حبيبتي ... هل انا حقا حبيبته

الحلقة 13

تامر ، و أميرة .. بيجرو بيجرو ..وأميرة وحدها الي مش عارفة هيحصل فيها ايه ..كل سيناريوهات الي شافتها في الدراما و الافلام خطرت ع بالها ..
لحد ما لقت نفسها واقفة قدام مبنى كبير اوي .. تامر طلع مفتاح صغير ، وفتح البوابة ..
كان في بواب واقف ع البوابة ، سلم على تامر بس تامر طبعا مكنش مركز ..وماسك في دراع اميرة ومش راضي يسيبه ..لحد ما دخلها مكان ...كان باين اوي انه شقة ..
تامر ساب اديها اخيرا ..ونزل في البيت ، او الشقة دي "بحث" وبيدور ، زي ما يكون كلب وبيدور ع عضمة مدفونة في حفرة ..
اميرة سهت عن مشهد تامر المثير للشفقة ، وهو بيدور في الكتب .. وقعدت تبرق في البيت .. الي المفروض يبقى بيت للسكن ..بس مفيش ركن مفيهوش كتاب .. البيت اشبه بمكتبه ..هي عمرها ما دخلت مكتبة ، غير مكتبة المدرسة ..بس دي طبعا مكتبة .. ده مينفعش بيت ..
اميرة شافت ارفف لكتب ..كتب بكيسها لسه متفتحتش ، وكتب مغبرة ، كتب مقطعة ، كتب اتلمست مرة ، كتب كبيرة ، كتب صغيرة .. كتب تقيلة ، كتب رفيعة ، كتب جيب ، موسوعات ، مجلدات ..

قعدت تتفرج ع الكتب ، وتمشي وهي سرحانة وعمالة تروح من هنا لهناك ، زي فراشة من وردة لوردة ..بس هنا من بستان لبستان .. الكتب كتييير ، والبيت أكبر .. حتى سهت ودخلت الحمام ،، لقت فيه مكتبة بردو فيها كتب .. كل حتة في البيت ده فيها كتب .. الغسالة ، التلاجة ..المطبخ ،..

البيت مفهييوش تلفزيون ..مفيهوش نت .. مفيهوش اي حاجة من مظاهر القرن العشرين .. كتب و كتب بس ..وفجأة وهي سرحانة في المنظر البديع ده ..جه من وراها تامر وهو يلهث وقال لها ...
ده شبه كتابك بالضبط الي انا قطعته ..نفس الطبعة ..ونفس الغلاف .. اينعم مفيش كتابين زي بعض .. بس تقدري تعتبريهم تؤام ..و اقبلي اسفي
أميرة شافت عينه هتنط ع الكتاب .. ونفسه تقوله شكرا ملهوش لزوم .. بس هي اخدت الكتاب من ايده بالسحب .. وقلتله شكرا ..
تامر عينه هتنط ع كتابه العزيز ..بلع ريقه ..وقال لها .. لا مينفعش تمشي بدري كدة .. تعالي اعزمك ع قهوة او نأكل حاجة سوا ... ايه رأيك ..
اميرة عارفة كويس انه بيجر ناعم عشان يأخد الكتاب منها .. بس هي ولا اتهزت : ماشي تمام ، يلا
دي اول مرة تامر هيدفع فلوسه في حاجة غير الكتب ..بس هو مركز ان ده تكنيك يسترد بيه الكتاب بتاعه

تامر قعد في كافيه ..اول مرة يقعد في مكان بره بيته .. حواليه ناس كتير ..كان مغضوض شويتين كتيير ..بس أميرة عارفة تسيطر ..طلبت لنفسها موكا ، وطلبتله شاي ، مرضتش تسأله يشرب ايه ، عشان شافته منكمش ، ومش واخد ع الجو ..
قامت عشان تجذب انتباهه ، قعدت تفر في الكتاب ..و ريقيه جري ..أميرة عندها فضول تعرف ايه الي وصله للحالة دي .. عايزة تعرف السبب الخفي فسألته بطريقة شوية لعبية : تامر .. قولي .. هو انت من امتى بتحب الكتب ..
تامر جاوب وكأنه منوم مغناطيسيا : من وانا صغير ، والدتي كانت بتشتغل وبتسيبنيفي البيت لوحدي ، وكانت بتخليني اقعد في البيت بدل ما استناها ..أقلب في الكتب ..كانت كل يوم تسيبلي كتب معينة قبل ما تنزل الشغل ، عشان لما ارجع البيت قبلها اقلب فيهم واستناها ..
أميرة بتهز رأسها بتركيز .. و بتحرك الكتاب يمين شمال ، عشان تغريييه بيه ، ويتكلم أكتر ...
تامر كان هيكمل ، وبعدين زي ما يكون في صاعقة كهربية ضربت دماغه ، اتعدلت قعدته ، وفاق ..وعينه اتشالت من الكتاب ..وسرح
أميرة حست انها فقدت السيطرة ، رجعت تسأل تاني : اذا عنده اخوات ..
تامر : اه ، عندي اختين ..
أميرة : تمام .. وبيحبو القراية بردو ؟
تامر : لأ .. محدش بيحب الكتب زيي ..
أميرة : اها طالما زيك يبقى اكيد مفيش منافس ..
اميرة اضايقت ، ان اول مهمة مطلعتش منها بمعلومات كتييير ،، بس الفجأة انها لقته بيقولها : يلا نرجع الشغل ، احنا اتأخرنا كتير ..
أميرة : اه صحيح ..انا نسيت خالص ، يلايلا اتأخرنا ..