائشة 🤷🏻♀️
مريم كالعادة سمعت نقاش امها وبوها وركبت لدارها قعدت تبكي علي خوها وعلي حالتهم لوين وصلت
الانسان في محنات زي هكي يعرف صاحبه من عدوه مهما كان الضرف مهما كانت المحنة يلي هوا فيها والله يجماعة حتا كلمة مرات من شخص هكي انه هوا يطمنك بيها ويطبطب عليك تهون عليك والله محلاها الكلمة الطيبة لما تجي في وقتها تحسي كانه ربي باعتلك الناس هادم 🤍
نرجعو لقصتنا ...
عند عائشة
كنت مقعمزة في الصالون بحدا امي وفاتحة تلفوني وتتفرج علي صور المطعم متع اني وموسى وكان خاطري واجعني من موسى علاش ياموسى درت هكي فيا حطمتني من كل النواحي معاش عرفت نزعل عليك او نزعل منك قعدت في دوامة كبيرة
