الصبح عند الحاج محمد...
اسمهان : نبي نمشي لي عويشة استاحشتها
حاج محمد : كلميها شوفيها قبل مرات طالعين ولا حاجة
اسمهان : اي عادي حتا غدوة اني توا نكلمها قبل
حاج محمد : اليوم بيجيني عمك مرعي هادا جارنا قال بنشرب عندك قهوة
اسمهان : اها باهي حتا تحصل تهدريزة توسع خاطرك
حاج محمد : اي والله خلي نشوفو مصباح بالك يجي حتا هوا
_____________
عائشة
قعدت نتحرك هكي وحسيت روحي كانه حد راقد معاي ولا مفهمتش قعدت نحاول نفتح عيوني وهكي واني النوم غالبني لين بديت نصحصح ادركت انه موسى هوا لراقد معاي لاراديا نضت بسرعة حولتله ايديه ووقفت وكان شعري مفتوح وقعدت نرعش وقلبي ينبض بقوة
موسى
كنت راقد لين حسيت بي حد حولي يديا بقوة ووقف اني اني نضت طول قعدت مقعمزنشوفلها كيف ترعش وخايفة كانه ترا شن درتلها
عائشة ترعش : عع علاش كنت بحداي وشن درت
موسى يبي يحاول يهديها : مدرتلك شي انتي رقدتي مشي ساويتك بحداي مدرتلك شي
عائشة قعدت تحاول هكي تهدا وقعدت تساوي في شعرها ورا ذنها : اا ي شورني رقدت بدون مانندري اسفة
موسى توتر من حركتها : لاعادي ... وناض خش لحمام
عائشة
قعدت في مكاني واقفة حسيت ردة فعلي معجبتاش انحرجت هلبا لاكن منعرفش علاش لما حسيت بيه جنبي خفت هلبا
رن تلفون عائئشة 📞
عائشة : اهلين يما شن لخبار
اسمهان : الحمد الله بنيتي كيف حالك وحال راجلك
عائشة : كويسين الحمدالله استاحشتك هلبا كيف حال بوي
اسمهان : والله ليك وخشة خليتي مكانك بوك كان بحداي قبل شويا قتله نبي نشوف عويشة نمشيلها
عائشة فرحت : تعالي اي مرحبتين بيك
اسمهان : خلاص غدوة توا نخطم عليك نقول لبوك يحطني انتي امته بديري عزومة حوشك
عائشة : والله منعرف ياامي غدوة تجي ونحددو امته
اسمهان : باهي مالا ديري بالك علي روحك وسلميلي ع موسى هلبا
عائشة : تمام به ... وسكرت
لين شرين التلفون مرة تانية وكانت مريم
مريم : ايوا اهلين عويشة
عائشة : اهلا شن لخبار كيف حالك
مريم : الحمد الله كيف حالك انتي وموسى
عائشة : الحمد الله كيف حال اللاي وعمي كويسين
مريم : كويسين قتلك كانه قاعدة قلت نجي عندك نهدرز فاضية ولا
عائشة : اي فاضية تفضلي تعالي
مريم : تمام خلاص توا نقول لي بابا يخطمني العشية
عائشة : تمام به ... وسكرو الخط
عند موسى كان يسمع فيها وساكت طلع من الحمام وخش لي الدار يغير في حوايجه عائشة خشت الحمام وبعدين طلعت لقاته مقعمز في كوجينة يدخن
عائشة وبدير لفطور
عائشة : كلمتني مريم قالتلي تبي تجي تهدرز العشية
موسى مردش عليها كمل يدخن ومداير روحه ميسمعش
عائشة تكنطت كملت ادير في لفطور وبعدين حطاته فوق الطاولة
موسى : شن لناقص
عائشة : توا نشوف .. وجت بتطلع
موسى : متبيش تفطري مالا
عائشة : لا صحتين
موسى تكنطى
