حطموك يا قلبي

الجزء 1

اول جروحي قلب ميت من الاهمال...
وثانيها صدمة حب ماتت برواقة بالخيانة
والثالثة هجران ماتت به احلامي...
والرابعة اني اصبحت بلا احساس .....

تعالت أصوات المنبه في المكان لتعلن عن قدوم يوم جديد ......يوم كئيب بحال كاع الايام لي دازو ، فاتت دبا عامين وانا مبغيتش ننسا ، هاداك نهار عمرو يتمحا ليا من بالي أول حاجة كنتفكرها كل صباح..... كيفاش نقدر ننسا وانا تعرضت للغدر والخيانة من أقرب ناس ليا .....خليت دموعي ينزلو محاولتش نحبسهم حتى دخلات عليا ماما تفيقني .......
ماما: فيقي ابنتي رآها 9
انا: (وكنرد عليا الغطا) ماما عافاك خليني نزيد غير تال 10
ماما: واش بغيتي يفوت عليك الوقت ..ياك قلتيلي المقابلة معا 11
انا: اماما الله يهديك .....هدرنا البارح و قلنا مغانمشيش حيت اصلا مغايبقبلونيش
ماما: (وكتحيد عليا المالطا) غير جربي متخسري والو.....
انا: مفيا لي يضرب الطريق علا والو ....خليني عليك
ماما: الله يرضي عليك ابنتي سيري متعرفي ربي ييسر
انا: (تعصبت ونضت جلست) سمعيني مزيان اماما كنقولك حنا 200 واحد لي دافعين السيفي وهما طالبين غير بوسط واحد وشارطين الخبرة ديال عامين من الفوق ......
ماما: (وجاراني من يدي) غتمشي يعني غتمشي........
انا: افففف واخا صافي هاني نايضة ........
ماما: يالاه وجدي راسك فيساع بما وجدت الفطور ....وخاصك مزال تجيبي دوا لباباك قبل ما تمشي. ....
انا: اوا ها شنو مكيعجبنيش علاش مقلتيهاش البارح ..
ماما: نسيت ابنتي ....يالا فيساع طلقي راسك ...
انا: واخا....
مشات وسدات الباب موراها وانا دخلت للطواليت غسلت وجهي وتوضيت وصليت ......ووقفت حدا البلاكار كانخمم منلبس .....
نعرفكم بعدا براسي انا فدى 23 سنة عندي حقي من زين عينيا كبار وعسليين ملامحي مرسومين وشعري طويل رطب وزعر، انا ما بيضا ما سمرا الطولا قصيرة شوية و الفورما واعرة ومقادة ........ عندي ماستر في تسيير المقاولات خديتو العام الفايت ومازال كنقلب علا خدمة مخليت فين مشيت كلشي كيطلب الخبرة ولا المعرفة.......والمشكل محتاجة للخدمة بزاف باش نعاون واليديا خصوصا بابا لي مريض طايح في الفراش وعايش غير بدوايات. .... حنا كنا عايشين بيخير انا واختي التوأم مع ماما و بابا لي كان موضف في البلدية ....حتى لداك النهار اللي غير حياتنا، نهار لي عمرو يتنسا ليا ....ختي صفاء هربات من دار مع خطيبي ......من داك نهار الفرحة غابت من دارنا ... بابا ناعس في الفراش ومبقاش قادر يخدم ماما عاطيا ها غير البكا وانا ربي لي عالم بيا.........
بقيت مدة طويلة واقفة تنخمم منلبس ،قلبت داك البلاكار سفاه علا علاه مبانت لي غير فواحد اللبسة قديمة كنت شريتها دوزت بيها حفل التخرج من لافاك، كانت عبارة عن جيب قصيرة في نواغ مع قاميجة في الغوز وصندالة بالطالون طبعا تا هي في الغوز عدلت ماكياج خفيف وجمعت شعري علا شكل ذيل حصان، تقابلت معا المراية عجباتني النتيجة اللبسة جاتني لاصقة و أنيقة تليق بهاد المناسبة وكلشي هو هداك ..... رغما عني تفكرت سفيان (خطيبي السابق) كان كيحماق علا هاد اللبسة اصلا كان كيحماق علا شي حاجة سميتها فدى حبنا كان اسطوري كيتضرب بيه المثال انا لحد الان مزال مقادرة نصدق انو غدر بيا ومعا من مع ختي ، مزالا كنحلم ونستناه يرجع ليا........فينك اسفيان علاش مشيتي وخليتيني؟؟؟... واش طاوعك قلبك عامين مسولتيش فيا!!!......انا مسامحاك غير بأن عندي!!! ....عارفا بلي صفاء هي لي غراتك!!!!!....عمرو عينيا بالدموع وحبستهم فيساع ماباغاش نخسر الماكياج.....سمعت ماما كتعيط ليا عرفت راسي معطلة وخرجت عندها كنطير تا كنت غنطيح علا وجهي...لقيتهم بداو يفطرو هي وبابا ..... صبحت علا بابا بستو في راسو وجلسنا كنفطروا في جو حزين وصامت بحال ديما من نهار مشات ختي وحنا هاكا............
ساليت فطوري مشيت جبت الدوا من الفارماسيان لي حدانا مديتو لماما من الباب وشديت طاكسي توصلني للشركة فين غاندوز المقابلة .......
الطريق كلها وانا كنضحك علا راسي هههه والله تا نتي مسطية افدى هههه كتحلمي بزاف بغيتي تخدمي في منصب بحال هادا وفي وحدة من أكبر الشركات في البلاد(شركة هولسيم للاسمنت)....ههه كانو طالبين مستشارة للمدير التنفيذي لواحد الفرع جديد غيتحل في مدينة اخرى....واخا انا الدبلوم ديالي مشرف خصوصا اني طلعت الأولى علا دفعتي وكنتقن اللغة الإسبانية والإنجليزية. ....لاكن الخبرة ديال عامين منين غنجيبها ......اف اماما كلشي منك كون راني باقا ناعسة ومبرعة معا راسي ....هههه معليش معليش كيما كيقولو لي ما شرا يتنزه ، نمشي تا انا نشوف هاد الشركة كيف دايرة .......محسيت الا ومول التاكسي كيقولي وصلنا ......خلصتو ونزلت فيساع .........وقفت مقابلة مع عمارة ضخمة وفخمة،بديت كنقرب بخطوات متثاقلة ومترددة حتى وصلت للباب الرئيسي ؛ تلفت معرفت مندير كيبانو لي ناس داخلين خارجين ......استجمعت قوتي ومشيت سولت السيكيريتي قالي المقابلة غتكون في الطابق العاشر ووراني بلاصة المصعد. ......طلعت في المصعد مع مجموعة من الشباب باينة تا هما جاو يدوز و المقابلة وصلنا للطابق المعلوم ، دخلناى لقاعة الانتضار، لقيت راسي وسط عدد كبير من الشباب والشابات كلهم لابسين مزيان الشباب دايرين الكوستيمات والبنات وحدة تنسيك في الاخرى حسيت، براسي لا علاقة زعما ياحسرة راه لبست احسن ما عندي ......كانو كلهم واقفين كيتناقشو و كيقفقفو.......سولت واحد البنت لقيتها حدايا ، واش بداو قاتلي مزال .....
جلست علا الكرسي حاطة رجل علا رجل ومبردة معا راسي كنشوف في الوجوه لي حدايا وكنضحك كلشي مخلوع وكيرجف، والمشكل كنسمعهم كيهدرو هالي عندو خبرة 4 سنين، هالي عندو دبلوم واعر هالي جاي من طرف فلان ......مديتهاش فهاد شي ومتاثرتش بيهم اصلا انا معوالاش ننجح في هاد المقابلة منجحت حتى في البانكة بقات لي غير هادي!!!!!.........فيقني واحد الصوت كينادي بنبرة مرتفعة علا اول اسم من المتبارين . ....المقابلة بدات ......
لي كيدخل مكيفوتش 3 دقايق وكيخرج محطم حيت كيخبروه تما بلي مرفوض........دازت شي 3 دالسوايع حتى بقيت غير انا بوحدي ولحد الان الكل مرفوض وتقول واش قبلو شي حد ......شداتني الضحكة وقلت معا راسي "و نوضي سيري فحالك اش باقا كديري هنا" نضت وتميت غادا في اتجاه الباب وانا نسمع الموضف المسؤول كيعيط ليا باش ندخل ندوز تا انا ......ملقيت مندير من غير اني نتراجع عن قراري مشيت دخلت بكل برود محاسا لا بخوف لا بتا حاجة .......مع الدخلة كيبانولي شي 10 دالمسؤولين جالسين علا طابل غوند طلب مني واحد منهم نجلس بصوت حاد.....متحرك فيا والو انا اصلا متاكدة مغايقبلونيش علاش نمرض راسي ونتخلع. ... أول حاجة طلب مني لاكارت ناسيونال شدها عليا كيشوف و كيدقق فسميتي وسولني واش نتي هي فدى العمري ......هز الصيفي ديالي بقا تيشوف فيه مكاملاش جوج دقايق قالي "مبروك عليك نتي مقبولة معانا " .......
منقدرش نوصف ليكم شعوري فديك اللحظة حسيت بحال تخوا عليا الما مثلج من هول الصدمة جاتني الضحكة ههههه كنت حابساها غا بزز بحالا ممصدقاش وممستوعباش هاد شي .....جيت نايضة نمشي فحالي بدون سابق انذار ههههه يحساب لي الشركة ديال با با......دار فيا واحد منهم وانا نتكمش في بلاصتي طلب مني الرقم ديالي و قالي غيتاصلو بيا باش يخبروني امتى نبدأ........
خرجت من تما وانا مرفوعة محاساش براسي ومقادراش نتيق معرفت كيفاش درت حتى لقيتني حدا دارنا كندق في الباب .....حلات عليا ماما ....غير شافتني عنقاتني.....
ماما: مديريش فبالك ابنتي دبا يحن الله ....
انا: لساني تخرس مقادراش نهدر باقا ممستوعبا. ...
دخلاتني للصالة كان بابا ناعس علا السداري وكيشوف فيا تا هو مبقا ليه والو يبكي ....المنضر ديالو فيقني من صدمتي تلاحيت عليه كنبوس ليه يديه وكنبكي ....
انا : بابا قبلو ني في الخدمة والله تا قبلو ني. ....
بابا: حتى هو كيبكي وكيردد" الحمد لله "
ماما: شهقات من الصدمة ....
انا : (مشيت عند ماما كنعنقها) قبلو ني اماما انا تقبلت انا غنخدم في أكبر شركة في المغرب.......
ماما: كنت عارفة ابنتي ....ربي كبير ميخيب تا واحد ....
انا : الحمد لله .....
بابا: (وكيمسح دموعو بديه) فوقاش غتبداي ....
انا : مزال معرفت والو عطيت ليهم النمرة حتى يعيطو عليا.........
جلسنا مجمعين وضاحكين الحمد لله بعد هاد المدة كلها قدرت نشوف الضحكة ديالهم ان شاء الله غنعوضهم علا كل فات ومغنخليهم محتاجين لتا حاجة .........تغدينا جمعت الطبلة و غسلت المواعن دخلت لبيتي نرتاح، نعست شوية وهو يفيقني صوت التيليفون كانت صاحبتي هيام بغاتني نمشي معاها تتقضى شي حاجة .....
وافقت طبعا حيت اصلا انا براسي خاصني نتقضى شحال من حاجة..... معندي تا شي لبسة مقادة خاصني نغير طريقة داللبس ديالي .....هاد الفرصة لا تعوض جاتني تا لعندي مغانخلي تا حاجة تحرمها عليا ......فكرت نمشي عند بابا يعطيني باش نتقضى لاكن فيساع ضربت علا هاد الفكرة خليه مسكين غير في همو انا غندبر علا راسي .......غنتسلف من عند مول الحانوت .....اكيد مغايخيبنيش حيت عارفني غنردهوم ليه ...تفكرت فاش كانت ختي صفاء كتتسلف عليه وكيجي عندي انا كنردهوم ليه ....اههه ياختي علاش درتي فيا هاد شي علاش غدرتيني وقتلتيني ......رجعات بيا ذاكرتي للأيام لي دوزنا ها بجوج كانت شخصية عنيدة ومتمردة عكسي تماما ديما كدير الزبايل أنانية وكتبغي غير راسها واخا انا وياها فوطوكوبي في الوجه لاكن في الشخصية فرق كبير بيناتنا......من نهار عقلت علا راسي وحنا غارقين في مشاكلها .....كانت خفيفة بزاف مخلات تا راجل ما تصاحبات معاه، حتى من رجال صحاباتها كاع دارت بيهم ...حتى لدك نهار لي هربات فيه معا سفيان.......... بابا جاتو جلطة في الدماغ من دك نهار وهو طايح في الأرض ........وانا تصدمت صدمة العمر خصوصا زواجنا كان بقا ليه شهر من دك نهار فقدت معنى الوجود....
عيطات لي ماما نشرب اتاي ، مسحت دموعي رسمت ابتسامة علا وجهي وخرجت نجلس معاهم ......مشيت جلست حداهم في الصالة بانو لي ماما وبابا مبدلين ملامح وجههم مستبشرة خير شي لي ريحني وزاد من العزيمة ديالي ....خاصني نشد فهاد الخدمة بسناني ورجليا........
شربنا اتاي سالينا خرجت دزت علا مول الحانوت هو الأول تسلفت عليه 2000 درهم ومشيت عند صاحبتي لي هي اصلا بنت جيرانا لقيتها واقفة في الباب كتحلف عليا ......
هيام: (ومغوبشة) وافينك تا لدبا. ...
انا: (وكنضحك) سمحليا والله ما لخاطري...
هيام: (قاطعاتني) اش غتقولي ....ديما نتي عندك الاعذار....
انا: (وجاراها من يدها) اوا يالاه
هيام: زيدي قدامي ......
طلقنا رجلينا خشيت يدي في ذراعها وتمينا غاديين بالزربة....
انا: شنو باغا تشري بعدا
هيام غير شي توب ديال الجلالب ونتي ...
انا: خاصني نشري شي لباسي يليقو للخدمة ...
هيام: (وقفات وكتشوف فيا) متقوليش ليا غتخدمي في البانكة. ...هه واخيرا قبلوك مبروك عليك ......
انا: هه الله يبارك فيك مي ماشي في البانكة ...
هيام : وفين ؟
انا: غنخدم في شركة هولسيم.......
هيام: واااو شركة هولسيم مرة وحدة يا المسخوطة كيف درتي ليها......
انا: والله اختي علمي علمك.....
هيام : وشنو غتخدمي تما بالسلامة ....
انا: المستشارة ديال المدير العام للفرع لي غيحلو جديد فشي مدينة.......
هيام : يعني صافي مغانبقاش نشوفك ....
انا : مزال ممتاكدة واش غنخدم غير هنا ولا نسافر ....مي غالبا مغانبقاش هنا ....
هيام : (بصوت مخنوق) حشوما عليك لمن غتخليني
انا: اوا اصاحبتي راك عارفة الضروف ديالنا ....
هيام: (حطات يدها علا كتفي) اه اختي الله يكون في العون ....سيري احبيبة الله يسر ليك
انا: امين يارب والله يسر ليك تا نتي فشي بوكوس
هيام: امين من فمك للسما ......
كملنا طريقنا وصلنا للقيسارية هي خدات شنو بغات وانا تقضيت 3 داللبيسات مناسبين للخدمة وخديت سندالة وصاك بالكشايف حيت الفلوس لي تسلفت تسالا و ليا..........يتبع