حبيبتي ... هل انا حقا حبيبته

الحلقة 7

انجي بتكمل كلام مع والدها ..
انجي : تفتكر يا بابا ؟؟ تفتكر ان كل البنات بتتوتر ..
الاب ضحك ضحكة فحمة : هاهاها ..طبعا ..يا بنتي دي والدتك ، جات قبل الفرح بشهر ،قعدت تقول انا خايفة .. و خلاص مش عاوزة اتجوز ..وكانت حاسة ان الجواز غلط .. وكانت متوترة خالص ..لدرجة افتكرنا ان في حد عامل لها عمل .. كانت رفضاني خالص .. بس اكتشفنا انها متوترة اوي .. ومرتبطة بأهلها اوي ، لدرجة انها كانت خايفة تسيبهم ، ودينها لدكتور نفساني .. وهدأت ..واهو اتجوزنا ..وفارقت الكل ، اهلها وجوزها وبنتها ..
انجي لمحت دمعة في عين والدها .. اصله بيحب والدتها جامد ..وعارف انه ملحقش خالص يشبع منها ابدا وانها سبته للهم بدري بدري ..
انجي : ربنا يخليك ليا يا بابا .. هروح اعمل الشاي هوا ..
انجي ردت فيها الروح .. بعد ما سمعت الكلمتين دول ..يمكن تكون زي مامتها ..قلقانة عالفاضي .. و خايفة بالضبط زي مامتها ،مش بيقولوا العرق دساس .. ورثت دي عن مامتها ..انها قبل الموضوع ما يبقى جد خافت فعلا ..وبدأت تطلع اي اسباب وهمية تقنع نفسها بأي سبب يقلقها وخلاص ..
وهي بتسخن الماية ، كلمت أنيس تاني ، وصوتها فرحان اوي .وقالت له : ميعادك الخميس مع بابا .. هنا في البيت
انيس : يااااااااااااااه ..الخميس ده فاضله يومين ..بس تحسي فجأة انه بقى بعيد ..
انجي ضحكت
أنيس : ياااه اخيرا ضحكتي ، الي يسمع صوتك من ساعتين يقول عندك عزاء ..
انجي : كنت قلقانة بس لما كلمت بابا ..اطمنت ..
أنيس : الحمدلله ..
انجي : مبرووووو اوه اوه اوه ..
أنيس : ايه ؟
انجي : الشاي فار ..
أنيس : ههههههههههههه ، خير خير .. اشوفك الخميس بقى يا عروستي ..
انجي ابتسمت في خجل .. ان شاء الله ...



========================= ندى في البيت =========================
ندى دماغها بيودي ويجيب ..تنفصل عن سامي !! هي محتاجة فعلا تبعد عنه جامد ، وتبعدعن جو الضغط والخناقات ده ، وعن مشاكل سامي .. بس لو بعدت عنه ..خايفة حد يجي مكانها ..وتشتمت فيه الاعادي .. والكيادين ..لا وألف لا .. هتستحمل .. هتيجي ع نفسها شوية .. وسامي شاريها يعني ، هي مش رامية نفسها عليه .. وبعدين هي بردو بتحبه ..والا مكنتش فضلت الفترة دي معاه ..هي كمان بتحترمه وشيفاه راجل يملأ العين ..
اينعم سامي شخصية عادية ..مفيهوش حاجة مميزة ، وتفكيره شوية كلاسيكي !! ...وهو لما بيتخانق معايا يبتخانق عشان عاوز مصلحتي .. عارف انه رجلي من قبل ما يجمعنا بيت واحد ..ساعات بتخنق من الحتة دي ، بس بقول اهو بيديني بروفة قبل حتى ما ندخل العش سوا .. مين يعني بيته مفيهوش خناقات وبتاع ، ده حتى مصارين البطن بتتعارك ..بس بيرجعوا سوا .. ويتصالحو ..ولسه نفسها بتدى من ناحيته ..لقت تلفونها بيرن ..وطلعت ع الشاشة "حبيبي "

اسم موجود تحت عنوان الشخص الي اخترته يبقى نصك التاني ..كل المرتبطين بيحبو يديو النيك نيم ده لأحبائهم ..وهو كمان كان مسجل اسمها "حبيبتي" .. وجمبها قلبين ..
حاولت تلعب انها تقلانة واستنت شوية التليفون يرن رنتين كمان ، وبعدين ردت بكل تأفف قال لسه مضايقة : الو ..يا نعم
سامي بكل كواتة (هي شيفاها كده ، طبعا السناجل بيشوفها سماجة ) : لسه القمر زعلان ؟
ندى : مممممم .. ع حسب هتقول ايه دلوقت ..
سامي :انا عاوزك بس تصفي من ناحيتي ..انا مش عارف والله عملت ايه ؟ بس مش عاوزك تفضلي زعلانة مني
ندى قعدت تفكر هي كانت زعلانة منه ؟؟ امتى ده ؟؟ بس قالت يلا تسوق فيها طالما هتسمع كلمتين دلع : ايوة ايوة كل مرة تزعلني وفي الاخر بكلمتين حلوين تضحك عليا
سامي : لا مش المرة دي ..اطلعي كده بصي من الشباك تحت بيتك ..
ندى فتحت الستارة ، لقيته واقف تحت الشباك ..ومعاه بوكيه ورد ، وبيقولها انزلي
ندى انصدمت من الحركة !! ايه الرومنسيات دي !!؟؟ وقالت لمامتها ، ان سامي مستني تحت ..امها ضحكت ضحك الامهات الخبيث ده ..ومن جواها بتقول : شوف الولاد وفرحانة ومزقططة
ندى دخلت الاوضة لبست الفستان الملون ، وعدلت الطرحة ، وحطت ميك اب خفيف ..ونزل جري ،، وقبل ما تطلع من باب العمارة وقفت شوية ، تاخد نفسها ..عشان ميبنش انها كانت بتجري ، وتضبط وشها كده عشان ميبنش انها كانت بتجري ..

ولما طلعت من بواية العمارة لقيته في استقبالها بابتسامة واسعة اوووي .. و ع رجل واحدة وبيقولها صافي يا لبن ؟
قامت ندى بكل كسوف : حليب يا قشطة ..
وادها الورد .. واخدته
سامي بص لمامتها واستأذنها انه يأخد بنتها لفة شوية ..يشموا هوا
الام سمحت لهم .. وابتسامة خفيفة

ندى : بس ايه الحركات دي ..!؟ مكنتش اعرف انك رومانسيكي كده
سامي قال الجملة دي ، بكل براءة ومش في نيته اي حاجة و مكنش يعرف ان الجملة دي مش هينفع يصالحها فيها بجنينة ورد حتى : اه .. دي فكرة أميرة .. قولتلها اصالحك ازاي ، واقترحت اجبلك ورد ..كنت محتاس اصالحك ازاي

كل حاجة وقفت للحظة !! مشيتهم ..!! هوا تنفسهم ..!! وكل الي اتحرك الشرار من عين ندى ، ووضمت بوزها ع بعض ، في عصبية ، لولا اننا في الوقع مش فيلم خيالي ، كان زمانها بقت الرجل الاخضر "هالك" و عصرته تحت رجلها !!
ندى حبت تتأكد انها سمعت صح : ها؟ اميرة ؟!
سامي حس انه عك ..بس خلاص بقى وقت الندم فات : آآآآ .. أه ..
ندى بطراطيف صوابعها ع قورتها وكانت باينة انها حركة عصبية : انت قلت لأميرة اننا متخانقين ؟؟

اكره حاجة عن البنت ، ان اي حاجة غير سعادتها مع خطيبها توصل لحد ، وخصوصا لو كانت اميرة ، الي هي طول النهار قدامها عمالة تتجمل في سعادتها مع سامي ، وحبهم الخيالي .. وصورتها قدام البنت ، وزمانها اميرة لما بتسمع كده من جواها بتقول يا كدابة !! ومنظرها الزبالة ..

سامي بلع ريقه في خوف ..دول لسه متصالحين :يعني مقلتش كل حاجة ، انا بس كنت عاوز اعرف انتي مش بتردي عليا ليه ؟؟ ..ما انتي الغلطانة ..لو كنتي رديتي عليا مكنتش رحت كلمتها

ودي تاني غلطة وقع فيها سامي من غير ما يحس !! اوعى تقول لبنت والبنت دي خطيبتك ..انها غلطانة .. وان صحبتها او اي بنت تانية ، هي الصح ، وانها كانت موجودة وقت ما انتي مكنتيش موجودة .. ده انت لو بتحبها حب نابليون لجوزيفين ..مش هتصدق انك والبنت دي مش بينكو اي علاقة من اي نوع ..او ان حبك لسه متغيرش ناحيتها .. اوعى تقف في صف اي بنت تانية غير حبيبتك !! ..

ندى قعدت تهز رأسها وتعض ع شفايفها ، وقبضة يديها بتقفل جامد ..زي ما يكون مستعدة تديلة بوكس في وشه ..

ندى : خير خير .. بس مش احنا اتفقنا اننا هنقطع علاقتنا بأصحابك البنات ..
سامي : ايه ده ؟؟ انتي هتغيري عليا ؟؟ من أميرة !! يا بنتي لو كنت عاوز ابصلها ما كانت قدامي سنين .. انتي الي في القلب

هو مفكر نفسه روش كده و غير طريقة الكلام و دفة الحوار بس ..هأأأووو .. دي تالت غلطة يقع فيها سامي اوعى تفكر نفسك بتثبت بنت لما تقولها .. انها كانت قدامي ومعبرتهاش ..وعبرتك انتي !! انت كده بتقلل من ثقة البنت في نفسها ومن حبها ..وبتحطها في مقارنة مع بنت تانية .. والمفروض ده ميحصلش
هو تقريبا سامي كده .. هيشوف وحش اخضر .. "الغيرة" عمره ما شافه من ندى ..بس ده تهديد !! أميرة ،، وصحبتها .

ندى : أنا ..أغير من امتى ؟!! لا يا عمرو .. مش انا الي تغيير ( طريقة البنت بقت تبقى سوقية ، اعرف علطول انك لو مشتش من قدامها دلوقت هتولع فيك ..او تدبحك وتحطك في اكياس بلاستيك ..ومش بعيد تطبخك وتتعشى بيك ) ..بس هعدي الموضوع ده بمزاجي .. عشان عارفة انكو صحاب من زمان

دلوقتي في اللحظة دي .. ندى واميرة مش صحاب ... هو وأميرة صحاب .. كده اسهل ع ندى انها تهاجم أميرة من غير رحمة ..

،