حطموك يا قلبي

الجزء 7

وصلات 12 دالليل ودعنا الشريك وجلسنا انا وسي المدير الرأس في الراس .......
كان كيشوف بإعجاب وامتنان ، كاع الغرور والتكبر لي فيه مقدرش يمنع راسو من انو يشكرني ...
خليل : فدى عرفتي اش درتي هاد نهار ....
انا : (دايرة راسي مفاهمة والو) شنو درت ههههه ...
خليل: خليتينا نربحو صفقة بالملايين ....الصراحة مكنتش متوقع ولو 1% اننا نوقعو العقد هاد النهار ، حيت هادا الكليان صعيب تقنعو .......
انا : هانية درت غير الواجب .....
خليل : كيشوف فيا نضرات غريبة لأول مرة كنشوفهم نضرات حنان خجل وندم ........
جبد من بزطامو شيك مدو ليا شديتو عليه وقريتو كان مكتوب باسمي فيه جوج مليون اول حاجة فكرت فيها هما والديا غرغرو عينيا بالبكا من الفرحة وفيساع حبستهم .....سمعتو كيهدر
خليل : هاذا أقل ما كاتستاهلي....
انا: (بابتسامة) شكرا......ودرتو في الساك فيساع قبل ميتنادم معاه الحال هههههه...... محيدش عينو عليا كان كيتاملني وكيدقق في ملامحي بحالا كيشوفني لأول مرة ، حشمت ودورت وجهي كنشوف في حلبة الرقص لي كانت مكتضة بالشباب وهما كيستمتعو وكيرقصو
... معا اغاني غربية ، كنراقبهم وكنبتاسم غير باش نتجنب نضراته ، شوية بدلو الاغنية خدموا اغنية نانسي "انت ايه مش كفاية عليك تجرحني حرام عليك" بلا منشعر نطقت بصوت مرتفع
انا : (بعفوية ) ناري كنحماق علا هاد الاغنية....
ناض خليل من بلاصتو وقف ومد لي يديه وعينيه ضاحكين وانا طبعا مرفضتش طلبو، تاجهنا لحلبة الرقص حاوطني بذراعو، حاط يديه علا خصري وقربني لعندو انا حطيت يديا علا كتافو ورميت راسي علا صدره ، كنسمع دقات قلبو المتسارعة تتراقص علا أنغام الموسيقا (لو كان ده حب ياويلي منو لو كان ده ذنب متوب عنو لو كان نصيبي اعيش في جراح حعيش في جراح....).....غلباتني مشاعري و بداو ينزلو دموعي ، معرفتش واش دموع الشوق ل سفيان حيت هاد الاغنية كنا نسمعو ها بزاف انا واياه أو يمكن دموع الحنين لدارنا أو دموع الحسرة علا واقعي.......شافني خليل ..... وشد وجهي
بين يديه بكل حنان .....
خليل: مالك افدى......
نطق اسمي بطريقة عذبة حرك لي قلبي من بلاصتو وفتح لي كل جروحي ....زدت فيه طلقت العنان لدموعي وبديت نتخصص.........
هنا حسيت بيه تأثر بزاف ،يقدر يكون ندم علا هاد شي لي كيديرو معايا و يكون قلبو حن .....
خليل: (وكيمسح لي الدموع بكل حنان) صافي عافاك ما تبكيش.............منقدرش نشوف دموعك......
انا تصدمت تخرصت تشليت لا لا اكيد كنحلم ، اش هاد الحنان لي طاح عليه .....وقفت البكا ورفعت فيه عيني كنشوف فيه باستغراب.......وهو كيبتاسم عندي ، حتى وقف علينا واحد الشاب يكون في أواخر الثلاثين ملامحو زوينين و كان كيبتاسم ......
الشخص : (وحاط يدو علا كتف خليل) اهلا بسي روميو......
خليل: (دار بسرعة البرق بابتسامة واسعة) أمير!!!!!!......فينك اصاحبي غابر.....
بقاو كيتعانقو مدة قبل ميدور عندي خليل شدلي في يدي وبغا يعرفني عليه .....السيد غير شافني ملامحو تبدلو تقولو شاف شيطان......مديت لو يدي بكل ثقة ..
انا : بون سواغ مسيو أمير معاك فدى .....
فاش سمع سميتي زاد جعر خرج عينيه وعروقو برزو.......
أمير : ( بدهشة) نتي!!!!!!!.......وشدني من يدي معرفت فين جارني، انا كندور لعند خليل كنستنجد بيه بعينيا وكنترجاه يفكني منو ، سعا دك المصيبة ماعرفت اش طرا فيه ومنين جاب ديك القوة خرجني من الأوطيل وجرني لطموبيلتو كيحاول يركبني بقوة ،لحسن الحظ خليل وصل علينا خلصني من قبضته ودفعني بعيد ، وبدا كيضرب فيه بعنف طيحو في الأرض وكيركل فيه مبغاش يطلق منو حتا خفت يقتله ونصدقو فشي فضيحة، مشيت عندو كنجرو لعندي بزز ،كنبكي ونرغبو عاد باش قتانع وطلقو ،خلاه غارق في دماياتو......
خليل: مالك اصاحبي واش مشا ليك الفران ، المرة الماجية عرف اش كدير هادي رآها موضفة عندي في الشركة ....ومنسمح لحد يهينها، واخا يكون أعز اصحابي.....
أمير : هههه مكانش فخباري انك كتخدم القح.....عندك في الشركة ......
خليل: (حتا كان مشا رجع ليه ضربوا بركلة قوية للضهر) سد دك الفم ولا نهرسوليك ليك .....
أمير : هاديك رآها بروفيسيونيل في الدعارة واكبر محتالة في البلاد (كيشوف فيا باحتقار)......الا متيقتنيش سير للبيران في كيليز (حي راقي في مراكش) وسول علا " القح.....فدى " ........ انا كنسمع في هاد الهدرة وليت كلي كنرجف و قلبي غيخرج من بلاصتو بقوة مكيضرب....أما خليل باينة تصدم وقف جامد في بلاصتو ومبقاش كيضرب فيه ....
ناض امير من الارض بصعوبة خرج تيليفونو ومدو لخليل كيوريه شي حاجة ......وفي نفس الوقت كيشوف فيا وكيهددني...
امير: والله لا بقات فيك ، حقي غناخدو عاجلا أم آجلا..
مفهمتش اش كيخربق هدا ومعرفتش شنو شاف خليل فداك التيليفون وخلا لون وجهو يتبدل....... لاح التيليفون في الأرض قرب لعندي وملامحو ممحيين ، داني للطوموبيل ديالو بعنف .......حل الباب وقبل ميلوحني وصلو ميساج قراه وهو يضرب يدو مع سقف الطوموبيل .....شاف فيا باحتقار .....
خليل: دخلي فيساع .......
مفهمتش مالو وعلاش كيتصرف معايا هاكا ، جنني وعصبني، تنترت منو .....
انا : بعد مني واش كيحساب ليك انا لعبة بين يديك دير فيا ما بغيت ،صافي انا مغانمشيش معاك ....
خليل : ركبي باراكا من الفضايح القح.........
دفعني بعنف في الطوموبيل سد عليا الباب وركب تاهو كسيرا بالجهد ، كان زربان كيسوق بسرعة جنونية ، دورت وجهي كنشوف بعيد ، كنت مصدومة وموجوعة طريق كلها وانا كنفكر في داك الفلاش لي طرا لي معا صاحبو مفهمتش علاش تصرف معايا هاكا ، قليل الحيا كيفاش تجرا يقول عليا هاد الهدرة ، وهاد المرض تا هو فيساع تقلب عليا ورجع للعنف والقذف والسب وسط هاد الافكار مقدرتش نحبس دموعي لي بداو ينزلو بهدوء وصلنا للاوطيل انا نزلت وهو تحرك باللوطو معرفت فيه مشا !!!! بدا عقلي كيدي وكيجيب ....فين غيكون مشا فهاد الوقت ؟؟؟ ياك ما مشا يسكر ؟؟؟ لا لا كون بغا الشراب راه غير هنا في الاوطيل، يمكن رجع عند صاحبو !!!!..... وشوية تفكرت هاد نهار السبت وانا نفهم السيد مشا يدوز " samedi soir" .....افففف وانا مالي يمشي حتى لجهنم أن شاء الله ، دخلت للأوطيل كنجري ودموعي شلال ، دخلت في شحال من واحد في طريقي ومع ذالك ممسوقاش، كان همي الوحيد نوصل للبيت وننفارد براسي ......
دخلت لبيتي بدلت حوايجي تكيت في فراشي وانا ميتة بالنعاس واخا هاكا لي فيا ما هنا ني مقدرتش ننعس
بدأت الأحداث الأخيرة كدوز بين عينيا ، وعقلي خدام تفكرت نضرات خليل وحنانه تفكرت أمير وكلامه الجارح وتفكرت خليل واهاناته ليا وكيفاش تقلب ....بديت نبكي ونغوت بالجهد لربي لي خلقني ، جاتني حالة هستيرية كنضرب في وجهي وننتف شعري ، بقيت فديك الحالة مدة حتى نضت وقفت بدون سابق انذار ، حليت البلاكار وبديت نجمع حوايجي درتهم في الفاليزا وانا مقررة غدا نمشي نهرب ونبعد علا هاد الحقير ولي بغا يديرو يديرو ، صافي مبقيتش قادرة نصبر لهاد الذل وليت هنا جفاف لي جا يمسح فيا رجليه ، من غدا غنرجع عند واليديا نتحامى فيهم ....... رتاحيت نسبيا مور مخديت هاد القرار ،رجعت تكيت في بلاصتي ، غمضت عيني ونعست .... أصبحنا وأصبح الملك لله ، فيقني التيليفون كيصوني كانت ماما شفت الساعة لقيتها 8 دالصباح ، تخلعت و قلبي تقبط عليا ، خفت يكون بابا طرا فيه شي حاجة ، جاوبت فيساع ...
انا : الو ماما
ماما: فدى بنتي كيف دايرة ، لاباس عليك
انا : الحمد لله ، ماما ياك لاباس ، ياك ما بابا طرأت فيه شي حاجة. ...
ماما: لا ابنتي غا تهناي باباك بيخير وكيسلم عليك
أنا : (تنهدت )..... سلمي عليه تا نتي ، كلشي بيخير؟
ماما : بنتي والله ماعرفت منين نبدأ ليك ....
انا :ماما عافاك بلا متزيدي تخلعيني
ماما: البارح جاو هنا صحاب المخزن كيقلبو عليك قالك علا ود شي شيك سنيتي عليه......
بالصدمة جيت واقفة .....
انا : شنو !!!!إينا شيك ؟؟؟؟
ماما : هاد شي لي قالو ، جاو بغاو يديوك ابنتي ......
انا : (برجفة) ما يمكنش اكيد كاين شي غلط
ماما : عافاك ابنتي اجي هاد نهار ، باش تشوفي اش كاين راه خفت يخرجوليك علا خدمتك ......
انا : واخا اماما انا نشوف شنو ندير.....بسلامة دبا.....
قطعت معاها وانا مرفوعة تلفت و معرفت مندير ، اصلا مزال مستوعبتش الهضرة ديالها........كيفاش انا وقعت الشيك لشي حد انا اصلا من نهار فتحت الحساب في البنك وخرجو لي دفتر شيكات ، حطيتو في البلاكار و معمري جبدتو .....وسوس ليا الشيطان وجات في بالي واحد الفكرة .....ياك ما شي حد هزو ليا من دار !!!!بدأ قلبي كيضرب بالخلعة وهرب لي اللون من وجهي لا لا ما يمكنش .....بغيت نحيد الشك عاودت عيط علا ماما قلتها تشوف واش باقي في البلاكار ديالي فين خبيتو هادي عام والزيادة قلتها نقطع ونعاود وياريتني ماعاودت للأسف ماما اكدات لي الشكوك ديالي دفتر الشيكات مكاينش تما ، دارت بيا الارض وفقدت التوازن جلست علا طرف الناموسية وانا منهارة علا الآخر مقادراش نفكر جلست شحال كنحاول نتماسك .......نضت لبست عليا سروال دجين وتريكو صوفي درت مونطو سخون معا كان الجو بارد ،
هزيت فاليزتي ومشيت كنتسلت خايفة يشوفني داك المريض حيت عارفاه مغيخلينيش نمشي، عارفاه مسموم ومكيرحمش ، ملقيتش حل من غير اني نمشي نهرب ليه ......قدرت نخرج من الأوطيل بلا ما يحس بيا ولله الحمد مشيت لمحطة القطار قطعت لوجدة ودخلت شديت بلاصتي .......طريق كلها والتيليفون كيصوني كان هو خليل، مبغيتش نجاوبو بقا هكاك كيصوني، مبغاش يحبس وانا نطفي التيليفون وغمضت عيني ....كننعس ونفيق حيت كان صداع بزاف .....
وصلت لدارنا معا 8 دالليل لقيت بابا وماما كيتسناوني بالاحضان تعشينا جمعنا وضحكنا طبعا بابا ما فراسو والو وصاتني ماما في الاول منقولهاش ليه .....عندها الحق خبر بحال هادا يقدر يقتلو......مشيت ننعس عييت نتقلب يمينا ويسارا ونعصر في النعاس والو، عقلي مبغاش يحبس من التفكير وعينيا محلولين ؛ بقيت هكاك حتى صبح الحال ، نضت دوشت صليت وخرجت فطرت معا بابا وماما ،لقيت ماما مسكينة موجدة المسمن والحرشة علا ودي ..... الله شحال توحشت هاد الأجواء كون كنت في ضروف أخرى نكون دبا في قمة السعادة، شنو كيبغي بنادم كثر من حضن ودفىء العايلة......لاكن انا مكتوب عليا الهم والحزن طول حياتي ، انا ماشي من حقي نفرح ونعيش بحال الناس...... علاش يادنيا معاكسة معايا علاش ستخسرتي فيا الفرحة ........فيقاتني ماما من شرودي