حبيبتي ... هل انا حقا حبيبته

الحلقة 8

== تاني يوم في الشغل ، ندى جاية مجهزة هجوم ع اميرة ، أميرة ناعية هم الواد المجنون ، انجي عندها اخبار حلوة تقولها للبنات ، وكله مستني البريك ===

ع مكتب ندى .. وليد جه بعد غياب اسبوع ..
ندى : ايه يا كابتن ؟ جاي تعمل ايه هنا ؟
وليد فهم انها بتلقح : اه ..معلش دي غلطتي !! بس ماما كانت تعبانة وسافرت برة مصر تتعالج ، وصحتها مستقرة
ندى (ده اول مرة اسمع عذر كده ،، انا سمعت قد ايه ان حد جالي امه تعبانة وبتاع ، لكن سافرو برة مصر عشان تتعالج جديدة ، قررت انها تصدقة .. تعمل ايه المسكينة ، لو قالها ان الوردة بتبيض هتصدق .. هو كده كلامه كله صدق وثقة ، ولا يمكن يقول حاجة الا ما تقع في القلب محل الصدق .. )
ندى : ماشي بس متعملهاش تاني ..او ابقى اتصل قول عذرك ..
وليد : حاضر .. وبعتذر اني سبتك الفترة دي كلها تعملي الشغل لوحدك .. وقام مطلع كيس ، فيه عطر ماركة .. وريحته فاحت في المكان كله من غير حتى ما يرش رشه : دي هدية تعبيرا عن اسفي واعتذاري .. اقبلي اعتذاري و اوعدك هكون موظف عند حسن ظنك ..
ندى الغلبانة ، لو تعرف ان لا امه تعبانة ولا سافر بره مصر ولا بتاع .. وانه بس كسل ينزل الشغل ..والنهاردة قرر ينزل بس عشان زهق من القعدة في البيت .. .. بس ندى عقلها صدقه ، و زاغت في عينيها الهدية ، هو عارف كويس ازاي يتعامل مع الناس ,, وازاي يطلع كسبان كل الوقت ..
وفجأة عدت انجي قدامهم .. قلبه بدأ يدق بسرعة ..وتنح جامد ..ومصدقش انها جات تقف قدامه هو وندى ..وبلع ريقه بسرعه ، هو مش من النوع الي بينجب كده لحد من اول مرة ، بس كان في حاجة في هالة انجي .. تشد ، تجذب .. حاجة مشعة كده ، كريبتونيات .. زي ما كان نقطة ضعف سوبرمان ..هي بقت في ثانية نقطة ضعفه ..
انجي بصتله وسلمت عليه ذوقيا . عشان كان واقف مع ندى .. ودانه احمرت واتلبخ ومعرفش يعمل ايه ..
المهم سمع انجي بتكلم ندى : متتأخريش في البريك عندي كلام مهم عاوزة اقوله ليكي
ندى : وانا كمان .. هي اميرة هتبقى موجودة ؟
انجي : طبعا .. مش صحبتنا
ندى : مممممم ..طيب
انجي : ليه في ايه ؟؟
ندى : هقولك بس متقوليش لحد .. وبصت لوليد الي كان مركز جامد في الحوار ، وليد فهم انه لازم يتحرك .. المهم الواد اتحرك شوية بس بقى ع مسافة ان انجي تبقى في مرمى البصر
انجي : ايه قلقتيني ؟؟ خير !!
ندى : عاوزة ابعد عن اميرة ، والاقي اي سبب ، وخلاص اننا نتخاصم ..
انجي : ليه يا بنتي ؟؟ دي كويسة!
ندى : قالك !! دي بتلعب تحت الطرابيزة !! دي بوشين !!
انجي : تؤتؤتؤ ..ايه اصله الكلام ده يا بنتي ..احنا صحاب ..
ندى : هقولك ع سر بس مش تقولي لحد ..
انجي : هقول لمين يعني !!
ندى : يا غلبي !! انا بكرهه اوووي الجملة دي ، ما تقولي بثقة كده يا اه يا لأ .. مش لازم شرط ، يعني لو في حد هتقولي مثلا ..!
انجي : خلاص خلاص ..مش هقول لأميرة ..
ندى : تمام .. أميرة وسامي صحاب من زمان .وانتي عارفة ده ..
انجي : ايه المشكلة ؟
ندى : لسه بيكلمو بعض !! .. وانا بقى في فار بيلعب جوايا ..
انجي :يااااااااه اخيرا بداتي تغيري ع سامي !
ندى : انتي كمان هتقولي كده !!؟؟
انجي : مين قال كده تاني .
ندى : المفعوص خطيبي !! قال نفس الكلمة يا اختي ..و لولا اني كنت ماسكة اعصابي كنت اتهورت ..
انجي : يا مجنونة .. بس دي أميرة يا بنتي ..وبعدين هو شاريكي انتي .. انتي لسه جاية تشكي فيه دلوقت !
ندى : المهم انا مش طايقة اميرة دي دلوقت .. وكمان يا اختي بيتكلمو وبيحكو مشاكلهم لبعض ..وانا نايمة ع وداني
انجي :طب عرفتي منين انهم بيحكو لبعض ؟
ندى : هو الي قال يا اختي ..وقع بلسانه..
انجي : يبقى قلبه ابيض اهو ..ومفيش حاجة بيخبيها .. واغزي الشيطان يا بنتي .. والي في دماغك مش صح ، سامي محترم وأميرة محترمة كمان ..
ندى : اصلك متعرفيش !!
انجي : ايه يا اختي ؟
ندى : اميرة شاكة ان عينها ع سامي .. و هتنخوريلي في الجوازة .. وبعدين ليه فضلو صحاب لحد دلوقت بعد ما اتخطبنا
انجي : طب ما انتي لسه صاحبتها بردو ..
ندى : لا انا بنت .. عادي يعني .. وبعدين تغور الصحوبية دي ..مش عوزاها ..!! اذا هتدملي عشي
انجي : لو انتي واثقة في نفسك ..مكنتيش تفكري كده .. واهتمي بعلاقتك مع خطيبك اكتر ما انتي مهتمة بمين هينخور ومين هيبوظ ..والا تفسديها ع روحك ..
ندى : ماشي يا ست الواعظة .. ..ايه بقى عوزانا عاجل ليه ؟!!
هقولكو في البريك ..