صادفوا بطريقهم ليث وابوه
هتان وقف جالس يناظر فيهم وتركي مستغرب
تركي ناظر بنفس المكان اللي يناظر فيه هتان وفهم
مسك يد هتان : مشينا لا نتأخر على وقت الزياره
وتقدم وسحب هتان وراه وراحوا عند ابو هتان
( في قسم الزياره )
وصلّ تركي هتان : يلا انا استأذنك بمشي
والتفت تركي يبي يروح مسك يده هتان
هتان : حضرة الضابط
تركي : سم؟
هتان : قبل لا تروح ابي اشكرك على اللي سويته معي..
"تركي حس بشعور غريب اتجاه هتان لان فيه جاذبيه رهيبه وغير كذا طريقة اسلوبه لفتت نظر تركي"
هتان باقي مكمل : لولا الله ثم انت كان للحين طايح بالحمام ومحد داري عني
واسف تعبتك معي مره
تركي : العفو واهم شيء انك بخير وزي ما قال الدكتور لا تهمل صحتك
وخليك دايم مرتاح تمام؟
هتان : تما..
طلع سليمان
هتان شاف ابوه وفك يد تركي وبسرعه قام يركض وحضن ابوه بقوه
هتان : ابوي فيك شيء؟ انت بخير؟ طمني عنك!
سليمان بابتسامه : بخير مافيني شيء يا ولدي
هتان وفيه البكيه : اشتقت لك
سليمان : وانا بعد انت طمني عنك وعن اخوانك وامك وش مسويين
هتان : بخير وبنكون بخير اكثر بوجودك بيننا
سليمان : وين اخوانك ما اشوفهم
هتان : ابراهيم راح يجيب اكل ومهند جالس مع امي بالبيت
سليمان : اهيه الحمدلله اهم شيء انكم بخير
هتان : يبه
سليمان : سم يا ولدي شبغيت
هتان : هو صحيح عمي ابو ليث اللي رفع عليك القضيه؟
سليمان : مع الاسف صارت بيننا نزاعات بعد ما جينا من البر عشان ارض اشتريتها منه قبل سنين
وامس رفع علي قضيه وقال اني سارقها منه وعندي اوراق تثبت العكس لكن انت معليك لا تشيل هم وقل لامك واخوانك اني كلمت المحامي وان الموضوع باذن الله بينحل بسرعه
هتان : ان شاء الله
تركي دخل عليهم : خلص وقت الزياره
هتان هز راسه
وقبل ما يروح
هتان قام يهمس لابوه : يبه شفت هالضباط
ابو هتان بصوت عالي : اي وشفيه الضابط
هتان : يبه قصر صوتك لا يسمعنا
امس نزل ضغطي وهو اللي وداني المستشفى واعتنى فيني ويوم جاء ليث عندي ما كنت ابي اشوفه وليث قام يزعجني وسحبه وطلعه برا وابراهيم يوم قرر يجيب اكل وصاه علي وترك نص شغله عشاني
سليمان : ما شاء الله عليه فيه الخير ما قصر هذا غير
ان وقفته رزينه وواضح عليه ولد اجاويد هو وش اسمه ؟
هتان : تركي
ابو هتان راح لتركي وقام يشكره على كل شيء سواه مع ولده
وانه يستاهل الطيب والكرم وقرر يعزمه بعد ما يطلع
تركي : الله يسلمك ويجمل حالك يا عم ما كان له داعي وذا واجبي
ابو هتان : اول مره اشوف ولدي هتان ب هالطاقه وكله عشان وقفتك معه وعاد انا كبر ابوك لا تردني
تركي : من عيوني وعلى هالخشم
ابو هتان : عليه الشحم ولا اوصيك في ولدي انتبه له هو يالله يعرف يتصرف
تركي ناظر هتان وهتان منزل راسه
تركي : ابشر
ابو هتان : يلا يا ولدي هتان روح انتبه لامك واخوانك لا تخليهم لحالهم وخلك عاقل
هتان : سم يبه
