Kung nakakamatay lang ang tingin ay baka siguro napatay ko na si Sky. Kahit noong nakasakay na kami sa kanyang kotse ay halos hindi ako makatingin sa kanya. Gusto ko siyang sigawan ng malakas o murahin ng ilang beses ngunit pinipigilan ko ang aking sarili.
Maging siya ay tahimik rin hanggang sa makarating kami kung saan ang bahay nila Sonya. Iba ang klase ng handaan nila dito sa probinsiya. Maraming tao dahil kitang kita iyon mula dito sa labas. Halos puno rin ang harapan at likod na bahay nila Sonya.
Lumabas ako ng sasakyan at medyo kinabahan dahil sa tagal ng panahon ay alam ko na makikita ko dito ang iilang kakilala.
Nilingon ko si Sky at mariin siyang tinitigan. Napatingin ako sa kanyang leeg dahil may nakasabit doon na kulay silver na necklace. Plain lamang iyon. Simpleng puting T-shirt ang suot niya at pantalon na tamang tama lamang sa kanya.
"Problemado na ako Sky. Sana huwag mo nang dagdagan pa." malinaw kong' sabi sa kanya. Tinaasan lamang niya ako ng kilay kung kaya tumalikod na kaagad ako.
Alam kong' sumusunod siya sa akin ngunit nang makita ko ang iilang kakilala ay nawaglit na sa isip ko si Sky.
"Nandito ka, Kath!" agad akong sinalubong ni Sonya galing sa isang kausap. Ngumiti ako sa kanya ng titigan niya ako mula ulo hanggang paa.
"You look fab! Hindi ko inaasahan na mababasa mo ang invite ko sa email mo!" nagbeso sakin si Sonya.
"Sorry, I was busy kaya hindi ako nakareply." napatingin siya sa aking likod.
"Oh! Is that Sky Mondejar?"
Kapwa kami ni Sonya napatingin kay Sky. Napaawang ang labi ko na makita siyang titig na titig sa aking katawan at malamlam ang mga mata. Umangat ang tingin niya sakin kaya umiwas ako.
"Pinasama ni lola para may kasama ako." I explained.
"Ang hot niya. Sobra. Halika! Nandito ang mga kaibigan at classmates natin dati." Inimbita rin ni Sonya si Sky kaya ito sumunod sa amin.
Kung sa akin lang ay hindi niya na ako kailangang samahan dahil ayokong bumuntot siya sa akin ng ganito. Bumubundol ang kakaibang kaba sa aking dibdib habang nakakahalubilo ang iilang kaklase ko at kakilala.
"Kath, here is my husband, Mikel." pakilala ni Sonya sa kilala kong varsity ng aming school noon. Umawang ang labi ko at ngumisi sakin si Mikel.
"Long time no see, Kath." tumango ito sakin at may kinausap na ito.
"Sonya... He was your bully, right?" hindi ko na maiwasang itanong kay Sonya.
Makahulugang ngumisi si Sonya. "He bullied me because he likes me."
My mouth formed into "O".
"OMG Sonya, matagal na naming idol itong si Kathlyn, ikaw lang pala ang makakapagpapunta sa kanya dito sa atin! Kath! Ang ganda ganda mo na lalo!" halos makalimutan ko ang kakilala ko noon kaya hindi ko pa alam ang sasabihin ko.
"It's me... Aime! Yung' katabi mo sa upuan!"
"Oh! Aime! Ikaw pala iyan!" halos mabuhayan ako ng loob at halos hindi siya makilala dahil sa pinagbago ng katawan niya.
"Ano kaba. Umuwi si Kathlyn hindi dahil sa invite ko no!" si Sonya at dinagdagan pa ang inumin sa aking baso.
Ginala ko ang aking mga mata sa paligid at nakitang nag uuwian na ang iilang matatanda na may kasamang mga bata dahil siguro gabi na.
Iba ang selebrasyon dito sa probinsya kumpara sa siyudad. Noong nasa Maynila ako at kadalasan na mga kakilala ko na may mga birthday ay sa club ginaganap o di kaya ay intimate dinner with family. Dito naman sa probinsya ay sa bahay o sa gilid ng dagat. Ang mga bisita rin ay halos buong barangay ay puwedeng kumain kung kaya maging sa loob at labas ay may mga nakapwestong mesa at upuan.
