حبيبتي ... هل انا حقا حبيبته

الحلقة 3

====== بعد اسبوع ،، وفي البريك عادي =========
ندى لأنجي وأميرة : الاسبوع الي فات كان مرهق اوي ..انا كنت هموت من التعب ..
أميرة : اه صحيح ، هي والدة سامي بقت أحسن مش كده ؟
انجي : ايه ده ؟ هي حماتك كانت تعبانة ؟؟ وانا معرفش !
ندى : هي بقت كويسة ، الحاجة طلع عندها السكر ..ومكنتش تعرف ، فجات لها غيبوبة .. ودلوقتي حالتها مستقرة.
أميرة : الحمدلله جات بسيطة ..انا لما سامي قالي اتخضيت ..
أنجي مستغربة : هو انتو صحاب ..التلاتة ؟
ندى بسرعة : اه .. بس سامي و أميرة صحاب من ثانوي
أميرة ردت بتردد : اه ..اه اه .. من ثانوي ..بس علاقتنا عادية يعني ..مش صحاب اوي ..
أنجي : عادية ازاي يعني ..ده حكالك عن مامته اهو
ندى بتغير الموضوع : قعدتي يا ست انجي تقولي هحكلكو بعدين ع الواد أنيس ده .. وعدى اسبوع اهو ، ولا سمعنا حاجة.
انجي : يا ستي مفيش حاجة ، ده عرفته ع الفيس ، عادي وانا بقلب ع الصفحات ، كنت كاتبه كومنت ، ولقيته رد عليا ،الموضوع احتدم ، ضافني ع الفيس ..وقعدنا ساعتها نتشات شوية .. وبعدين الموضوع اتحور .. وشوية شوية اتعرفنا ع بعض اكتر ..بقينا نتكلم كل يوم .. الكلام بيجيب كلام .. عرفنا بعض ..اتقابلنا برة اكتر من مرة ..شكله مريح و تقبلته ..بس يعني
ندى : بس ايه !!! .. ده الموضوع من زماااااااان ..واحنا نايمين ع ودنا ..
انجي : يا ستي لا نايمين ع ودناكم ولا حاجة ..كل حصله كده ورا بعضه ..
أميرة : امال ايه قتلتني و عشق ..وبتاع ده الي وقع تحت عنينا ده ..
انجي : كنا بنتكلم في الالفاظ العربية يعني ، وازاي بقينا بنقول حاجات اصلا مكنتش موجودة في لغتنا ، وازاي كلام اتعرب .. ولو فضل ع اصله كان يبقى احسن .. بس مش اكتر ..أنتو الي حوروتو ..
ندى : يا بت متعمليش الشوييتن بتوع البنات دول ، وتخبي .. انتي في حاجة من ناحيتك ..
انجي تنحت ومش ردت ...
ندى : خلاص فهمت .. وهيجي لبابا امتى ..
انجي : الموضوع مش حساه هيكمل ..هو ظروفه منيلة اوي .. بس شاريني ..
اميرة : الكلام اتغير ..
ندى : هش هش ..هتفتح قلبها اهو ..
انجي : هو معاه فلسفة ، ليسانس اداب يعني .. وبيشتغل مدرس ، بس ع قده يعني ..الفكرة انه لولا جيبه ، هو كل حاجة فيه كويسة جدا .. اخلاقه ، ثقافته ..طريقة كلامه ,, كل ثقة ، وحساه شاريني فعلا ، وبيحبني بجد
اميرة هرشت ودنها وفي سرها ( اخلاق ايه يا بنتي ، ده عرفك من النت ، تلاقيه معشم كام واحدة زيك ..وداخل عليها بحوار الفلسفة والثقافة ده ..تلاقيه صاايع مش معاه دبلوم حتى )
ندى : معاكي صورته ؟
انجي فتحت الموب اهو ، ندى و اميرة بحلقو في الصورة ..الواد لابس نضيف ، وشكله ابن ناس خالص ..وعنينه بتقول انه مش لعوب ، فيه حاجة تخليكي تطمني له و تستريحيله ..بس لسه في حاجة ناقصة ، حاجة غلط ..
ندى : طب انتو بقالكو قد ايه بتكلمو بعض
انجي : سنتين يعني ..!!
ندى : ايه !! كل ده !!! بس انتي عمري ما قلتي ..
انجي : انا لسه عرفاكو من 9 شهور .. ويادوب لسه واخدين ع بعض ...يعني وكمان مجتش فرصة ..
ندى في سرها ( عمري ما فكرت ان انجي العاقلة الهيبة دي ، يكون ده الي بيحصل معاها ،، بس جايز يكون الواد فعلا كويس .. مش هقول حاجة )
انجي : انا عارفة بتفكرو في ايه .. عشان عرفتو من الفيس يعني ، ويمكن يكون لعبي ..ع فكرة انا كنت زيكو في الاول ، مش هينضحك عليا يعني .. بس بعدين هو خلاني اثق فيه .. وكذا مرة قالي ، هكلم بابا .. وخلاني اكلم امه و اخواته ، وقابلتهم كمان ..وكل ما يسألوني ع اهلي اقولهم مسافرين ..
ندى : طالما يا انجي مش بتقولي لأهلك يبقى في حاجة جواكي بتقولك غلط ..
انجي : مش غلط ..بس انا مش واثقة في الخطوة دي ..
اميرة : طب خلاص اقطعي يا بنتي ..
انجي : اقطع ايه .. انتي مش شايفة انا مشيت قد ايه في الحكاية .!! مقابلات .. و خروجات ، وكلام .. و اهله .. الموضوع بقى معقد اوي .. انا حاسة اني عكيت اووووي ...مع ان كل الي كان في دماغي ، كان صداقة بس !! .. انا حاسة اني غرقت .. وفي مصيبة !!
ندى : يعني انتي عوزة ترتبطي بيه ولا ...
انجي : مش عارفة
اميرة كشمت : نعم يا انسة ؟؟ يعني ايه مش عارفة !!
انجي : اصل انا يا بنتي طول عمري عندي اصحاب ولاد .. وعادي ، ونتكلم عادي ، وكلمت قبل كده ناس ع الفيس والنت ، وكنا صحاب ، اشمعنى ده الي هيقلبها جد .. انا خايفة بس ..الموضوع فعلا قلب جد اوي
ندى : بصي الموضوع بسيط ، قوليله قابل بابا ..وهو هيركب الهوا ، ويخلع علطول ..هما كده اول ما يحسو ان الموضوع هيبقى جواز وبتاع .. هتلاقيه هرب علطول ..
انجي : بس هو صديق كويس ، مش عاوزة اخسره يعني ....وبعدين افرضي جه بجد وقالي ضبطي ميعاد مع باابا !!
ندى : شكلك بتحبيه
انجي : مش عارفة ..بس مرتحاله ..
اميرة : يبقى بتحبيه بس متأكدة ان بابا هيرفض !
انجي : الفكرة انه مش بس هسيرفض ، ده ممكن يعلقني من شعري ، ويحلقه ع الزيرو ..
ندى : يا بنتي طالما انتي شارية وهو شاري .. خدي خطوة جريئة وحددي ميعاد معاه ومع والدك
انجي : ده أنيس اتحايل محايلة ، انه حتى مستعد يكلمه ..في المووضوع .. ومش لازم يحكيله بدايات التعارف لو خايفة من باابا ياخد انطباع مش كويس زي ما كل ما هيجي في باله ..
اميرة : بصي ملكيش دعوة بكلام الناس .. انتي عاوزاه ولا مش عوزاه .. خليكي صريحة .
انجي : عوزاه ..
اميرة : يبقى خلاص