انتِ لي 🕊💜

الحلقة 30

واقف يشوف لليسي...ملبعيد خايف تشوفو..لابس سيرفات وفاست ملفوق...مغطي روحو بالشابو..تع الفاست...يشوف فيها..باين عليها التعب..عينيها منفخين..ومتورمين..اكيد كانت تبكي..حالتها تقطع القلب..قاعدة وحدها على جنب..حتى خرجت صحبتها..راحو يتمشاو...تخزر من ومن...وكأنها تسنى فيه يبان..هذي 4  ايام مشافتو..مسمعت صوتو..قلبها واجعها..وحابة تشوفو..ولو من بعيد تنهدت...هو لي بقى يتبع فيها بعينيه..غير لحقت قريب من حومتها..تراجع ادراجو..موولي لدار...شافت فيها صحبتها...وهدرت...

ميس : احلام...

احلام : وي..

ميس : شوفي فياا..واش بيك هكا ذبلانة..نورمالمو تفرحي..خلاك تكمل قرايتك..تخيلي حبسك فدار ويزوجك..بكاش شيخ...

احلام : ايه راني فرحانة...

ميس : وي فرحانة تباتي تبكي كل يوم..وعينيك منفخين...احلام سيريو واش بيك..؟!

احلام (تتصنع الابتسامة) : ههه لالا والو...

سألتها صحبتها..بدون سابق انذار..سؤالها غدرتها بيه...حتى انها طرحاتو على روحها وملقاتلو الا جواب واحد...

ميس : احلام..تحبيه..تحبي مروان..؟!

دارت ليها..شافت معاها مدة امبعد..طاحو دموعها...مقدرتش تكتم صوت شهقاتها لي علات...

احلام : ايه..معلاباليش وقتاه حبيتو..بصح نحبو ميس..نحبو..

ميس (تنهدت) : ياروحي انتي...علاه مقلتيلوش؟!

احلام : مقدرتش..اصلن انا عرفت بلي نحبو..مور مصرا لي صرا..تخيلي..دايمن واقف معايا..حتى فنهار تع خويا...ووقف جنبي..مخلانيش ولو للحظة...بصح مورها..انا...انا لي خسرتو..انا لي قتلو...منقدروش نكملو..انا بيدي خسرت..الانسان الوحيد لي حبني...ميس قلبي راه يوجع فيا...

عنقتها ميس...تمسح على ظهرها...غاضتها حالة صحبتها..مسحتلها دموعها..

ميس : خلاص ياروحي..مروان يحبك..واكيد مراحش يسمح فيك بالساهل..اصبري وراح تناالي..

احلام : مقدرتش..توحشتوو..حابة نشوفو برك..حابة غير نملي عيني بشوفتوو...

ميس : واش رايك ليوم..جي تباتي عندي..ونحكو..

احلام : باينة ميخلينيش..خويا..ارواحي نتي...تع الصح ني مستحقاتك هذ الفترة..

ميس : اكيد يااعمري..راح نجي..

تبسمتلها احلام.....

...............................

محمد : كيفاااه...خرجت بلا متقوولونا...لوكان كشما يصرا لطفلة...كيفااه نقااابلوو...يماها..اااه....

رغد : عمو محمد..انا طلعت لبيت..سوسن نجيبلها شارجور..هي بقات معاها..

شاف فيها...بنظرات حادة..عينيه قريب يطرطقو...زعافو وصل لتووب...