حبيبتي ... هل انا حقا حبيبته

الحلقة 10

    ==== في نفس وقت و أنيس بيتبستف .. كان في حد تاني بيتبستف بس بطريقة تانية ===
تلفون ندى رن .. وكان الاسم بينور "حبيبي " .. وندى عملت نفسها مش شايفة ..
رن تاني ..وندى داست ع زرار سايلنت .. عشان الموسيقى و الرن الكتير بقى مزعج فعلا ..
رن تالت .. اتضايقت وقامت ردت بعصبية : ألو @@
سامي : ايه ده يا هانم !!
ندى : نعم ؟!! بلغة استنكارية و مستفزة
سامي : بتصل عليكي بقالي 3 ساعات .!!
ندى : ايه ؟!!! مش يمكن نايمة !! في الحمام ؟!! .. هو انت لازم اول ما تتصل تلاقيني علطول !!@@
سامي : انتي بتزعقي ليه ؟!!
ندى : اهو هبلة يا ابني !! اعمل ايه ؟!
سامي : ما تكلمي عدل ..
ندى : والله !! شوف مين الي بتكلم ؟!!
سامي : انتي عايزة تتخانقي وخلاص !! .. انا زهقت من الحوار ده !!! كل نص ساعة تزعقي و تعملي مشكلة ! ..بجد قرفت !!
ندى : وماله يا اخويا اقرف براحتك !! وروح كلم أميرة .. هتهديك !!
سامي : أميرة .. مين ؟!
ندى : ايوة ايوة ..اعمل نفسك مش عارف .. اميرة الي بتقولها كل تفصيلة صغيرة و كبيرة !! .. صديقتك الانتيم ..
سامي : يا بنت الحلال قلتلك عشرومية مرة ..أنا بعامل اميرة انها اختر الصغيرة .. طلعي الافكار دي من دماغك ..
ندى : فاكرني بريالة !! وتضحك عليا .. طب اقطع علاقتك بيها ؟!!
سامي : لا انتي اتجننتي خاااالص !!! ..
ندى : شفت شفت !! مش قادر حتى تبعد عنها لو مجرد الفكرة .. ده انت حتى مكلفتش خاطرك عشان تهدى عصبيتي تقولي ولو بالكدب .. هقطع علاقتي بيها !! ..لا شتمتني كمان ؟
سامي : شتمتك فين يا بنتي بس !! ..لا حول ولا قوة الا بالله !!
ندى : ايه مجنونة انا يعني !؟! .. روح لأميرة العاقلة !! ..
سامي : لا دي مش طريقة حوار .. انتي كلامك بقى غريب .. هقفل ع ماتهدي ..
ندى : ايوة اقفل اقفل .. ده الي فالح تعمله .. تعصبني وبس ..لحد ما اقول كلام وحش ، واخرج عن طوري ، وبعدين تروح تقول وتشتكي للناس .. ان خطيبتي اتجننت و تفضحنا ، وتخلي سيرتنا ع كل لسان ..
سامي : يا دي النيلة .. ويخربيت اليوم الي قلتلك فيه اني بكلم أميرة .. انا اسف يا ندى ، مش هعملها تاني ؟!!
ندى : مش هتعمل ايه ؟؟ تقولي انك بتكلم اميرة ؟ ولا تحكي لأميرة عننا !!
سامي اتصدم من طريقة فهم البنات للجمل ، و طريقتهم الفظيع في تحوير اي حاجة ، وندى خصوصا ،عمرها ما كانت كدة ، ولا عمرها حطت في بالها بنت تانية ، ولا بتغيير .. و ازاي دلوقتي لما بقت تغيير بقى مضايق و مخنوق !! .. و كل ده ع السماعة ندى مستنية اجابة ..
ندى : والله !! مش هترد يعني ..طب سلام يا سامي ( اتكت ع السين )
بيب بيب بيب بيب .. ( الخط اتقطع )
سامي حط التلفون من ايده ،وقعد يفكر .. ازاي اتخنق في لحظة كده .. بعد ما كان هيموت في لحظة انها تغيير عليه وتحسسه انه مهم في عينيها .. دلوقتي خلاص مبقاش طايق نفسه ، ولا طايق سيرتها .. وبقى يشوفها انسانة غريبة .. ومش فااهمة حاجة ..!! وازاي تغيير ؟ ومن مين ؟ اميرة ؟ اينعم اميرة اول بنت في حياته يكلمها .. و عدى بمرحلة الاعجاب بيها ، بس كانت شهرين ! لانها كانت اول بنت يكلمها ، وزي افلام الابيض والاسود الي كان بيتفرج عليها زمان .. شايف نفسه رشدي اباظة ، و هي سعاد حسني .. أميرة موجودة علطول ..أميرة اخته بالضبط .. اميرة تعرف عنه كل حاجة ..اميرة عمره ما خبى عنها حاجة .. حد يحب اخته بطريقة تانية .. منك لله يا ندى ، هتخلي الواحد تطلع في باله افكار مكنتش جواه ..

اما انزل اقعد ع القهوة شوية ..احسن ..بدل ما التفكير ده يوديني لحسكة مش عاوز اروحها ..

==== انجي هناك في اوضتها سامعة زعيق بابها .. وشافت من بعيد أنيس بيتطرد .. وقلبها بيدق اسرع من اسد بيجري وراء غزالة يصتادها ====
انجي سمعت خطوات والدها جاية اوضتها .. البنت حاولت تستخبى في اي حتة ، لأنها عارفة كويس انها هتأخد الطريحة الكاملة دلوقت الي مقدرش يديها لأنيس ..
الاب : انجي !! انتي فين .. اطلعي حالا !!
انجي برعب طلعت من ورا الستارة ...!!
الاب : ده !! الكحيان ده !! ده يناسب عائلتنا .!! يا بت انتي بختك مايل كده ليه !! ايه القرف ده !! .. ده عرفتيه من اهني زبالة ده !!
انجي بلعت ريقها بصعوبة .. ورفضت تكلم ..او تقول حاجة ..
الاب : التسييب ده مش هسمح بيه تاني ..انا دلعتك كتير !! بس مش هقع في الغلط ده تاني ..هاتي تلفونك
انجي :بابا ..!! (كانها بتقوله لأ .. )
الاب : يلا بسرعة بلاش لكاعة .. هاتي تلفونك ..
انجي : اهو ..
الاب : انا مش فاهم حاجة في البتاع ده ..!! طلعي نمرة الجربوع ده ، وامسحيها .. و اياني اعرف انك بتكلميه ! او بتفكري تكلميه .!! ... فاهمة !! .. وهقف عند كدة المرة دي .. لو عرفت اي اتصال ليكي بيه تاني ، هتعرفي انا ممكن اعمل ايه معاكي اكتر
انجي عارفة كويس ابوها ممكن يعمل ايه ..وان رد فعله ده طيب خالص ..مجرد تمسح نمرته ..اهو مسحتها ..ابوها لسه في حقبة الستينات ، ميعرفش ان في طرق تواصل تانية .. واتس اب .. فيس بوك ..تويتر ..أنستجرام .. الحاجات دي موصلتلهوش .. هتعرف تكلم تاني ..

بعتتله انجي ع الفيس ، الانستا و ع الواتس .. تسأل عليه ؟ وتقوله حصل ايه ؟ واخباره ايه !!
مردش .. استنت ساعتين تلاتة ، مردش ..دي اطول مدة يأخدها في انه يرد ع رسايلها ..
استغربت .!! قلقت .!!


=== في حين اميرة في بيتها قاعدة ع النت بتابع الجديد ، ولقت سامي اونلاين .. فكرت تكلمه .. بس قالت لأ .. وبعدين قالت وماله ... وبعدين قعدت تفكر هتقوله ايه ؟؟ .. هي حتى مسألتش ندى هي زعلانة منه في ايه .. معندهاش اي حاجة تتقال .. وفي وسط التفكير ده ، طلع صوت البيب بتاع مسج الفيس بوك .. سامي بيقولها : هنا !!!

اميرة قلبها صعق ...
ايه !!
وردت : اه .. هنا ..