احنا كدا ( الجزء الثانى )

الحلقه { 16 }

الحلقه { 16 }

ام فجر : ادخل انا مش عارفه تعليم ايه اللى متعلمينو ده

فجر : ادينا باقينا لوحدنا وقفلنا الباب كمان فى ايه بقى ؟

ام فجر : بنتك عندها كام سنه يا دكتور ؟

فجر : 18 والشهر اللى جاى هتدخل فى 19 يعنى كبيره

ام فجر : لا مش كبيره دى لسه عيله وكمان مرهقه وانته سايبها على النت كده برحتها

فجر : ( باستغراب ) مرهقه يعنى ايه ؟

ام فجر : يعنى سن حارج ممكن لو اى حد قالها بحبك تحبو لو واد محلفط كده من اللى بيلعبو حديد دول قالها هاى تعالى نروح النادى هتروح

فجر : لالا حبيبه مش بتكلم حد انا عارف انا مربيها كويس

وبعدين انا كل يوم بتقولى عملت ايه طول اليوم هى مش بتخبى عليا حاجه

فجر : يا واد النت ده فى نصايب

انا لسه قفشه الواد حماده فى البلكونه وفضحتو قدام ابوه وامو

فجر : قفشتيه بيعمل ايه ؟

ام فجر: انا بابص من البلكونه هنا على تحت قولت اشوف اختك لمت الغاسيل ولالا لقيتو واقف ومشغل افلام قلة ادب روحت نزلت لامو مانا مااسكتش بقى حظو الحلو ابوه كان تحت

فجر : يا ماما وانتى من فوق شوفتيه دا حتى ناظرك يعنى

ام فجر : لا انا نظرى 6على 6 بس انا بقولكم كده عشان الحسد المهم اكمللك نزلت بقى لامه وابوه وفضحتو ابوه مسكو وحلقلو شعرو زيرو

فجر : هههههههه ابن المفضوح ههههههههه

ام فجر : شوفت بقى النت كلو قلت ادب ده غير المصايب بقى بتاعت الثوار والاحزاب ولا اقولك ايه بس ده بيقولو الفيس بوك الحكومه مرقبه

فجر : حبيبه ملهاش فى كل ده انا عارف

ام فجر : بس برضو هاجى معاك مش هسيب البت لوحدها

ولا انته بقى مش عاوزنى اقعد فى بيتك خلاص هكون تقيله عليك ما هو كده الواحد لما بيكبر محدش بيبقى طايقو

فجر : حببتى انتى تقعدى على راسى اشيلك فى رموش عنيه بس مش هترتاحى وبعدين حبيبه بتروح الجامعه هتقعدى مع مين بقى لوحدك ؟

ام فجر : بتقعد سنه فى الجامعه دول 6 او 7 ساعات وترجع الوقت ده هنام او ادخل اعمل اى حاجه فى المطبخ ولا اى حاجه

فجر : مش عاوز اتعبك انا كل اسبوع هجبهالك

ام فجر : شكرا يابنى بحسبك اقولك اجى اقعد عندك تقولى تنورى يا امى ( وراحت منزله دموع التماسيح )

فجر : خلاص والله تنورى بس انا مش عاوز اتعبك خلاص تعالى اقعدى عندى

ام فجر : خلاص ماشى هلم حاجاتى قوم شوف بنتك بقى