حبيبتي ... هل انا حقا حبيبته

الحلقة 16

وليد : مردتيش ليه ؟
انجي : وانا ليه لازم اجاوب ع سؤالك ؟؟
وقامت لفت ضهرها ..ومشت علطول دوغري
قام وليد عض شفايفه وقال : يا بنت اللزينة !!

==== ع مكتب أميرة ====

اميرة شافت لأول مرة تامر قاعد مش بيقرأ كتاب ..وقاعد سرحان ..
اميرة : ايه ده ؟ مش بتقرأ ليه ؟
تامر : ممممم بفكر ..!!
اميرة : بتفكر !! من امتى ؟!!
تامر : افندم ؟!!
اميرة : مش قصدي ..اقصد يعني علطول في ايديك كتاب ..يعني مش قصدي حاجة ..بس مالك ؟
تامر شاح برأسه في اتجاه تاني .. واميرة فهمت انه مش عايز يتكلم ..
اطول فترة صمت عدت عليهم الاتنين .. من ساعة الشغل ..
لا اميرة اتنرفزت زي كل مرة .. ولا تامر ..مسككتاب وقعد يقرأ فيه ويتكلم ..

وبعدين تامر قعد يكح شوية وقال : احم احم .. هو انا اوفر ؟
اميرة : مش فاهمة ؟؟
تامر : يعني انتي شيفاني اوفر في القراية ؟؟
اميرة : اه .. حبتين ..
تامر بلع ريقه : يعني مكن توصل لمرض نفسي ؟
اميرة : انا مفهمش في علم النفس ..بس اه .. حاجة اسمها ببلومانيا
تامر :انتي كمان عارفة اسمه ..
اميرة : اشمعنى بتسأل دلوقت ..
تامر : اصل وانا بقرأ مقالة في جرنان .. لقيتهم بيتكلمو عن الموضوع ده ..بس انا مش كده
اميرة : طالما شكيت في حالك ..يبقى انت اكيد عارف نفسك ؟
تامر : الفكرة ان المريض النفسي ..مش هيعترف انه مريض ..عمرك شفتي حرامي قال انا سرقت .
اميرة : اه ..لما يبقى عايز يتوب ؟
تامر : تقصدي ايه ؟
اميرة : يمكن انت عايز تخف ؟!
تامر : اخف من ايه !! انا اصلا مش عيان !! انا اصلا معنديش حاجة ..من المرض ده !!
اميرة : مقولتش كده ..بس الموضوع مضايقك ليه ؟
تامر : مش عارف .. هتجنن ..@
اميرة خدت بالها ان الموظفين بدأو يبصو عليهم .. ومستغربين ..
اميرة : تحب نكمل كلامنا برة ..
تامر : لا انا هقعد مع نفسي .. اضبطني ..
اميرة : الي يريحك ..انا مش هضغط عليك
تامر حس ان الكلمتين دول عملو مفعولهم العكسي ..المفروض هو بعد ما يسمع الكلمتين دول يسكت ومش يتكلم ..بس هو من جواه حس انه لازم يوصل لها انه مش عيان ..أنا مش مريض نفسي ..انا عادي .. زي واحد بيشجع فريق كرة بشغف ..زي واحد بيحب فنان باخلاص .. انا مولع بالقراية والكتب
تامر : أميرة ممكن نشرب قهوة سوا
اميرة : مفيش مانع

وفي كافتيريا الشغل ..
تامر : انا مبحبش اكرر كلامي ..بس انا حبيت اقولك اني مش مريض
اميرة : هو انا قلت انت مريض ؟؟ انا مقلتش حاجة ؟!!
تامر : اهو بزيل اي لبس ممكن يحصل ..
اميرة : وتفرق معاك في ايه ؟؟
تامر : عشان بكرهه حد يعاملني بشفقه .. او اني عيان و ع قد عقلي .
اميرة :هو انا عاملتك قبل كده بالطريقة دي ..
تامر : اهو انا بقول وخلاص ..
اميرة : طيب يا تامر ..
تامر : ...........
اميرة : طب عندي فضول ، انت مولع بالقراية اوي كده ليه ؟
تامر : بتثقني .. بتديني مغامرة جديدة ، بتعرف فيها ع ناس كتييير ..برتبط بمشاكلهم ، بتوجع لألامهم ..
اميرة : بس ده خيال الكاتب ..مش واقع .. يعني اتعرف ع ناس في الواقع احسن .. اتعامل مع مشاكلهم بجد
تامر لجلج :الموضوع مش سهل ..
اميرة : ازاي ؟
تامر : الكتاب بيتقرأ .. و مسمحوملك تترجميه باسلوبك ، بخيالك ..تعالجيه بظروفك .. تحكمي عليه من خلال نظرتك .. ومش بيضاايق ، ولا بيتخنق .. ومش بيقول انت فهمتني غلط ..مش بيسبني .. مش بيزعل مني حتى لو ركنته ع الرف كتير ومفتحتهوش مدة .. مش بيغير الي جواه .. مهما فتحته ومهما قريت فيه ، هو هو .. حتى لو علمت فيه و قطعته ، هيبقى صريح ..ويوريني كل ده كل ما افتحه .. مع ذلك هيسبني اتعامل معاه ..الكتاب ده احسن حاجة في العالم ..
اميرة : ياااه ..أيه الكلام الكبير ده ..
تامر : انا مقلتش حاجة لسه .. ده قليل ع علاقتي بالكتاب والي بحسه معاه ..
اميرة : خير صديق في الزمان ..كتاب
تامر : ظلمه الي قال خير صديق ..ده افضل رفيق ..وصاحب ..واحسن من الاهل ، والمعلم . والاخ ..والحبيب .. واي صاحب وشريك ..
اميرة : لا ده ظلم ..للانسان .. طب اهلك ذنبهم ايه ؟
تامر : ذنبهم انهم ماتو وانا صغير ..وسبوني لقرايبي .. الي اهملوني .. وعاملوني كأني نكرة .. ولولا ان كان معايا كتاب ... مكنتش بقيت هنا ...والبنت الوحيدة الي قلبي دق لها .. سابتني عشان بتلفسف كتير .. ولما قلت امشيها جواز صالونات .. محدش رضى بيا ، عشان كان شكلي مجنون .. هعوز ايه من الناس .. هما مش عايزني ...
اميرة عضت ع شفايفها مش عارفة تقول حاجة ..
تامر :اكيد مش كل الناس وحشة ..واكيد مش كل الناس اسطمبة واحدة ..بس انا زهقت .. زهقت اني اعيش مع الناس ، واهتم بيفكرو فيا ازاي .. ولا بيقولوا عليا ايه ..وان الحياة تعتمد ع شخص عشان ابقى سعيد وفرحان ..
اميرة : وانت فرحان دلوقت ؟
تامر : مش عارف ..بس حياتي حلوة ..مستمتع بيها ..بعمل الي انا عايزو ..انا بيتي مكركب اه ، وكله كتب ..وممكن اضرب مشوارلمكتبة اسكندرية عشان اجيب نسخة كتاب معينة ، او احضر حفل توقيع كاتب بحبه ..بس مش مريض ، ولا عندي اكتئاب ..ولا اي حاجة من الهري الي بيتقال ده ..
اميرة : طب طالما مش بيفرق معاك نظرة الناس ليك ..قلتلي انا ليه الكلام ده ؟ .. اكيد مش هفرق معاك في حاجة
تامر :اميرة انا حسيتك زيي ..بتحبي الكتب ..وسبب حبك للقراية هروب بردو ..زيي ..مش كده ؟
اميرة : ايه الي بيخليك تقول كده ؟
تامر :محدش بيحب القراية ، ويقرأ باهتمام كده الا اذا الكتاب بيمثله حاجةتانية ، غير مجرد كلام ، وغير عشان يتقال عليه مثقف .. ، وغير عشان يواكب الموضة ..انتي نظرتك للكتاب مختلفة ..حتى نوعية الكتب الي بتختاريها اقدر اقولك ايه مشكلتك ..
اميرة : افتينا ..
تامر : من غير تريقة .. انتي كنتي بتدوري ع نفسك .. بتدوري ع الاهتمام ..بتدوري ع حد يحتضنك ..وفي نفس الوقت عايزة تبقي لوحدك ، محدش يحشر نفسه في حياتك ..اراهن انك من النوع الي بيقرأ في الضلمه ع نور خافت ...او في ركن هادي .. ووممكن صفحتين في اليوم ..لا في الاسبوع كمان يكفوكي قراية .. انت القراية بالنسبالك اجازة ..
اميرة عينها وسعت زي الطبق .. كلامه فيه شئ من الصحة بس بفزلكة ردت : يا سلام ..مين فينا مش كده ..مين مش عايز اهتمام ..وحد يحتضنه .. مين مش بيدور عن الحب ..والراحة والاجازة
تامر ابتسم وقال :معاكي حق.... بس عشان كده بقولك انك شبهي ..عشان انا كده بردو ..عشان عايز الاقي الحب ، والاهتمام والراحة ..وملقتهوش في اي حد حواليا الا في كتاب ..
اميرة : شكلك كلامنجي خطير ..وانا افتكرتك بتاع علم وكتاب ..
تامر : صدقيني انا غلبان ..
اميرة : قالك .. يلا يا فندي ع شغلنا ..واشوفك ماسك كتاب تاني في ايدك وقت الشغل ..
تامر : مش بايدي ..
اميرة : ازاي ؟
تامر : انتي في مرحلة تقدري تحددي امتى تخرجي من المود ، وتقولي خلاص انا خدت كفايتي من القراية .. تقدري تقولي هروح دلوقت اتشمس .. هروح دلوقت اكل .. هسهلك الموضوع ..اعتبريه زي اتنين مزنوقين وعايزين الحمام ..بس مفيش حمام يدخلوه ..واحد يقدر يحبسها ويستحمل ، وواحد بيعملها ع روحو ..انا بقى بعملها ع روحي
اميرة وقعت ضحك ع فظاعة التشبيه : هههههههههههههههههههههههههههههههههه مش مصدقة انك قلت كده
تامر : لا صدقي ، انا مش عارف اتحكم امتى ابطل اقرأ وامتى ابطل اجمع كتاب ..وامتى انتبه لحالي
اميرة : بتقولي ده ليه ؟
تامر : عايز اعرف بتعملي كنترول ع نفسك ازاي .. ازاي بتضغطي ع نفسك عشان تستحملي ؟
اميرة : وانت ليه عايز دلوقت تغير حياتك ..مش انت مبسوط ومستمتع بحياتك كدة
تامر : انت ليه بتكلميني بالطريقة دي ؟
اميرة : فضول ..ومن حقي اسأل .. طالما هتاخد مني وصفة ..اعتبره اجر ..
تامر : اصلي خفت ..
اميرة : خفت من ايه ؟
تامر : فاكرة المقال الي قلتلك عليه امبارح ..الي خلاني افكر انا مريض ولا لأ
اميرة : اه ..انت لسه قايلي
تامر : قال المقال ، ان الموضوع بيوصل للمووت ..ممكن الكتب دي تموتني ..زي ما لقو "الجاحظ" ميت في بيته لما كتبه وقعت عليه ..لانه كان بردو بيحب الكتب ومولع بتجميعها.. و واحد اتجنن عشان خسر كتابه " ابن الملقن" .. و ان بعدين لحياتي هتبقى فوضوية ، ولو بيتي اتحرق ، مش هيهمني نفسي اكتر من الكتب .. مش عايز كده انا
اميرة : مين يتصور ان واحد بيحب القراية ، تقوم مقالة بيقرأها تكرهه في القراية ..
تامر : انا مكرهتش القراية .. انا خفت .. انا غلطان اصلا اني طلبت مساعدتك ..
اميرة : لالاالا ..خلاص خلاص ..متقلش كده .. من خاف سلم ..
تامر : هتساعديني يعني ..
اميرة : طبعا ..
تامر زفر زفرة من رئته ..دلالة ع الراحة ، وقال : اشكرك .. .. وطلع يجري ع المكتب

اميرة بصتله ..:كلنا بنخاف من الموت ..رحنا ولا جينا ..بنهرب منه ..منعرفش اننا كده كده هنموت ..تعددت الاسباب والموت واحد ..
اميرة هزت راسها ...لالاالالا ..الافكار دي متنفعش ..عشان اساعد حد ..لازم ابقى ايجابية ..واخد بأيده ..
مش كده
يلا ..
،
،
،
يتبع
،
،
،،

،