حبيبتي ... هل انا حقا حبيبته

الحلقة 1

قصتنا بتبدأ مع 3 بنات .. أميرة ، ندى ، إنجي ..التلاتة اصحاب .. او نقدر نقول زمايل شغل التلاتة بيشتغلو في مكتب لشركة "بيس" ..مش طبعا هما التلاتة بس ..في زمايل تانيين معاهم ..بس قصتنا هتبدأ بدول ونشوف في طريقينا هنتعرف على مين ..
إنجي .. بنت جميلة جدا .. وواخدة بالها من نفسها ومن شكلها .. الأكل بحساب ،شعرها بتعمله عند كوافير معين مكياجها دايما اصلي و ماركات .. لبسها علطول متناسق و شيك تقدر تقول عندها ستايليست في البيت ...بس هي عندها حس بالازياء .. طريقة كلامها "بروفيشنال " اوي .. بتعرف تكلم 3 لغات .. روسي ، فرنصاوي ، الماني .. هي مش بتقول 5 لغات لأنها مقتنعه ان الانجليزي و العربي لغتها الام .. مستحيل يعني هتحسبهم .. شاطرة اوي في شغلها .. كل زمايلها بيحسدوها .. بس هي مش عارفة ع ايه !! .. هي شايفة ان ده العادي يعني .. هي اتربت في عائلة مستواها كده ..مش ذنبها .. عائلتها من صغرها دخلتها مدارس لغات ، واهتمت انها تتعلم بالطريقة دي .. مع ان الناس كنت بتأخد عنها انطباع غلط ، انها متكبرة و قليطة ، وجاية من كوكب تاني .. الا انها اثبتت لهم كلهم العكس ..انها متواضعة جدا ، وحبوبة و بتحب تساعد الغير .. ايامها الاولى في الشركة كانت صعبة .. عشان كان زمايلها مدينها هيبة .. وخايفيين يقربو منها لتكون بنت حد مهم .. بس هي بذلت مجهود عشان تكسر الحواجز و تتندمج .. بس بردو الي فيهم فيهم ..ملقتش غير بنتين تانيين كانو جداد ..فأستغلت الفرصة .. واول ما دخلو المكتب رحبت بيهم بدفء و حب .. فأرتاحو لها و بقوا صحاب ..

الاولانية اسمها أميرة .. اسم على مسمى .. أميرة كانت هادية في كل حاجة .. ملامحها ، لبسها ، صوتها .. طريقة مشيتها .. تحس انها لما كانت طفلة انها من العيال الي تقولها ..اقعدي هنا متتحركيش ! ولو جه زلزال هتيجي تلاقيها في مكانها ! .. في حالها خالص .. ملهاش في اي حاجة غير انها تخلص شغلها وكام هواية بتحب تعملها .. القراية و القراية بس .. مع انها مش دودة قراية .. وممكن تقعد ع الكتاب الواحد شهرين .. بس كان تفكيرها .. ان الواحد لازم يستوعب الي بيقراه و يهضمه و يتفاعل معاه .. الموضوع مش مارثون قرايه ، واخلص كتب كتير ! ع قد ما انا هستفيد ايه بالي قريته ..و هيدخل دماغي ايه ....وازاي يحرك جوايا فضول اني ادور وأبحث .. وأستفيد

التانية العكس تماما .. ندى .. نقدر نقول طايشة .. مجنونة . زي النحلة .. سريعه و زنانة ..و علطول عاملة جو في اي حتة تروحها ..كانت حبوبة اوووي .. وهي الوحيدة الي في التلاتة الي في علاقة "مخطوبة" .. مخطوبة لسامي.. سامي بيحبها أكتر من نن عينيه .. و ندى فرحانة ان في حد بيحبها كده بشخصيتها ..بالعكس كانت بتمشي تتفشخر قدام الكل انها سعيدة بعلاقتها ..وان خطيبها في عيد الام اشترى لمامتها هدية بالشئ الفلاني ..وانها و حماتها – ام سامي – سمن ع عسل .. وان مامته بتحبها بالضبط زي ما تكون بنتها او اكتر ..وعلطول معتمدة عليه في كل حاجة في حياتها .

بعد ما اتعرفنا عليهم .. نتكلم عن الاحداث ..... (الشركة) .

الشركة كانت خلية نحل .. كل يوم شغل كتير ، وكل يوم بيجي ضيوف ، وبيجي متدربين وبيجي موظفين .. شركة "بيس" شركة صغيرة في مجال التغذية ..وبما ان الاكل من الاساسيات والضروريات في حياة البني ادم ..فكان شغل الشركة بيتطلب دوما وجود موظفين جدد كل فترة .. والقديم يعلم الجديد ..