حطموك يا قلبي

الجزء 8

تعصبت ووليت كلي كنترعد مبقيتش عارفة اش تنقول .......
حاول معايا يهديني ، حركني من كتافي ، مبغيتش نتكالما وزدت شعلت كنغوت ونعاير وندفع فيه جيهت الباب ، واحد اللحظة جات يدي علا الماطرييل ديالو دك شي قاسح ومضخم ، تقرصت و حيدت يدي فيساع، ناري علا فرشة تزنكت و ذبت من قوة الاحراج حنيت عيني في الأرض وجمدت في بلاصتي ؛ مكرهتش ندخل في حوايجي، هو استغل الموقف و شد لي في يدي جرني لجهة الكراسي .....جلسني وجلس تا هو. ...
خليل : شوفي انا جيت باش نعاونك ، عندي واحد الاقتراح إلا قبلتيه اتخرجي من هنا دبا ،
انا : مقادراش نجاوبو باقا تحت تأثير الصدمة ومكنرفعش فيه عيني ......
خليل: انا محتاج للزواج في هاد الوقت ، خاصني ندير ولادي ........إلا قبلتي تتزوجي بيا انا غنخلص هاد الشيكان ....
انا : (نضت وقفت) شنو كتخربق، نتا واقيلا حماقيتي
خليل: ( ببرود) بالعكس عمري كنت في عقلي بحال هاد النهار .......شرد بعينيه واحد المدة قبل ما ينطق بصوت حزين
خليل: انا خاصني نتزوج في اقرب وقت ونتي خاصك تخرجي منا
انا: ( قاطعتو بصوت حاد ) مستحيل نقبل هاد شي ....انا مكنبغيكش......
خليل : ( بقا فيه الحال) خاطرك...... انا قلتليك لي عندي ،قتارحت عليك صفقة مكنتيش تحلمي بيها، مبغيتيش بقاي تتعفني هنايا ، انا كنت بغيت غير نعاونك ......
انا : انا مامحتاجاش للمعاونة ديالك حيت انا اصلا بريءة......
خليل: (بحقد) قولي هاد الهدرة للقاضي ......
ناض ومشا في اتجاه الباب ، انا تفكرت بابا وشنو يقدر يطرأ فيه الا عرفني انا هنا ، بلا شعور نطقت
انا: انا موافقة ......
خليل : (دار عندي مبتاسم) كنت متأكد.....
وكمل طريقو خرج وسد الباب دازت شي 10 دقايق جا عندي العميد قالي نقدر نخرج دبا ، استغربت كيفاش بهاد السرعة لاكن فعلا الفلوس يديرو كلشي..... خرجت من الكوميسارية كنحس براسي تخلاقيت من جديد كنستنشق الهواء النقي بابتسامة واسعة ..... لقيت خليل كيستناني في طوموبيلتو، غير شفتو تفكرت الاتفاق لي بيناتنا وجمعت الضحكة ، صافي كحالت الدنيا في عينيا.......
ركبت معاه في اللوطو وديمارا بلا ميهدرني ، وصلني لدارنا في الاول استغربت كيفاش عرف العنوان إلا أني سرعان ما تفكرت اني عطيتهم العنوان في الشركة ......دورت وجهي كنشوف في الفراغ وعقلي مبلوكي ، محاساش براسي في هاد العالم ، وصلنا وقبل ما ننزل قالي خاصنا نهدرو ........عرفتو علاياش باغي يهدر تسمرت في بلاصتي ، وبدا كيهدر بكل برود وبلا ميشوف فيا ،
قالي غايجي في الليل يخطب غير بوحدو وغدا نديرو العقد ونمشي معاه لمراكش........مبغاش يدير العرس حتى انا عجبني الحال واخا عرفت راسي غنلقا مشاكل معا ماما ....
حتا كنت مشيت ونزلت من الطوموبيل ، جاو في بالي الشيكات وتوسوست ، رجعت لعندو وقفت عليه قبل ميديماري ، شافني ونزل من الطوموبيل تقابل معايا...
انا : ممكن نسولك
خليل: شنو كاين
اانا: بغيت نعرف شنو درتي في الشيكات.....
خليل : صافي خلصتهم ،
انا : وفين هما
رفع حجبانو وشاف فيا مستغرب ، بقا ساكت مدة قبل ميخرج دوك الشيكات من بزطامو ، طرت عليهم خديتهم منو فيساع تاكدت منهم وخشيتهم في الجيب تاع المونطو .......
طلعني ونزلني مصدوم من تصرفي ،
خليل: مواثقاش فيا ......
انا : (بسخرية ) وعلاش نتيق فيك ،
خليل: الله يهديك ، واش انا خرجتك من الحبس وباقا كتشكي فيا !!!!
انا: ( بترفع ) انا مظلومة ........
خليل: الصمت كيشوف فيا ونضراتو ممفهومينش، تخنقت وتوترت حسيت بيه بحالا ممتيقنيش، اكيد كيحساب ليه انا لي وقعت دوك الشيكات ، معرفتش علاش بديت نشرح ليه ونبرر ليه
انا : تيق فيا والله ما انا لي وقعتهم ، شي حد هز ليا دفتر الشيكات من دار وزور توقيعي .......
كنهدر بتاثر وكنشوف في وجهو كنترجاه بعينيا يتيقني ، واخا عارفاه مسموم وواخد عليا نضرة غلط ......
خليل: ( بابتسامة ) عارف .....والا مكنتش غانخرجك ......
انا : ( تصدمت ) كيفاش عارف!!!!! .....
تقابلو عينينا ، كانو عينيه كيلمعو ،
خليل : مبايناش فيك نصابة ......
الهدرة ديالو فرحاتني وريحاتني ، إثر فيا بزاف بالطريقة باش كان كيهدر والثقة لي دار فيا ، شفت فيه والدموع مجموعين في عينيا
انا : ( بصوت مخنوق ) عافاك وقف معايا ، خاصني نطعن فيهم ، باش نعرف شكون زور توقيعي ، ونثبت براءتي للكل...
بديت نبكي ونشهق ، مسح لي دموعي بحنان ، وشد وجهي بين يديه،
خليل: فدى نتي ما محتاجاش تثبتي براءتك ، انا متيقك وعارفك بريءة .....
انا: ( قاطعتو) ولاكن خفت من شي مشكل آخر.....عافاك يالا نمشيو نديكلاريو.......
خليل: لا بلاش، راه هدرت معا المدير دالبنكا قبيلة قلت ليه يلغي صلاحية ديال دفتر الشيكات ، غير تهناي مابقاش صالح دبا .....
انا: لاكن انا بغيت نعرف شكون دار فيا هاكا ، بغيتو ياخد الجزاء ديالو .....
خليل: ( بصرامة ) فدى صافي سدي هاد الموضوع، ومتخافيش انا معاك ومكاينش لي يقدر يقرب منك ، قرب مني وطبع قبلة خفيفة علا جبيني.......
خليل: سيري دبا تال بلاتي .......
سكتني ومخلا لي فين نزيد ناقش ، مبقيت فاهمة والو في هاد السيد ،اصلا مبقيتش فاهمة راسي ، علاش كنتبنج فاش كيقيسني وكنتاثر بكلامو ،
علاش كنحس بالامان وانا معاه وكنرتاح للهدرة ديالو ، واخا هو ما خلا مادار فيا ، واخا ضلمني بزاف ، واخا عذبني وذلني......كنت باقا كنتصارع معا مشاعري حتى فيقني صوتو ....
خليل : فدى سيري للدار ،ونساي عليك هاد شي ، متخافي من والو ......
ماجاوبتوش اكتفيت بابتسامة باهتة ،
استسلمت و مشيت في حالي والابتسامة علا وجهي حاسة براسي طايرة فالسما والهدرة ديالو ريحاتني واخا معرفتوش واش كيهدر من نيتو ..... مشيت للدار ودقيت في الباب بالجهد ، حلات ماما شافتني تصدمات بالفرحة بداو دموعها ينزلو وكتعنقني وتبوسني ، دخلت لقيت بابا ناعس حدا التلفزة خليتو مبغيتش نفيقو قاتلي ماما راه ما فراسو والو، عند بالو بايتة عند صاحبتي .....دخلت لبيتي دوشت ولبست بيجامتي، صليت كاع لي تجمع عليا من البارح ودرت صلاة الاستخارة علا حساب هاد العرض ديال خليل .....دخلات عليا ماما وفي عينيها أسئلة كثيرة ......جلسنا علا ناموسية وشداتلي يدي .....
ماما: بنتي ياك ما سي خليل هو لي عاونك....
انا: (متعجبة) شكون قالهاليك !!!!
ماما: جاهنا كيسول فيك وعاودت ليه كلشي ....
انا : (قاطعتها بصوت مبحوح) شنو عاودتي ليه ......
انا : علا شنو طرا ليك معا صفاء وسفيان، وعلا هاد المشكل ...
انا : (كنضرب في حنا كي ) اويلي شوهتيني علاش أماما واش حماقيتي .....
ماما: (بدأت كتبكي) سمحيلي ابنتي انا كنت مكوية عليك باغاك تخرجي باي طريقة ، هو وعدني انو غيعاونك وطلب مني نعاود لو علا حياتك وواش عندك شي إعداء ...
انا : كيفاش أعداء......
ماما : اه زعما بغا يعرف شكون من مصلاحتو يزور توقيعك......
انا: الله يهديك اماما .....ماكانش عليك تعاودي ليه أسراري......نتي عارفاني مكنبغيش ......
محملتش راسي وزدت كرهت هاد الزواج، هادا اكيد موراه شي قصة مالو تابعني شنو بغا مني وعلاش عرض عليا الزواج وختارني انا من دون كاع البنات ، جاوني أفكار فشكل ودماغي بدا يدي ويجيب ياك ما بغا يتزوج بيا حيت شفق عليا ، أو حيت لقا حالتي بحال حالتو حنا بجوج تعرضنا للخيانة من أقرب الناس لينا .......بلا منشعر فكرت بصوت مرتفع
انا: ولد الحرام داك شي علاش .....
ماما : (بقلق) مالو ابنتي اش دار ......ياك ما طلب منك شي حاجة خايبة في المقابل......
انا : (تزنكت) اش تتقولي اماما .....
ماما : راني خايفة عليك ابنتي نتي علا نيتك وهاد الدنيا عامرة بالذياب ......
انا : (حطيت يدي علا يديها كنطمانها بابتسامة) متخافيش عليا انا عارفة اش كندير ......
ماما : الله يكمل ليك بعقلك ابنتي .......
انا : ( بصوت متلعثم) ماما...... خليل بغا يجي يخطبني بلاتي ....... ماما : شنو هوا !!!! سي خليل بغا يخطبك !!!
انا : مالك تصدمت ،واش حاكراني لهاد الدرجة ......
ماما : لا ابنتي غير فاجاتيني......
انا : اوا راه هاد شي جا فيساع ، حنا برأسنا مكناش مخططين .....
ماما : ( كتعنقني) مبروك عليك ابنتي ، هادا اسعد خبر سمعتو في حياتي ......يويويو
بدأت تزغرت حتا فيقات بابا وعيط عليها .....
مشات عندو خبراتو فرح تا هو بدأ كيردد " الحمد لله ".......
دخلنا انا وماما للكوزينة وجدنا كاع الشهيوات لي كنعرفوهم ها المالح ها الحلو ......وصلات 6 مشيت دوشت ولبست قفطان في الأصفر مرصع بالاحجار كنت وجدتو لعرسي من سفيان .........سرحت شعري وجمعتو الفوق بعناية ، درت ماكياج صارخ نوعا ما واخا معنديش معاه ......ساليت تواجهت مع المراية عجبني راسي بزاف جيت بحال شي اميرة غزالة وكنحمق ، تزعت في راسي هههه......دخلات ماما قاتلي خليل وصل وكيسول فيا ......واخا كنت عارفة بلي هادا مجرد اتفاق وزواج مصلحة لاكن قلبي بدأ كيضرب وطلعات معايا تبوريشة ههه عايشة الدور حتى انا بحالي بحال اي عروسة .......مشيت نستقبلو بأن لي جالس في الصالون معا بابا فيساع نساجم معاه كيضحكو ويجمعو......لمحني واقفة في الباب ناض وقف تا هو ... فاجاني ولد الحرام ، تا هو لاعب الدور، لبس كوستيم في الكحل قاميجة في الغوز ، شعرو مقاد واللحية تا هي ، سالا معايا وزاد كملها هاز الورد في يديه وكيبتاسم لعندي ، انا تسمرت في بلاصتي جاو عيني فعينيه لي كانو كيبريو لمحت فيهم الفرحة ......قربت عندو مد ليا الورد خديتو عليه بابتسامة شكرتو ورحبت بيه بخجل ، تزنكت وحشمت من بابا ، درت السبة بالورد ومشيت كنقلب علا الفاز ، قاديتو و دخلت للكوزينة نعاون ماما، حطينا الشهيوات لي صايبنا كبرنا بيه زعما ، وحتا هو مخلا ما جاب ، ها الحلوى ها العصير ها الورد ها الكادويات ليا ولواليديا ، مكانش كيحساب لي مصواب لهاد الدرجة ومفهمتش شنو لي خلاه يتغير معايا في المعاملة 180 درجة .....جلست علا السداري مقابلة معاه كنهدرو ونجمعوا عادي بحال شي عايلة مرة مرة كتجي عيني فعينو كيضحك لعندي ....شعور زوين معمري حسيتو، حسيت اني ملكت دنيا وما فيها ونسيت بمرة الاتفاق لي كان بيناتنا ........معمري فرحت بحال هاد نهار حتى فاش كنت مخطوبة لسفيان محسيتش هاد الاحساس، كنحس بقلبي بحال ريشة خفيفة كيطير ويرفرف بالفرحة ....... خليل قدر يقنع والديا نتزوجو بلا عرس ولد اللدينة ، معرفت كيف دار ليها خصوصا اني اول واخر فرحة ليهم .....المهم تمناو لينا السعادة وباركولينا من قلبهم ، بعد ما تعشينا خليل بغا يمشي وصلتو للباب .....قالي غدا غيفوت عليا معا 8 دالصباح باش نمشيو نوجدو الوراق ديالنا علا حساب الكاغط خطف بوسة فشنايفي
وغمزني قبل ما يمشي ......هو مشا وانا بقيت كنقفقف طلعات معايا تبوريشة، تفكرت الضخامة ودك شي وعرفت اش كيستناني معاه خصوصا قالك بغا الولاد....... الصباح فقت معا 7 توضيت صليت ، خرجت فطرت معا واليديا وهما فرحانين بيا واخا الفرحة ديالهم
كانت ناقصة، مرة مرة كنلمح الدموع فعينين بابا عرفتو كيفكر في ختي لي من نهار هربات ماسمعنا خبارها ، الله واعلم فين تكون غاطسة ، معرفتش اينا قلب عندها لي يخليها تسمح في واليديها ومتسولش فيهم دبابا عاماين وزيادة ، اففف يا ربي كل ما فات الوقت كثر كلما زدت كرهتها ، تكون دبا عايشة حياتها وناشطة ، من ديما كتفكر غير في راسي وكدير لي بغات .......... نتابهت للصونيت في الباب عرفتو غيكون خليل ، مجيت فين نوض نحل عليه تا كانت ماما دخلاتو للصالة ، دخل مبتاسم وجلس فطر معانا تا هو ، مشينا صاوبنا الوراق بسرعة البرق ، بفضل النفوذ ديالو ، ما وصلات 3 دالعشية حتى كنا عقدنا ووليت مرتو علا سنة الله ورسوله ، مور ما تكاتبنا داني للقيسارية دالذهب شرالي خاتم وبراسلي وساعة وخلص مبلغ خيالي ، زعما تا هو كبر بيا وداير الواجب ، معرفتش علاش مكنتش فرحانة ،بالعكس خاطري تزير عليا ، حسيت بيه بحالا كيشريني بفلوسو، معجبنيش الحال ، انا ما محتاجاش للذهب والفلوس انا باغا الحب والاهتمام ، باغا لي يعوضني علا الحرمان لي عشتو في حياتي ، باغا لي ينسيني في العذاب والغدر ديال سفيان .............اهههه يا قلبي تفكرت سفيان ونهار لي جينا نشريو الخاتم قبل 4 سنوات ، واخا كان خاتم بسيط جدا حيت مكانش خدام ديك الساعة الا اني كنت طايرة بالفرحة ديك الساعة ، سافرت بافكاري وسرحت بعينيا تا كنسمع خليل كيهدر .....
خليل: ( وشاد لي فيدي) يالاه نمشيو ......
انا : اه واخا