انتِ لي 🕊💜

الحلقة 23

شفت فيها...كانت تهدر بغصة تع بكى... شغل حاجة خانقتها...طاح مني النص...كي شفت حالتها..

عماد : اسناي رهف....

درت عند سلسبيل...لي مزالت تخزر فيا.....
عماد : .مبقات حتى هدرة بيناتنا...اخر مرة تزيدي...توريلي وجهك...

سلسبيل : عماد..انا...

درت وخليتها...كانت راح تهدر...بصح كي شافتني..بعدت وجيت رايح...سكتت...قربت من رهف...

عماد : رهف صفا..؟!

هزتلي براسها...يعني ايه...شدتها رغد من يدها...

عماد : ايا مالا نوصلكم لدار...

وصلتهم لدار...طريق كامل وهوما ساكتين...غير لحقنا لقدام باب الدار...شفت فيها مزالها تبان عيانة...كانت راح تدخل...حبستها كي عيطلها...ورغد دخلت..خلاتنا وحدنا....

عماد : رهف...

طلعت راسها عندي...تبسمت تلقائيا...هذي اول مرة نركز معاها...عينيها صغار...بصح شابين...مالقري راهي تبان بلي كانت تبكي...بصح وقت تضحك يتغمضو...وحدهم...شعرها قصير وجاي طايح على كتافها...نيفها صغير...وكيوت...ضحكت بلا منفيق على روحي...ستغربت مضحك تاعي..شافت فيا وهدرت....

رهف : ...واش بيك...؟!

عماد(تبسمت) : والو...المهم صفا..؟!

رهف : ممممم

عماد : ...واش قالك..؟!

رهف : كان حاب..النيميرو...وكي محبيتش....

عماد : كملي..!!

رهف : قالي..مراحش نطلقك..حتى نديه...وبقى يهدر ويسمط..وكي جيت رايحة...شدني من كتفي...ونتا...جيت..

هي غير قالت شدني من كتفي...تفكرت اللقطة هذيك...حسيت الزعاف عاود شعل فيا...زيرت على قبضة يدي نحاو نتمالك اعصابي...

عماد : راح يخلصها غالية...الكلب...

رهف : عماد..خلاص..مانيش حابة...تزيد تضارب معاه..اصلن لي درتو ليوم يكفي..ويعطيك الصحة...

عماد : مدرت والو رهف...راكي كي ختي

رهف (تبسمت بمرارة): يعيشك...

غير قالت كلمتها دخلت لدار...تنهدت وعاودت وليت للقاراج...نكمل خدمتي ...

..............................

        _صباح جديد على ابطالنا _

خارجة مليسي...كي عادتها...كانت مع صحبتها...تبسم وقت شافها...يموت عليها..ويعشق الارض لي تمشي عليها...عاودت ولات بيه الذاكرة لاول مرة...شافها فيه...وقتها كان في عمرو 22 سنة...كانت رايحة تشري... مدكان لي قريب لدارهم...هو كان قاعد مع صحابو..شاف طفلة خارجة ملباطيمة...شعرها اسود يوصل لنص ظهرها...غير دارت وشاف وجها...قلبو دق بلقااوي...تبسم بلا ميفيق...من قتها طاح على راسو...ولا يروح يريح..مع صحابو تع الحومة لفوقانية...غير علاجالها...كان خايف يهدر معاها ولا يصارحها...موراها بثلث شهر...صرات كبيرة بين الحومات...ودارو قانون جديد...هوما ميدخلو لحومتهم ولوخرين ميروحو ليهم... من نهارها ولا كي يحب...يشوفها يستنى قدام الليسي..حتى تخرج باه يشوفها...عمرو متجرأ يصارحها بحبو...بصح لوقتاه...راح يقعد مخبي فقلبو...ليوم راه 26 سنة...حبو ليها دام ربع سنين...علابيها قرر يصارحها...ونهار صارحها...مرفضاتوش لاكن مقبلتش ثان...بصح هو مستسلمش...وحالف يديها هي يصرا واش يصرا...فيقو صوت صاحبو..من شرودو...