دوزنا جوج سيمانات في دبي دازت من أفضل الأيام في حياتي ، درنا وتسارينا مخلينا بلاصة ما مشينا ليها .....من بعد مشينا اسبوع لمصر .....حتى هو داز من أفضل ما يكون ....حتى جا اليوم الموعود اليوم لي غنرجع فيه للمغرب وغتتقلب فيه حياتي من جديد ...
جمعنا حوايجنا وشدينا الطيارة مع العشرة دالصباح فايقة مخسرة معارفاش علاش .....شاداني الدوخة و خاطري مروعة ....موصلنا للمغرب حتى كنت غنسخف ، معا مفاطراش مكانش عندو منين يدوز ...... واخيرا وبعد طول انتضار وصلنا .....غير حطاتنا الطيارة .....ناض خليل وقف بكل حيوية مد لي يدو ونضت وقفت معاه وانا عيانة ومقاداش ، حاوطني بذراعو ، واتاجهنا نحو المخرج ....تحل الباب ، ضرب فيا الهواء البارد ورجعات فيا الروح ، بديت كنفيق شوية بشوية .....تنترت منو ، نزلت في الدروج كنجري كنستنشق الهواء العليل ......مشا خليل جاب حوايجنا جوج فاليزات قدهم قداش عامرين غير بالكادويات ...
انا : خليل فيا الجوع !!!
خليل : ههه علا سلامتك .....
انا : الله يسلمك ، ديني ناكل .....
جلسنا في مطعم قريب من المطار كان راقي بزاف .....طلبنا كل ما لذ وطاب .....كليت حتى ما قديت ، جاني الهيميري ... كناكل بحال إلا عمري شفت الماكلة ، خليل بقا غير حال فمو ، سالينا ومشينا ديريكت لدارنا في مراكش .....لقيت حبيبي موجد لي أفضل مفاجأة، شرا فيلا قريبة لدارهم ، وفرشها بأرقى وافخر الأثاث .....قالك ديك الدار مبقاتش تصلح لينا ....غير وصلت طلعت لبيتي ونعست مفقت إلا علا صوت التيليفون كانت عكوزتي كيعرضو علينا للعشا، مكان فيا ميمشي ، كنحس براسي عيانة ومدكدكة .... لاكن ملقيت مندير مجاتش نردها في وجههم وهما زعما مكبرين بينا .....فيقت خليل لي كان ناعس حدايا ، مجايب للدنيا خبار ....دوشنا ولبست غوب خفيف في الرمادي مع فولار تا هو في الرمادي .....كان الجو سخون .....خليل لبس شورت في البيج مع تريكو في الاخضر جاه كيحمق 😍 ... مشينا لدار العايلة ، رحبوا بينا ودوزنا نهار غزال الحاجة لي لفتاتلي الانتباه هي غياب عم خليل وزوجته ( الوالدين دجواد ) ، بغيت نسول عليهم لاكن حشمت ......واحد اللحظة كنا انا وسلوى في الجردة جالسين كتعاود ليا علا راجلها وقصة حبهم الأسطوري .....وانا نزعم ...سولتها ....
انا : فين مشاو عمك ومرتو
سلوى : مور ما دخل جواد الحبس ...جدة سخطات عليه ، بقا فيهم الحال وخرجو من دار ....
انا : بصاح !!! مشاو عند سهام ؟
سلوى : ههه اشمن سهام ، هاديك نكارة الخير بحالها بحال ختها .... مور مكتب ليها جواد كل املاكو ، طلقات منو غيابيا وتزوجات بواحد البرهوش ، دبا رآها حاملة .....
انا : ( شهقت من الصدمة ) مسكين .
سلوى : بقا فيك !!!....انا بعد عجباتني فيه يستاهل ...
انا : احقا بشحال باش حكموا عليه .....
سلوى : 5 سنين هو والشريك ديالو ....
انا : ( بصدمة ) سليم !!!
سلوى : اه لي كان خدام معاكم في الشركة .....
قاطعاتنا الجدة كتعيط لينا نمشيو نتعشاو .....مع الدخلة للصالة ضرباتني ريحة الماكلة وطلعات معايا التقية ، ما عرفت كاع مالي هاد نهار ، كانت الطبلة عامرة بكل ما لذ وطاب من الأكل المغربي ،....جلسنا وبديت نبزز علا راسي الماكلة ، والترويعة غير مكتزيد .....عييت نحبسها لاكن مقدرتش نقاوم مشيت للطواليت ورديت كلشي ، عاد ارتاحيت .... تفكرت نفس الأعراض وقعولي ديك المرة يكون زعما داك الهرمون رجع تخربق ليا ، خصوصا ان العادة الشهرية تخربقات من جديد ، معطلة عليا بكثر من سيمانة .....غسلت وجهي و رجعت جلست معاهم حاولت ما نبين والو ، وعقلي كيدي ويجيب ،سالينا العشا ورجعنا لدارنا ، خليل شافني عيانة هزني وطلعني لبيتي حطني علا الناموسية ، وطحت كومة نعست بحوايجي ...
في الصباح فقت ملقيتش خليل حدايا ، لقيتو حاط لي ورقة حدا راسي " حبيبة انا في الخدمة " .... نضت بدلت حوايجي و بغيت نمشي نتوضى باش نصلي .... شداتني الدوخة وطلعات معايا الترويعة من جديد ، دخلت للدوش ، كنحاول نتقيا والو ، كرشي خاوية ..... صافي تنويت وقررت ندير التيست ولي بغا يكون يكون ....مشيت كنجري للفارماسيان جبت ديك التخربيقة ودخلت للدوش ، درت التيست ..... قلبي كيضرب من قوة الخلعة ....ورجليا فشلانين، طلعات النتيجة .....تصدمت تخرست ودهشرت .....لا لا ما يمكنش !!! اكيد كاين شي غلط ، عاودت واحد آخر ...... نفس النتيجة ....طلعو لي جوج شراطي ، يعني بوزيتيف ، يعني انا حاملة !!....انا حاملة !! .....من قوة الفرحة بديت كنبكي ونضحك ونقز بحال شي حمقة .....كنردد انا حاملة !!! غير بوحدي ......أول حاجة درتها توضيت وصليت شكرت الله وحمدتو .... عيطت علا ماما فرحتها وبكيتها ........من بعد بديت نفكر فشي طريقة نخبر بها خليل ......قررت ندير ليه مفاجأة، وجدت الكوتي ولبست غوب مثيرة .... درت مكياج هادىء ، أجواء رومانسية ....ووجدت ليه كادو .....دخل حبيبي مع 7 دالعشية ، استقبلتو في الباب ، عنقتو وبستو بحرارة ، السيد تصدم من حالتي وحالة الدار .... مفهم والو مسكين ههه ....بعد ما طلع لبيتو دوش وبدل حوايجو ورجع نزل عندي كلينا ضحكنا ، من بعد جلسنا كنتفرجو في فيلم ، كنا جالسين علا الفوتاي متكية راسي علا كتفو وهو محاوطني بذراعو .....جبدت بواطة صغيرة في الاحمر علا شكل قلب ، ومديتها ليه ....
انا : حبيبي نتا ديما مغرقني في الهدايا .....كنتمنى تقبل مني هاد الهدية البسيطة .
شدها عليا وهو متفاجا ...
خليل : شنو هاد الشي ....
انا : حلها وشوف .....
حلها ولقاها خاوية فيها غير ورقة مكتوب فيها " حبيبي كنهديك احلا واغلا هدية ، لاكن مغتقدر تتسلمها حتى تفوت 9 شهور " .....بقا شحال مستغرب قبل ما يستوعب ويفهم ..... شاف فيا وعينيه عامرين بالدموع ....كيستفسر بل كيترجى يكون شكو في محلو ....شديت يديه وحطيتها علا كرشي .....
انا : الهدية رآها هنا ......
مقدرش مزال يتحكم في راسو ، انفاجر بالبكا ، تلاح عليا عنقني ....كيبكي ويشهق بحال شي دري صغري ، وهو كيردد الحمد لله .....عمري شفتو فديك الحالة ، مكانش كيحساب غيتاثر و يفرح كاع هاكا ، مسكين كان صابر معايا ....عنقتو بقوة كنضحكوا ونبكيو ....الحماق وصافي .....
خليل ولا مفششني فوق القياس مبقيتش كنتحرك من بلاصتي ... مقلناهاش لدارهم ... فضلنا اننا نتكتمو علا الأمر حتى ندير الراديو ديال الطبيب ونتاكد ، فات اسبوع مشينا للطبيب وأكد لينا الخبر، انا حاملة في 5 دالسيمانات ..... مور ما تاكدنا نشرنا الخبر ، كلشي فرحان لينا ، وخصوصا الجدة بغات طير بالفرحة ،دازت 9 شهور دالحمل ، بحلوها ومرها ..... وجا النهار الموعود..كنغوت ونعض...ما وصلني خليل للكلينك..حتى كنت غنموت بالحريق ..مسكين مخليت مدرت فيه .....بردت فيه كاع جنوني .....هههه قمشتو وعضيتو .....
واخيرا جا ولي العهد "سي اياد الفيلالي "لي كان نسخة مصغرة على باباه ....جا " خليلو الصغيور " نور حياتنا..كان هو ضو عينين باباه..كان هو لي كيهتم بيه يبدل ليه يسهر معاه..كتر مني انا..صراحة كان مهنيني ههه
حياتنا..كلها سعادة..ولدنا كيكبر قدامنا..وسط عائلتو لي كيبغيوه ويموتو عليه...مننكرش انه كتصادفنا شي مشاكل بحال كاع الناس..لكن كنتجاوزوها ..بكل حب وود وعاطفة .....دازت عامين تزادو عندنا توأم بنات نهار عرفت راسي عندي توأم بكيت وتأثرت تفكرت ختي صفاء والمعاناة ديالها ....سميت بناتي لارا و يارا.....وقررت نربيهم احسن تربية .....حاولنا انا وباباهم منفرقوش بيناتهم ونتعاملو معاهم بكل حب وود وداك الشي لي كان ، ولادنا كبرو قدام عينينا في جو يملؤه الحب والحنان وخصوصا العدل والمساواة!
النه--------------------ا ي---------ة
أنت تقرأ
حطموك يا قلبي
Romanceغمضت عيني و بقيت كنستنا غير فوقاش يبوسني كنحس بيه كيقرب ليا و كنشم رائحة أنفاسه باسني في جبهتي بلطف نزل لنيفي عضو بشوية قبل ميحط فمو علا فمي بدأ كيلتاهم لساني ويعض شفتاي برغبة جارفة و انا عاجبني الحال خليتو يدير ما بغا بل تجاوبت معاه ، زاد تجرا عليا...
