انتقامي

16

انتقامي 16

يجلس في سيارة عبد الله و يبدو عليه القلق
مروان : هو حضرتك طلبت مني ليه اننا نتقابل هنا
عبد الله : عشان دة اكتر مكان نقدر نتكلم فيه براحتنا
مروان : خير
عبد الله : وصلني خبر و المفروض اني اعرضه بس انا رفضت بسبب اللي شوفته فيه.. واضح ان حكاية سلسبيل مش هتعدي بالساهل كدة زي ما احنا متخيلين
مروان : ليه هو خبر ايه
عبد الله : اولي جلسات محاكمة سلسبيل 27/5
مروان (بتعجب) : نعم
عبد الله : الخبر جالي كدة
مروان : هيحكموها على ايه دول.. هي عملت حاجة اصلا
عبد الله : الخبر اللي وصل لي مكنش فيه التفاصيل دي.. كل الي كمان مكتوب "أولى جلسات محاكمة سلسبيل علوان 27/5" دة العنوان الرئيسي أما بقيت تفاصيل الخبر "ألقى القبض على المذيعة سلسبيل ماهر علوان قبل أسبوعين بتهمة مجهولة حتى الآن .. و هي الآن في الحبس الاحتياطي بأحد السجون إلى أن يتم محاكمتها الشهر القادم بمحكمة **** بالعاصمة و سيتم نقلها إلى أحد سجون العاصمة قبل المحاكمة بأيام قلائل و سيتم الإعلان عن موعد محاكمتها بالتحديد قبل أيام من المحاكمة..." دة كل اللي كان مكتوب.. مفيش تفاصيل ولا اي معلومة مفيدة
مروان (مقاطعًا بسرعة) : لا لا مين قال مفيش معلومة مفيدة.. ع الاقل عرفت انها في سجن.. اه مش عارف ازاي بيسموا دة قبض و هفضل شايف ان اللي عملوه أشبه بالخطف من أي حاجة تانية.. و اه معرفش محبوسة ليه ولا فين بس ع الأقل عرفت انها في سجن
عبد الله : انا معرفش كواليس اللي بيحصل و معنديش معلومة كاملة عنها بس اللي اتوقعه أن
مروان (مكملًا الجملة بالسياق الذي يريده) : أن شريف الكلب بيستخدم سلطته عشان يوّقع سلسبيل
عبد الله : اهدي يا ابني.. الشتيمة مش هتغير حاجة
مروان : بس هتريحني انا (أخذ نفسًا عميقاً ليهدأ و يسترجع تركيزه ثم اكمل) دلوقتي هو عقد الدنيا اكتر من الاول و لازم أخرج سلسبيل من الورطة اللي هي فيها.. بس ازاي و انا معرفش التهم اصلا
عبد الله : اكيد هتعرف في أول جلسات المحاكمة.. استنى بس
مروان : بس انا مش ههدي ولا هيستريح لي بال إلا لما اعرف سلسبيل في انهي سجن و أشوفها بنفسي
عبد الله : يعني هتعمل ايه مثلا.. هتسأل في كل سجون لجنفرس
مروان : موافق.. لو مفيش حل غير كدة هعملها
عبد الله : انت اتجننت يا مروان.. انت تعرف في كام سجن في لجنفرس اصلا.. ولا أماكنهم حتى
مروان : النت اكيد هيخدمني في النقطة دي
عبد الله : انت اتجننت رسمي دة في حوالي 25 سجن في لجنفرس هتدور في كل دول
مروان : عشان سلسبيل مستعد أعمل المستحيل
عبد الله : إرجع لعقلك يا مروان بلاش هبل
مروان : دة مش هبل.. انا هعمل كل اللي اقدر عليه عشان اقدر ارجع سلسبيل سليمة و لو كلفني حياتي
عبد الله : يعني هتلف لجنفرس كلها بنفسك و انت بتدور عليها
مروان : لو اضطريت هعملها عادي.. بس اول هسأل تاني هنا يمكن الاقي حد يساعدني
عبد الله : طب افرض كذبوا عليك
مروان : ربنا يسهل بقى.. انا بكرة هروح اسال هنا ملقتش حاجة هجهز شنطة خفيفة كدة و هبدأ ألف من بعد بكرة
عبد الله : طالما انت مُصر يبقى اخلي مندوبين القناة يسألوا و ريح نفسك
مروان : لو عشان سلسبيل هحب الشقى.. هدور بنفسي و متقلقش عليا
عبد الله : ما انت كمان في خطر يا مروان
مروان : و هو شريف هيستفاد ايه لو كنا احنا الاتنين في السجن.. و حتى لو هيستفاد المهم ابقى بذلت أقصى جهدي عشان اشوفها تاني
عبد الله : اللي يريحك يا مروان.. انت دماغك ناشفة و ملهاش حل
ضحك ضحكة خافتة ثم قال
مروان : مش هضيع وقت بقى.. اشوفك على خبر حلو كدة يفرحنا كلنا يا رب
عبد الله : خبر رجعة سلسبيل إن شاء الله
ابتسم له و غادر السيارة بحذر
_________________________