الخذلان +21

الفصل الثاني والثلاثون

مرحبا اعزائي القراء...اتمنى تكونون بخير ... الاحداث راح تتغير بالاجزاء الباقية بشكل جذري...شخصيات هواي جديدة راح تتعرفون عليهه ... الخيال يزيد وتنفتح ابواب لعوالم جديدة ... عوالم اتمنى تستمتعون بزيارتهه...

اتاخرت عليكم وعوضتكم ببارت مكون من 3000 كلمة اتمنى ينال اعجابكم...واللي ناسي الاحداث عل البارت الجاي راح اكتب ريكبشن لكل الاحداث المهمة اللي صارت من بداية القصة ولحد هذه الجزء.....

تحياتي

الكاتب ج جمال

//////////////////////////////////////////////           ////////////////////////////////////////////

ما اشوف الا الغواش ... كانما اني جوه الماي اسمع صوت همهمه لا اكثر صوت ناس بعيدين جدا وما افرزن الحجي ... صياح عله صوت بجي ... اريد افتح عيني ماكدر...ومن افتحهه ثانية بالكثير وعيوني ترجع تتغمض...جسمي احسه بعيد بحيث ماكدر اتحكم بتحركاتي...مثل حلم غريب ... يمكن هذه هوه الاحساس بالشلل ... كلشي بمكانه بس ما تحس بيه...ولا عندك اي سيطرة عليهه...الاصوات بدت تتقرب اكثر...واحس صوت مثل التصفيك...ونسمة خفيفة على وجهي...هناك جان افز من حسيت بسطل ماي بارد انجفه على وجهي...شهقت بقوة...الماي بارد ثلج...كانما صحيت من كابوس ... لكيت روحي بكابوس ثاني...اريد استوعب اني وين ... شنو اللي صار ؟ ليش مجاي اتذكر اي شي...غرفة وصخة ظلمة ... ميز حديد كاعد عليهه شرطي بملابس مدنية ... لابس كمامات...ورجال ضخم بالفانيلة وبنطرون عسكري وبيده سطل ازرق الغرفة ظلمة ... بس ضوة اصفر من كلوب قديم على الحايط...رغم سطل الماي البارد بس احس بحرارة بجسمي ... احس جسمي يغلي...الغضب والخوف خلنني اصيح بعلوا صوتي صرخات غضب...صرخات ماعرف شلوت تترجم بس هجمت بوجه اللي كدامي...اريد اكوم اركض عليهم...اسلبهم حياتهم بكل عنف ... بس جسمي بعده ما يستجيب ومن ردت اعرف السبب باوعت على ايدي ورجلي اثنينهن مشدودات على كرسي حديد ، والكرسي مثبتينه ببراغي بالكاع....

اللي بالملابس المدنية يحاول يحاجيني بس بعدني احس روحي جوه الماي وما اسمع غير صوت مكبوت...الرجل الضخم يشمر السطلة على وجهي...احس بيهه انضربت بوجهي بس ما حسيت بالم...وصوت الصفيك اللي جنت اسمعه تبين اخرهه ان هذه الرجال جاي يطك وجهي راشديات...بس اريد اعرف شنو اللي جاي يحس بيه؟ رجال بطول الثور جاي تضرب رجل اخر مشدودة ايده ورجله بكرسي راشديات علمود شنو؟ شنو اللذة بالموضوع؟ وين القانون وين المدنية وين الديمقراطية اللي ساطرينه بيه؟ وينهه؟ لو بس تنسد البيبان تتحول كل القوانين المدنية والدستور الى مجرد قصص خيالية يسمعونهه الاطفال ويوارثوهه...وكل هاي القوانين وكل هاي المحاكم ما هي الا تمثيليات ... تمثيليات الغاية منهه اسكات الرأي العام...بس الخاص مختلف جدا...غرف مظلمة يتعذب بيهه الابرياء...بدون اي سبب بدون اي حق ممكن تسلب كل حقوقك ... وتهان وتضرب وحتى يعتدى عليك...

ماحسيت بالراشديات بس اشوفهن واني اصرخ بكل غضب بوجه اللي يضربني...ومن كل الضرب والصريخ فجأة اظلمت الدنيا من جديد.... صحيت من جديد عله شهيق عميق ورا ما حسيت بماي ثلج انجفه على جسمي...