انتِ لي 🕊💜

الحلقة 36

دقات قلبو علات...خصوصا كي طولو..ومزال ملحقو..واقف قدام البلدية..رايح جاي..يشووف فطريق...ويسنى في صاحبو يلحق...مع دار الدورة..اللخرة شاف طونوبيل داخلة..للبلدية ضحك حتى ضرسة..لعقل بانت...هبط صاحبو..وزادت هبطت هي..موراه غير شافها..راح يجري ليها...صوت دقات قلبو يتسمع..حتى هي مكانتش اقل منو...قلبها عامل معزوفة..يدق بقوة...تشوف فيه قدامها...وبعد دقائق برك..راح تولي مرتو...قانونا وشرعا...حشمت وهبطت راسها..منظراتو ليها...كان يشوف فيها...بعشق وحب وهيام..الفرحة خارجة من عينيه...تبسم كي شاف حشمتها...قرب منها وهمسلها....

مروان(تبسم) : قتلك نديك...خمس دقايق وتولي على اسمي..

زاد حشمها اكثر...قريب تذووب...لحق زياد وفارس...ومعاهم بابات مروان (عيسى)...دخلو للبلدية...عقدو...كملت سينيات...طلعت راسها شافت فيه...كان يتبسم..غمزلها...خرجو من ثم..غير لحقو للباب تع برا...عيطلو هيثم...

هيثم : مرواان...

مروان : وي...

هيثم : وتخرجها فالسكاات..؟؟! ههههه..هيا لييكيييب...

هو غير قاال هكا...جبد فارس وزياد...لي بوق ولي فيميجان..كانو حاطينهم..فطونوبيلات جابوهم....وبداو يطرطقو فيهم...وحتى هو حكم واحد..وواحد مدهولها ليها...الفرحة خارجة من عينيهم...صح تزوجو في ظرووف صعيبة..بصح حبهم ربح كلش...مروان مستحيل كان راح يقبل..يشوفها مع غيرو..وهي مستحييل تكون لغيرو...تقتل روحها...ومتقبلش تكون مع وحدوخر...هكذا يكون الزواج..عن حب الفرحة تبان في عنين العرسان...
زياد يشوف في ضحكاتهم...وفرحتهم تمنى...يعيش هذ اللحظة مع تاالين...تبسم فرحان لفرحة صاحبو...وخووه..
داها مروان فطونوبيل وراحو...فتحو فالجامع...ولات دك مرتو شرعا وقانونا...واحد ميقدر يهدر معاهم...ومن موراها ديراااكت لداار...هبط مطونوبيل...وهبطت معاه..شافت فيه متوترة...شدلها يدها..يطمن فيها...

مروان : راني معاك...

هزتلو براسها ايه...دخلو...الحالة كانت هادية...مكاين حتى واحد فالساحة..دخلو للداخل كانو كامل...مجتمعين فصالو...من غير رغد ورهف لي كانو يقراو..في بيتهم..
الكل ستغرب..شكون هذي وكيفاه..راه شادلها يدها...قدامهم كامل...بلا حشمة...شافت فيه يمهااه وهدرت...

سهام : وااش كاين...واش رااه صااري هنا مروان..؟؟؟!

قبل ميجاوبها دخل باباها...وهنا بدات تتعقد لحكاية اكثر...باباه واقف جنبو..يعني عارف بشي..لي راه دايرو وليدو...

سهام : عيسى واش كااين...مرواان...شكون هذي..واحد فيكم يفهمني..؟!

حكيمة : مروان..شكون هذي..؟!

زيرت على يدو اكثر...شي من الحشمة وشي من الخوف..والتوتر...شاف فيها..تبسملها..ودار عندهم...

مروان : مرتي...هذي احلام مرتي..

سهام : كيفاااااااه...؟!

حكيمة : ااه..واش راك تخلط..عيسى واش راه يهدر وليدك..؟!