AMARYAR ZAYYAD

15

*AMARYAR ZAYYAD*

Na

©®Rahma Kabir MrsMG.
Wattpad @rahmakabir

Page 15.

Rashida bayan ta kammala komai ta sallami yara suka kwanta kana tayi shirin barci ta zauna jiran Zayyad ya dawo daga ɗakin Safna, tana yi tana duba lokaci a wayarta har ya kai kusan minti ashitin da biyar, shi da bai wuce minti sha biyar a kowani ɗakin wacce ba ita ke da miji ba, ta miƙe ta isa ƙofa ta buɗe ta tsaya, ta shiga loda masa kira dan gabaɗaya tunaninta ya gama bata ya tsaya cin amanarta ne, Zayyad kuma kallon wani action film ya shagaltar dashi bai san lokaci ya ƙure ba, kiran Rashida daya gani ya sashi miƙewa yana yiwa Safna sallama, ta rakoshi bakin ƙofa ya wuce sai ta rufe ƙofarta ta koma ta cigaba da kallo.

A ƙofar ɗaki yaci karo da Rashida fuskar nan a haɗe tana cewa.

Ai wlh daka ƙara minti biyu sai dai ka ganni a nazo ina buga muku ƙofa, Allah Zayyad baka yi mini adalci tunda kayi auren nan idonka ya rufe akan Safna, ba ka ɗaukeni a bakin komai ba.

In dai haka tunaninki ya baki to kije a haka, wannan kanki kike yiwa, ban guri na wuce kafin in saɓa miki.

Ya faɗa a hasale, Rashida ta koma ciki tana ƙananun magana bai kula ta ba ya rufe ƙofar ya wuce zuwa ɗakinsa tana binsa a baya, koda suka shiga wajen kwanciya ya nima ya juya mata baya.

Abban Ilham ina da magana, amma naga ko lokacina ba kada shi.

Kin san dai dare yayi, ki bari gobe In Allah ya kaimu mayi maganar bana son damuwa a yanzu.

Dama dole kace haka ita kana da lokacinta amma ni ba kada nawa. Dama ina so ka jawa matarka kunne ta fita a sabgar yarana naga take takenta burinta tatakura musu, to bazan ɗauka ba dan nasan zafinsu.

Zayyad rufe idonsa yayi dan bai tanka mata ba, idan ya cigaba da biye mata ba zasu kwashe ta daɗi ba dama yasan maganar nata baya wuce ƙorafi, Rashida ganin bai kulata ba yasa ta yi kwafa ta nima gurin kwanciya tana mitar ya daina sonta.

...

Safna.

Ganin sha ɗaya yayi hakan yasa ta haƙura da kallon ta kashe komai ta wuce ɗaki ta kwanta, a wannan lokacin ta tuna da duk abinda ya faru a ranar, musamman na zancen cikin da take da shi sai ta samu kanta tana murmushi, ta shafa mararta tana ambaton.

Ya Allah ka albarkaci abinda ke cikin cikina kasa ya zamo rayayye mai jin ƙai a garemu, kasa ya kasance ma'abocin addinin musulunci. Ka shiryar da shi shiriya dauwamammiya. Ameen.

Ta ƙare tana lumshe ido tunawa da cewa yanzu lallai dole ta kauncewa wasu abubuwa dan in ganta tarbiyyar abinda ke cikin cikinta, domin tarbiyya tun daga samuwar ciki ake fara shi, dole mace ta daina jin kiɗe-kiɗe da waƙe-waƙe, ta zamo ma'abociyar sauraren karatun Al-Qur'ani ko karantawa, tare da sauraren wa'azin malamai, duk wata shagala ta nisanta kanta da shi, sannan a duk lokacin da cikin ya dameta ko take jinta a takure ko kuma wahalar laulayi, akan ta riƙa yawan ƙorafi wannan ciki ya dameni, dan abu kaza kaza a bishi da zagi, kamata yayi tana faɗin kalmomi kamar subhallahi ko hamdala ko wani tasbihi tare da roƙan Allah ya bata juriya akan jarabawan daya yi mata na abinda ke cikinki, ta riƙa sallah akan lokaci tare da yin azkar safiya da maraici, ta riƙa kamewa da zarar magrib tayi. sosai Safna ta lula duniyar tunani wanda ya ɗauketa kusan sha biyu saura, daga bisani tayi addu'ar barci ta gyara kwanciya ba jimawabarci ya ɗauketa.

Da gari ya waye har sai da ta makara sallar asubahi, data idar ta saka ruwan wanka tayi shi da zafi dan taji ƙarfin jikinta, Alhamdulillahi ta samu sauƙi daga ciwon kunnen duk da yana mintsilinta sai dai ba kamar jiya ba, ta shafa mai sai ta sauya wata rigar barci mara nauyi mai wando ta koma gado ta kwanta tana karanta azkar ɗin safe, data gama ta rufe ido ba ɓata lokaci barci ya kwashe ta.