حبيبتي ... هل انا حقا حبيبته

الحلقة 14

انجي ماشية دمها فاير ..!!!
ايه السماجة دي .!!
اقع في حبه ؟!!
ابتسمت بينها وبين نفسها .. الجملة حلوة ..
بس بردو سماجة !! ايه ده !! لالالا .. الواد ده مش هينفع يستمر معاها
يلا يا ندى تعالى بسرعة خدى التهمة دي ..

انجي طلعت تلفونها تتصل بندى تسألها هترجع امتى ؟
ندى : الو ..ازيك يا انجي ؟!
انجي : مالك محبطة كده ليه ؟؟ زي ما يكون كنتي مستنية مكالمة تانية
ندى : يلا بقى ..
انجي : متقوليش !! سامي متصلش بيكي !!
ندى : ..................
انجي : ولا حتى بعت رسالة ..
ندى : يا انجي ما قلتلك احنا واخدين اجازة من بعض ...
انجي حست انها لو زودت كلمة هتبقى بتضرب في الميت ، والضرب في الميت حرام : طب هترجعي امتى
ندى : بفكر أمدد اجازتي كمان .. مش عايزة ارجع دلوقتي ..
انجي من جواها لألألألأ : اهم حاجة راحتك النفسية يا ندى .. انا هسد مكانك ع قد ما اقدر ..
ندى : ربنا يخليكي يارب .. كلكو بتسدو مكاني
انجي فهمت ان قصدها كمان ع اميرة ..اخدت مكانها مع سامي ..
انجي مردتش تعلق ..عشان هي كمان شكت في الموضوع ..

==== اميرة ع مكتبها ، تلفونها رن ======
اميرة شافت اسم سامي بينور ع التلفون ، مكنتش تعرف اصلا انه محفوظ عندها في التلفون .. الاسم من زمان مكلمهاش ، كلامهم كله ع الفيس و خلاص ..ايه الي جد ..ردت ع التلفون بصوت واطي زي الي بيكلمو اسامة منير ع برنامجة بعد الساعة 12 بليل ..
سامي : اميرة ؟ ازيك !
اميرة بصوت خافت : الحمدلله تمام ..
سامي : شكلي بتكلم في وقت مش مناسب ..من صوتك باين انك مشغولة
اميرة بصت حواليها مفيش حد ممكن يسمعها لو علت صوتها اكتر : لا عادي ..خير ؟
سامي : لو فاضية النهاردة ممكن نتقابل ؟!!
اميرة قلبها نط .. وامبسطت وقالت بسرعة : اه ..ممكن بعد ما اخلص شغلي ..
سامي : وهو كذلك ..هستناكي في المكان ده ..
اميرة حفظت العنوان ..وقعدت تبص للساعة ..
وبعدين وهي سرحانة في عالمها ده ، قعدت تفكر ..هو انا لسه بحبه ولا ايه !! اتفاجئت ..
مش كنت بقول نسيته ؟؟ مش كنت بقول خلاص مش هفكر فيه ؟! ..ايه ده .. معقول لسه في مشاعر جوايا ..؟؟
لالالا ..مش معقول ..

أميرة قعدت منشكحة فترة ..واول ما ميعاد المرواح قرب .. اول واحدة طلعت من الشركة وراحت المكان الي اتفقو عليه هي و سامي

سامي كان قاعد مستني هناك لوحده بيشرب فنجان القهوة ..
اميرة وهي شيفاه من بعيد .. رجعت بأيام زمان ..كان بردو هو بيذاكر ، قاعد من بعيد برنس كده في نفسه .. كل حاجة بيعملها بأناقة ، في ناس كده نضيفة وشياكة علطول .. سامي حبها الاول ... ومش هتنسى ده .. وطول ما هو قدامها بيتنطط كده مش عارفة تنساه ..
سامي لمحها من بعيد ، شاور لها بايده ،عشان تيجي للطرابيزة الي هو قاعد عليها ..
أميرة خطواتها بترتجف ..اول مرة تقابل سامي من غير ندى ..من فترة كبيرة ..
ندى حتى وهي مخطوبة ، كانت بتأخد اميرة معاها .. "محرم" مكنتش بتأخد اختها ، وكانت بتأخد اميرة .. عشان تبقى خروجة صحاب .. ولما كانو بيدخلو سينيما ، كانت بتقعد في النص ما بينهم ، عشان متحسسش اميرة انها منبوذة ..تكلم سامي شوية ، و أميرة شوية أكتر .. وقد ايه كانو الاتنين بيعملوها كويس .. عشان هي صاحبتهم الانتيم ..
أميرة .. انتي بتعملي ايه (قالت لنفسها ) مع كل خطوة ..
وبعدين بتقول لنفسها .. لأ انا الي عرفت سامي الاول .. احنا اصدقاء قبل ما يحب ندى .. او حتى يتخطبو ..تقنيا هو بتاعي الاول ..
خطوة تانية
لأا بس هو حب ندى ، واعترف لها بده الأول ..
خطوة تالتة
بس احنا صحاب من زمان .. بدافع الصداقة انا رايحة اقابله دلوقت ..
خطوة رابعة
امال قلبي بيدق ليه ؟؟ ..في حد قلبه بيدق لما بيشوف صديق له ؟
خطوة خامسة
انا مش بعمل حاجة غلط ، هو الي كلمني .. وهتبقى حاجة وحشة لو تخليت عنه في وقت زي ده .. وخصوصا في مشاكله الكتير مع ندى .
خطوة سادسة ..
طب ليه عقلي بيقولي ان في حاجة غلط ..
خطوة سابعة وخلاص قربت من سامي اوي : انا صديقة سامي .. وهفضل جمبه ..وقت ما يحتاجني

ووصلت للطرابيزة ..
سامي : ازيك يا أميرة .. اقعدي .. معلش لو هأخرك ع البيت .
اميرة : ولا يهمك يا ابني ..احنا مش بينا الكلام ده ..
سامي : هقولك حاجة بس متضايقيش مني ..
اميرة حست انها مش هتسمع اخبار حلوة ..
سامي : انتي عارفة كويس ان الفترة الاخيرة مشاكلنا انا و ندى كترت اوي ..
اميرة بتصبر نفسها ، وبتحاول انها تقول لنفسها ان الكلام الي هتسمعه حلو .. بس قلبها مش مستريح ..
وبلعت ريقها بصعوبة ..
سامي : وانا بحب ندى اوي ، جدا .. ومش متخيل حياتي من غيرها ... ندى حاجة تانية في حياتي ، وانتي عارفة ده كويس
اميرة بحسرة ، اانا عارفة كويس ..وعشان متخليش الكلام يطلع بصعوبة من سامي : عايز تقطع صدقتنا ببعض يعني ..
سامي هم اتشال من قلبه ، اميرة طول عمرها ذكية ، وبتفهما وهي طايرة و كمان لما قالتها كده وفرت عليه جهد كبير انها تطلع منه : بس يا اميرة انتي غالية عندي اوي .. انتي اقرب حد عليا ..انتي اختي بالضبط ، وبقدر افضفض معاكي وانا مرتاح بأي حاجة .. انتي زي ماما كده
اميرة صعقت ، مش كفاية انك قلت اننا اخوات ،كمان ماما ... كده كتير يا سامي .. كتير بجد .. قعدت تلعب في صوابعها وحاولت ترسم ابتسامة مصطنعة: انا عارفة يا سامي .. وانت كمان اخ عزيز ..طول عمرك جمبي ..بس طالما علاقتنا هتسبب مشاكل ..اكيد انا مش هبقى مبسوطة اني اهدم بيت سعيد واكون السبب .. طبعا قلبي مش هيستحمل ده
سامي : انا اسف بجد ، بس كان لازم تسمعي الكلام ده مني ..انا اصلا مش عارف اقول اي حاجة ، انتي وفرتي عليا كتير ..
اميرة : مفيش حاجة يا سامي ، انا بردو لو مكان ندى هعمل زيها بالضبط ..احنا بنات وفاهمين بعض ..
سامي : بس والله هتوحشيني ، وهيوحشني الكلام معاكي ..
اميرة جواها ، كفاية بقى ، فكرك الكلام ده بيواسيني .. انت لو قطعتني بسكاكين أهون عليا من اني اسمع كلام زي ده كمواساة ..يعني بتقولي مع انك غالية ومهمة عندي هضحي بيكي عشان اكتر انسانة بحبها ..الكلام ده والجمل دي مينفعش تتذوق ..هي بتيجي خبط لزق كده .. : خلاص يا سامي ..هتقلبها دراما ولا ايه .. محسسني اني هموت هههههه ولا مهاجرة .. خلاص يا ابني ..
سامي : طب تحبي تتغدي ايه ..هعزمك ع الغدا انا
أميرة عارفة كويس ، انها لو قعدت اكتر من كده ، وكمان في أكل فكل قضمة من اكل ،هتلاقي دموعها بتسيل ..قررت تعتذر ، بس لو اعتذرت سامي هيفتكر انها اضايقت منه .. سامي عارف طبعا ان الي اتعمل ده يضايق ، بس لازم يتعمل ولازم أميرة تتفهم صراحته ، وقرر يأكد ده وقال لها : انا اسف لو الكلام الي هقوله دلوقت ممكن تفهميه وقاحة ، بس انا عايزك تقدري صراحتي .. انا عارف الي قلته ده صعب ، بس عشان انتي مهمة عندي ، مردتش اعذبك ، ومردش عليكي ولا على مكلماتك ، او اقطع فجأة كده معاكي ،، قررت اصارحك بالموضوع عشان تبقى ع نور من الاول
اميرة بمرارة اعجبت بصراحته وقالت : طبعا يا سامي ..ايه الي بتقوله ده ..من غير تفسير .. انا عارفة كويس انك شخص محترم ..
سامي : ها تأكلي ايه ؟
اميرة : مممم (قررت انها تأكل وتيجي ع نفسها ، وتضحك وتتصرف عادي ، عشان ميحسش انها اضايقت ..بس بعدين قالت انها بشر ..وانها مضايقة ، ومينفعش بعد ما ضربها بسكينة ، يجيب بلاستر ويحطه ع الجرح ، عشان يقول انا اسف .. اميرة قالت بقوة : اسفة يا سامي ، مش هقدر أقبل عزومتك .. لو العزومة هي تمن صداقتنا الطويلة الي هنخسرها .. اسفة مش هقدر اقبلها ..ولا هأكلها بنفس .. انا اسفة ..
سامي اتحرج جامد ..وقام من كرسيه مع قومة اميرة من الكرسي
وصافحو بعض بالايد ..وقالو سلام ..

اميرة وهي ماشية بضهرها فكرت ..وبعدين انتي بتفكري ازاي يا اميرة .. ده خطيب صحبتك .. كلنا عارفين ان ندى لسامي .. سامي عارف انه لندى ، وندى عارفه انها لسامي .. وانتي شخصيا عارفة انه مهما يحصل هما لبعض .. ايه الي انتي كنتي بتفكري فيه ده .. دي كان هيبقى اسمها خيانة ..الحمدلله اني موقعتش في الحفرة دي .. بدل ما كنت كرهت روحي العمر كله ..

سامي اعجب جدا بصراحة اميرة ، لأنها لو كانت اتصرفت عادي ولا كأن حصل حاجة ، كان هيعرف انها مضايقة اوي ، ومش هتسامحه العمر كله ..كده هي هتحس انها انتصرت عليه ، وهتصبر نفسها طول الوقت انها رفضت عزومته ع الغدا ... وتحس انها المنتصرة .. هما البنات كده ، لازم يحسو ان الكلمة الاخيرة ليهم ..عشان تلاقي سند يقويها طول فترة انقطاعها عن الشريك التاني .. والا كانت فضلت طول عمرها عايشة الفرصة الي ضاعت منها انها تديله جوز اقلام ..
اميرة ..هي دي اميرة

سامي طلع موبايله واتصل بندى بعد انقطاع 3 ايام ..الي كانو مش بيعرفوا يعيشوا من غير ما يكلمو بعض ساعتين
ندى ردت بعد الرنة التالتة ، مع انها كانت بتزقطط جمب التلفون : الو ..
سامي : وحشتيني ..
ندى : لا يا شيخ ..
سامي : مش ناوية تعزميني ع الفرح ولا ايه ؟ انا زعلان ...
ندى : هو انت محتاج عزومة ..انت عارف العنوان وعارف الفرح ، والمفروض انك من العائلة
سامي : لا يا شيخة ..
ندى : ........
سامي : طيب انا ساعتين و هاجي عندك
ندى بزقططة : هستناك ..
سامي : هوا ..