حبيبتي ... هل انا حقا حبيبته

الحلقة 12

=== بعد نهاية اسبوع حافلة للبنات .. بدأ اسبوع جديد شغل جديد قصص جديدة . =====

من اول اليوم ..انجي لقت وليد طابب على مكتبها .. وابتسامة بلهاء تعلو وجهه ..
انجي : افندم ؟؟ اساعدك بايه !؟
وليد : انا وليد ..
انجي بصتله بصة استنكارية استفهامية ، بمعنى أعملك ايه يعني .!!
وليد : انا المتدرب الجديد معاكي ؟!
انجي : انا خلصت فترة تدريبي للموظفين .. اكيد حضرتك غلطان بأنجي تانية !؟
وليد : لأ .. انا كنت بتدرب تحت ايد ندى ..بس هي اخدت اجازة ، فنقولني لعندك ( وقلبه بيدق ، وعينه بترف )
انجي قلقت على ندى فسألته بحيرة : خير ؟؟ ندى مالها !! انا لسه كنت معاها من يومين ؟ حصل ايه !
وليد : معنديش معلومة ، النهاردة وانا جي الصبح لقيت اشعار بيقولي اني هتدرب مع حضرتك
انجي شدت كرسي لوليد وقلتله بنبرة رقيقة : اتفضل يا وليد ..
وليد اول مرة يسمع اسمه بالعذوبة دي ..وكمان هي قوية ، لا اتهزت ولا انبهرت ، ولا تهتهت زي كل البنات الي اول مرة بيشوفوه .. كان بيكره اوي حد يعلق على انه جميل ، و طويل و وسيم وغني .. وانه زي امير الحكايات من القصص الخيالية .. هو مش ساخط ع ده ، بس بيحس بضغط ، انه لازم يثبت نفسه ، انه لازم حد يشوف الي جواه هو مش شكل بس زي ما يكون كيس شبسي ، ولا علبة كانز ، شكلها من بره حلو ومن جوه فاضي .. لأ هو انسان و عقل و دماغ ..عاوز حد يشوف ده ..عاوز حد يشوف امكانياته .. يبص من جوه شوية .. هو مدخلش الشغل ، عشان الست الي عملتله انترفيو دابت في جماله ولا اتقبل في الشركة هنا عشان هو ابن فلان الفلاني .. و هيورث المبلغ الفلاني ..

وهو غرقان في افكاره دي ..بص حواليه ، لقى البنات بتمصمص شفايفها ..وسامع الودوده .. الي بتقول ، ايه الي بينور ده ... ..و واحدة تانية بتقول : مشع مشع ..متقوليش يورانيوم .. والي تقولك ما شاء الله هيبة .. ايه ده !! ده لو واقف بعيد هيبان ولا منارة الاسكندرية .. ولا حتى الرجالة ..كله يبص كده ويقوم يلف وشه .. وليد محدش يقدر يتحط في منافسة معاه ..زي ما مينفعش بنت تتحط بمقارنة مع مارلين مونرو ، ولا اي راجل يتقارن برشدي اباظة .. وليد كان من النوع ده .. مينفعش تقارنه بحد ..

عينيه بتدور ع انجي ..وبيشوفها وهي بقلق بتكلم صحبتها .. تتطمن عليها ، ازاي قلبها طيب وحنين كده .. قلبها كبير ..
ميعرفش ان القلب ده مجروح .. الحبيب ، طلع فشنك بكلمة من ابوها رفض يرد ع رسايلها ،، بكلمه من ابوها محاولش يحارب عشانها .. نفسها في راجل كان يقف قدام والدها ، ويشدها كده ، ويقولها هنقذك يا رابنزل من البرج العالي ، بس لا في أمير وسيم بينقذ ولا فارس نبيل يخلصها ، حتى ديزني نفسها الي اتربت ع افلامها في انتظار فارس الاحلام ،دلوقتي افلامها الجديدة بقت ، الاخت الي بتنقذ ، والام الي بتحب عيالها ..بس بعد ايه ..

ندى : الو يا انجي .. عاملةا ايه !
انجي : انا بردو ؟؟ انتي فينيك ؟؟ سامعة انك اخدتي اجازة ّ؟
ندى : يا بنتي اخدت اجازة ايه !! فرح بنت خالي ..
انجي : بجد ؟! ..يعني انتي كويسة !
ندى : بيني وبينك لأ..
انجي : ما انا بقول ..مسمعناش عن فرح قبل كده ، ولا عرفت ان ندى فجأة بتختفي ..
ندى : هقولك سر بس مش تقولي لحد ، ماشي ..
انجي : مش هقول لأميرة ..
ندى ضحكت : بصي انا و سامي قررنا نأخد راحة شوية .. فترة نعيد حسابتنا ... عشان خلاص اتخنقت من العلاقة المتوترة دي .. بجد معدتش طايقة ، فقلت اني عندي فرح ، ورحت اقعد عند اهلي في البلد شوية ..
انجي : ربنا يهدي النفوس يا ندى ، وترجعو اصفى من الاول يارب ..
ندى : الي ربنا عازو هيكون .. انا سيباها لله ، خلاص عدتش فارقة ..
انجي : طلعي من بالك ان اميرة السبب .. افكارك دي هي السبب ، وهي الي هتبوظ حياتك .. استغلي الاجازة ، انك تثقي في نفسك شوية ، وانك لما تثقي بنفسك اكتر .. وتبطلي افكار هبلة .. هتزيدي في نظره ..وكمان هتفرق معاكي انتي كندى .. ماشي ..
ندى : هحاول .. معلش بقى ، المتدرب بتاعي بقى تبعك ..
انجي : اخدت بالي ..
ندى : الا صحيح ، انيس اتعمل معاه ايه ..
انجي : اتطرد شر طردة .. اتعمل معاه الجلاشة زي ما بيقولو ..
ندى : يا خبر !! ..ازاي ؟؟
انجي : مش وقته بقى .. عشان ورانا شغل ..
ندى : تمام .. مش هعطلك ..

=== على مكتب اميرة ====
اميرة قررت تأخد مشكلة تامر ع قلبها ..وتساعده .. عشان تنجز الشغل ، كان كل فكرها عشان يبقى تفكيره في الشغل .. مش كل همه يعمل الي وراه عشان يقرأ كتاب .. ويأخد مرتبه اخر الشهر يجيب كتاب .. وصحته في النازل ، وجسمه ضعيف .. ونظره اضعف ..!!
اميرة : ازيك يا تامر ..
تامر طبعا مركز في الكتاب ..ومخدش باله من اميرة ..
اميرة عارفة انها تقدر تشد انتباهه بالكتاب ، والكتاب بس ..
اميرة : تامر ..تامر !! .. شفت الكتاب ده ؟؟
علطول تامر لف رأسه ..ولسه هيشد الكتاب ..وهو في ايديها ..قام اتقطع ( اميرة قصده ان الكتاب يتقطع ، عشان تزعق لتامر ..وتفهمه انها بردو زييو بتحب الكتب بشده ..وقامت صرخت بصوت عالي ..المكتب اول مرة يسمعه )
اميرة بزعيق : تاااااامر !!!! @@@ ايه الي انت عملته ده !! ..كده !! قطعت كتابي !! ..هو عشان مش كتابك ، يبقى مش غالي ع قلوب ناس تانية زي كتبك ؟!!
تامر بلع ريقه بصعوبه ..وقعد يتهته ..ومش عارف يقول ايه !! وعرق جامد
اميرة : ها !! @@@ ناوي تعمل ايه !!! .. هترجعلي الكتاب ازاي بقى !!
تامر ، عمره ما اشترى كتاب لحد ، او ضيع فلوسه انه يجيب كتاب لحد غيره ، ولا عمره خلى حد يستعير كتبه ، ولا عمره فكر انه اصلا يإذي كتاب .. دي المشكلة ..كتاب اتقطع في ايده ..هو في باله انه قتل كتاب ..
تامر وصدمه قدام الجميع .. عيط .. عيط بشدة .. عيط بحرقه ، ومسك الكتاب يضمه .. اميرة ذات نفسها اتصدمت !! الي هو ايه ده !! هي زودتها ولا ايه
وتامر غرقان في دموعه .. و الكتاب بين صدره ممزق .. زي ما يكون حد عزيز مات ..
اميرة .. لقت نفسها نزلت جمبه تطبطب عليه ..
تامر بصلها بعيونه الدامعة المنفوخة ، وبرابيره الي سايله من مناخيره : انا ..ااا سسسف ..(بيمسح مناخيره بصوابعهو صوت شنتفه) .. هحاول اعوضك ( شنتفه) .. وبص للكتاب ، وطلع يجري جري .. و اميرة وراه
لقيته في جنينه الشغل ، حفر حفرة صغيرة .. و دفن الكتاب .. وقعد يعيط
اميرة ع قد ما كانت شايفه ان ده تصرف عيال صغيرة ، ايام ما كانت بتحس انها مذنبة لما تقتل ذبانة ، وتحطها في منديل ، وتدفنها في الشارع .. وتقعد تقول مش هعمل كده تاني .. وفي الاخر بقت بالشبشب تجري ورا الصراصير و الدبان والناموس ، و تقتلهم بلا رحمة ..
ع قد ما هي عارفه انه مريض .. الببلومينيا .. الي قالت عليه اختها امبارح ..ودورت ع النت ازاي تقدر تساعده ، وسألت كتير ازاي تقدر تعالجه .. كل العلاج ، لازم ان المريض نفسه عاوز يتعالج .. ده مرض نفسي .. مش عملية ، مش حبوب ، مش حقن ..الي هتعالجه ، لازم هو من نفسه يكون من جواه عنده تقبل لحقيقة مرضه ..وانه يصارح نفسه انه مش طبيعي ، ويبدأ يقول ، ساعدوني ..
أميرة قررت تزرع جواه الشئ الي يخليه يطلب المساعدة ، لازم يبدأ يحس ان الدنيا مليانة كتير مش بس كتب .. بس وهي في فترة تأملها كده ..فجاة لقت وش تامر اتغير ، طلع يجري عليها .. هي اترعبت ، لقيته كمان مسك ايديها جاااامد .. و خدها وراه يجري .. ويجري .. وهي مش ملاحقة ، ومش عارفة هيدويها فين ..
قلبها دلوقتي مرعوب .!! هي بتجري مع واحد مجنون ..