حبيبتي ... هل انا حقا حبيبته

الحلقة 9

==== يوم المقابلة .. عريس الليسانس =====
أنيس وصل في الموعد واول ما خبط ع الباب .. طلعله خادم ببدلة انضف من الي هو لابسها (ده تفكيره ، البني ادم دايما بيحي يحط نفسه أقل من الي هو فيه ) هو عارف كويس ان مستوى انجي اعلى شويتين كبار من مستواه .. بس هو لاطمعان لا في مال ، ولا جاه .. هو جاي عشان انجي و بس ..
اول ما دخل ، الخادم سأله اسمه ، وسبب الزيارة ..
قاله : أنيس ، في ميعاد مسبق ، عشان اطلب ايد الانسة انجي .
الخادم هز رأسه .. وقاله استنى شوية وقعده في مكان .. يقدر يتفرج فيه ع البيت .. هو فكر انه بيت عادي من برة ، بس لما دخل ، البيت كبييير اشبه بفيلا ..و قعد يتأمل في المعروضات و السجاد .. هو كان عارف ان انجي مستواها المادي عالي .. بس مجاش في باله .. ان ده هو مستواها .. الخوف دب في قلبه .. وحس ان فرصه بتقل .. بس هو اعتمد انه بيحبها .. لولا انه شك في اللحظة الي هو قعد فيها .. ان انجي صيدة و فرخة بتبيض دهب ..وياريت الفرصة دي مش تضيع .. هز رأسه وقال ..لأ لأأ .. انا مش مادي .. وقطع افكارة الخادم تاني و يقوله .. حضرته مستنيك في المكتب

الحاجات دي كان بيشوفها في الافلام الابيض واسود .. اول مرة يتاعيش .. توقع هيدخل يلاقي راجل بكرش و طربوش و مدلدل من جيب الجاكيته ، ساعة بكاتينه .. اهو زي الافلام القديمة

خبط ع الباب ، سمع صوت ضخم بيقول : اتفضل يا ابني
الراجل له هيبة ..بردو و يخض .. لجلج في مكانه .. لحد ما شاور له ع كرسي وقاله .. اقعد يا ابني
انيس : شكرا ..
الاب : ايه الحكاية ؟ عندك كام سنة ؟
انيس : 27 سنة ..
الاب : سن الشباب و الفروسية والتطلع لمستقبل عظيم ؟ بتركب خيل ؟
انيس : لأ
الاب : بتلعب الشيش ؟
انيس ميعرفش ايه ده ، بس طالما ميعرفهوش يبقى مبيلعبوهش : لأ
الاب : كم متر تقدر تسبحه في الدقيقة ؟
انيس ، هو عاوز شاب يدخله الاولمبياد ولا يتجوز بنته : انا مش بعرف أسبح او اعوم يعني ..
الاب :ما شاء الله .. انت شاب مستقيم .. معتكف ع الدراسة والعمل ..، شئ عظيم .. ده سن المسؤلية و الاحساس بالواجب و الرجولة .. أكيد لك أم ؟
انيس : طبعا ..
الاب : واخوات ..؟
أنيس : 4 اصغر مني ..
الاب : انا كمان كنت اكبر اخواتي ، وكنت بصرف عليهم ..هي دي الرجولة ..ان الانسان يكون كبير في السن والمقام .. يصرف ع امه و اخواته واقاربه الفقراء لو بامكانه ..ده عظيم .. بتقول عندك ام ؟ لسه عايشة ؟
انيس : اه موجودة ..
الاب : انت محظوظ يا ابني .. انا امي ماتت .. هل عندك اب ؟
انيس : مات .
الاب : يبقى انت الي بتصرف ع امك و اخواتك .. دي رجولة يستحق ان الانسان يضحي عشانها ..واكتر الناس تضحية هم اعظم الناس ..طبعا انا سمعت انك موظف .. في السن الصغيرة دي ..شئ عظيم .. كام تكسب في الشهر .
انيس : حوالي 1500 جنيه ..
الاب : ايه ؟؟ 1500 جنيه ..مش بتكسب من حتة تانية ؟ المرتب ده يكفي شاب يروح السينما مرتين في الاسبوع و علبة سجاير كل يوم ..
انيس : ما انا بدور ع شغل ..
الاب :شغل ؟ مش بتقول موظف ؟
انيس: بعد الظهر يعني ..
الاب : انت مجنون ؟؟ انت متصور اني ممكن ادي بنتي لواحد زيك ؟ انت متنفعش خالص .. خالص .
انيس : منفعش لأيه ؟ و ليه ؟
الاب : وبتسأليني ليه ؟؟ قولي انت ليه عاوز تجوز بنتي بسرعة ؟ انت لسه صغير ، وفلوسك اصغر منك ..وبعدين اخترت بنتي بالذات ليه ؟؟ فاكر عشان مشغول في شغلي ، مش بفكر في بنتي و اسرتي ؟؟
انيس : .........
الاب :مقولتليش ايه الدافع ؟ مفهمتش .؟
انيس : والله الحب مفيش غيره ..
الاب : ايه .. الحب .. مفيش حاجة اسمها حب .. ده كلام فارغ ؟؟ و اوهام شباب مفلسين ..
انيس : بس هي وافقت تجوزني ..
الاب : مين دي ؟؟ وانا هنا طرطور ؟؟ انت فاكر ان مليش كلمة ع بنتي ؟ اكيد قالتلك انها راحت السينما من ورايا كام مرة رغم اني اعترضت .. يمكن فكرت الدنيا تمشي كده .. .. لا !! انا رجل جاد واوامري صارمة .. .متحاوليش تقلبني ع بنتي !! مقولتش شهادتك ايه ؟
انيس : الليسانس ..
الاب : وليه مشتغلتش محامي بدل التدريس .. العمل المتعب ده الي فلوسه قليلة .
انيس : الليسانس الي معايا ، ليسانس اداب ..مش حقوق ,,
الاب : وبتدرس الطلبة ايه ؟
انيس : الفلسفةو المنطق والاخلاق ، وعلم النفس .
الاب: بتدرسها لمين .؟
انيس : لطلبة الثانوي ..
الاب : وبتقول ايه الفلسفة دي !!
انيس : الفلسفة دي محبة الحكمة ؟
الاب : محبة اايه ؟؟
انيس : الحكمة ؟؟
الاب : ايه الحكمة دي ؟
انيس : يعني الكمال في كل حاجة ..
الاب : يعني ايه ؟
انيس :يعني بنتعمق في كل حاجة ,, ونشوف العلل الي جوة كل حاجة ..مش مجرد الي الناس شيفاه بعيونها ,,
الاب ..هو كل حاجة عنك حب .. حب بنتي ، حب الحكمة ..طب الحااجات الي بتشوفها دي ؟ ..بتشوفها بايه .؟؟ نظرك كام ؟
انيس : عيني الشمال 6 على 18 ..و اليمين اضعف سنة ..
الاب : ماشاء الله وبتقول بتشوف الي الناس مش بتشوفه ؟؟ هي دي الفلسفة !! ..
انيس : الي اقصده اننا بنشوفها بعقولنا ..ممكن اضرب امثله ..
الاب : لالالا .. كفاية انت اكبر مثال .. ضحكت ع بنتي بالافكار دي ؟؟ .. مين الي شار عليك تدرس فلسفة ؟
انيس : انا ..
الاب :يعني الفلسة تقولك تعمل الي في دماغك ، من غير ما تقول لحد ؟؟ .. دي بقى محبة الحكمة ؟؟ يا اخي حب الفلوس .. ولا الفقر فلسفة ؟
انيس : الحب هو الوجود كله ,,
الاب : الفلوس هي الوجود كله .. الفلسفة هي الافلاس .. جيبك اهو يا استاذ مفيهوش مليم واحد ؟؟
انيس : ازاي ؟
الاب : اسكت ، فلوسك متوصلكش لأخر اي شهر ولو نصه اجازات .. انت بائس .. بائس و مريض ..وزنك قد ايه ؟
انيس : 55 كيلو ..
الاب : انا اشفق عليك .. هتموت قريب .. وزنك خفيف .. ومرتبك قليل .. ما تعيش راهب .. عش نباتي .. او البس زي م كان غاندي بيلبس .. اهو كان فيلسوف زيك .. او اسرق ..
انيس : ازاي ؟
الاب : جتك خيبة !! متعرفش ازاي تسرق ؟ ادي دروس خصوصية ..
انيس : مفيش دروس في الفلسفة ..
الاب: ليه محدش بيسقط فيها ؟
انيس :لأ نادر جدا ..
الاب : ده الشقاء بعينه .. ليه مش بتدرس الهندسة ولا الجبر ولاالانجليزية ..
انيس : في اساتذة متخصصين ..
الاب : مفيش فايدة يعني ؟
انيس :طبعا ..
الاب : وهنا كمان مفيش فايدة ..
انيس : مش فاهم ..
الاب : يعني مش هجوزك بنتي ، الا اذا ادتها انت دروس خصوصية في الفلسفة ..وادفع تمنها ..ع سبيل المساعدة ..انا راجل طيب ..وبيصعب عليا الفقرا..
انيس : بس انا مش محتاج مساعدة من حد ..
الاب : ايه الوقاحة دي ..اعتبره مرتب "بدل تسول" ..بدل ما تمد ايدك ..اقبلها يا استاذ .. ومتستعجلش ع الجواز زي ما استعجلت في دخول الفلسفة ..
انيس : بس انا بحبها ..
الاب : قلتلك مفيش حاجة اسمها حب ..
انيس : وهي بتحبني ..
الاب : كذب .
انيس : هي قالت كده ..
الاب : سمعتها بعنينك
انيس :انت صدمتني في نفسي حرام عليك ..
الاب : اخرس ..انت لازم تضرب قلم .. ازاي تسمح لنفسك تعذب بنت من اسرة كريمة .. تضيع شبابها مع شاب واهم زيك ..فقران زيك ، وتقولي في الاخر انك بتحبها ..من غيرة خشا ولا قلة حيا ..غور من وشي ..
انيس : حضرتـــ...
الاب : بقولك برة من غيرمطرود ..
انيس : الحل الوحيد انه ..
الاب : انك تفكر ازاي تعيش الاول ، واختك و امك اولى انك تهتم بيهم وترعاهم .. هي دي الرجولة و هي دي التضحية ؟؟ ايه عيب تحب امك واخواتك ؟؟ عيل تافه .. بقولك يلا برة ..
انيس : لحظة بس ..الحل الوحيد هو ..
الاب : الحل الوحيد في الشارع مش هنا ..
انيس : .......
الاب : متكلمش ..انت اتخرجت من كلية ومفلس .. روح اي مقبرة .. واستعد تموت ع مهلك ..ومتمدش ايدك وفكرك لبنات الناس .. انت بتسمه حب .. انا بسميه حرام ..
انيس : اسف
الاب : العفو ..لازم حد يردك لعقلك .. وانا لو جيتلك بنفس ظروفك حقك تطدردني من بيتك ..
انيس : لا انا اقصد اسف اني متصورتش حد في مكانة حضرتك يقول الكلام ده بالطريقة دي .
الاب : قلة ادب صحيح ..بتتريق عليا ..يا فقران يا معفن ..اخرج يا استاذ .. اشتغل ماسح جزم ، ولا بيع فول .. دي تديك خبرة في الحياة .. واحترم بنات الناس
وفتح الباب وقاله : يلا بره ..
انيس : ........