حبيبتي ... هل انا حقا حبيبته

الحلقة 17

اسوأ حاجة تحصل لواحد الصبح قبل ما يبدأ يومه ..ان عربيته تعطل بيه ..لا مش بس كده ..وميلاقيش حد حواليه يساعده .. ويبص في ساعته يلاقي نفسه متأخر ع شغله

ده الي حصل لأنجي ..في نص الطريق عربيتها عطلت بيها ..وقعدت محتاسة تبص للعربية ..وتبص للشارع حد يساعدها ..او حد يبصلها بعين العطف ، يصلحلها العربية
الاسوأ لأنجي مش بس العربية العطلانة ..لأ
في اللحظة دي .. عدى قدمها واحد ..اخر واحد تتمنى انه يقف لها .."وليد" ..وبكل شياكة ، نزل من العربية بتاعته ، وبكل قلاطة سأل انجي : انتي واقفة هنا بتعملي ايه ؟
انجي : بتشمس ..
وليد ضحك وقال : عربيتك عطلانة مش كده ..
انجي بلماضة : كلك مفهوميه ..
وليد : هو انتي ساكنة قريب ؟
انجي : هتفرق معاك في ايه ؟؟
وليد : اصل انا ساكن قريب من هنا ..وده طريقي ..
انجي : ميرسي ع المعلومة
وليد : ايه الطريقة الي بتكلميني بيها دي..
انجي فضلت ساكته ..قام وليد لافف وهيركب عربيته عادي ولا كأنه شاف حاجة ..انجي طلعت تجري قدام العربية تقوله : بقى دي جنتلة ؟؟!! تسبني كده في وسط الطريق !
وليد : يهمني في ايه ؟
انجي : بجد هتسبني ؟!! كده !!
وليد : كلك مفهومية ..وسعي بقى عشان مش ادوسك
بكل احباط انجي وسعت عشان العربية تمشي .. وراسها في الارض منكسرة .. وقعدت تضرب كاوتش العربية .. انا السبب .. لازم اتلامض يعني !! ما تخليني ساكتة احسن ..
وهي لسه بتاعتب روحها ، سمعت عربية واقفها وراها .. بصت لقتها وليد .. نزل شباك العربية وقلها : ها ؟ هتركبي ! ولا..
انجي من غير ما تقول حاجة ، ركبت العربية علطول ..
وليد ابتسم ..ولبس نضارة شمس .. وشغل الراديو ..
انجي قعدت تهز راسها .. بتفكر في الي حصل ..وازاي تقوله شكرا ..والعربية بتاعتها ، هتعمل فيها ايه في الشارع كده
وليد : اديني رقم لوحة عربيتك ..
انجي برقتله كده : ايه ؟!!
وليد : ايه .!! هتحصل بشركة تجر العربية من الشارع وتوديها المكانيكي تصلحها ،، وتجبهالك لحد الشركة اخر اليوم
انجي : ملهوش لزوم .. انا هعمل الكلام ده ..
وليد : مش هتفرق كتيير ، وبعدين انا اعرف حد في الشركة ، هينجزلنا الموضوع .. ويتوصى ..
انجي مش عارفة تكلم ، ولقت نفسها بتيدله رقم لوحة العربية : 234 ج ح ت
وليد : من الاول ..
انجي بصوت واطي : شكرا ..
وليد : ايه ؟! مسمعتش ..
انجي لفت راسها للشباك ..وضغطت ع شفايفها ..وليد مبتسم ..
ووصلو للشركة .. و هدى كانت واقفة بردو ع باب الشركة ..
انجي عينها جات في عين هدى الي شافتها نازلة من نفس العربية بتاعه وليد ..
وليد انكشح .. وبص لهدى ..وشاور ع بوقه وايديه بحركة دائرية ..تتفهم .. بلغي واتكلمي .. عادي

هدى طلعت تجري ع المكتب فوق ..

انجي ملحقتهاش تفهمها ان الموضوع عادي ..بصت لوليد الي كان باصص للسماء بيصفر مع العصافير ..
انجي بكل غضب : عجبك كده .؟؟َ؟؟ .. الكلام هيزيد في الشركة ؟؟
وليد بكل برود : وهو انا الي قلت لعربيتك تعطل ؟؟ ده جزاتي اني ساعدتك ؟
انجي : اووووووووف بقى ..
وليد قرب منها جامد ..وقالها : دي شكرا الي تفوليها لعمو ؟؟!
انجي : عامو في مصارينك ديدان يا بعيد .!!
وليد فطس ع نفسه ضحك وقال : ماشي ..وطلع يمشي ع المكتب ..

انجي فتحت موبايلها بكل نرفزة ..لقت نمرة غريبة بترن ..قلبها دق .. تلاقيه أنيس بيتصل من نمرة تانية .. واخيرا اتصل .. اخيرا هنتلكم ..
انجي : الو ..
صوت : الوو ..ايوة يا انجي ..
انجي سامعة صوت بنت ..والاحباط في نبرتها زاد : ايوة مين معايا ؟
صوت : يخربيتك مش عارفة صوتي ..انا ندى يا بنتي ..
انجي الاحباط علي اكتر في نبرتها : اه ..ايوة يا ندى
ندى : ايه ده ..!! صوتك اتغير كده ليه ؟؟ كنتي مستنية مكالمة تانية ؟
انجي : انتي عارفة بقى ؟؟
ندى : ينيله ؟؟ هو لسه مردش عليكي ؟
انجي : لا..
ندى : يبقى ولا هيرد .. بطلي تستنيه يا بنتي .. خلاص شكله باعك وفكس للموضوع ..
انجي : لا يا بنتي .. ما الي اتعمل فيه مش كفاية بردو ..
ندى : يا بنتي ده فات ع الموضوع كتير ..احنا داخلين في كام شهر دلوقت ؟
انجي : 3 شهور واسبوعين ..و يوم .. و23 ساعة
ندى : يا حنين !! ..لا والله ؟!! .. ايه يا بنتي دور سعاد حسني الي انتي فيه ده ؟
انجي : بطلي نقورة بقى ...
ندى : لا انتي حالتك صعبة ..أنسيه ..بطلي تحبيه ..واوعي تاني تفكري فيه ..
انجي : انتي هتغني ..
ندى : ههههههههههه قفشتيني ..
انجي : كويس ان حالتي بضحكك ..حد مبسوط بالي انا فيه ..
ندى : يا عبيطة انا بنكشك .... عيب عليكي تفهمي اني شمتانة ..انتي الحتة الشمال يا انجي .
انجي : عارفة يا ستي .... (بتغير الموضوع ) امال ايه موضوع النمرة الجديدة دي ؟
ندى : عادي يعني ..اشتريت خط جديد ، قلت اجربه فيكي ... المهم دلوقت ، انا بتصل اعزمك ع فرحي .
انجي : ما لسه بدري يا بنتي ..
ندى : لا انا وسامي قررنا ..نبدر .. عشان هيسافر برة ..ونلحق نخلص الورق ، عشان اسافر معاه..
انجي : الله الله .. ماشي يا عم .. مبرووووووووووووك
ندى : الله يبارك فيكي ..
انجي : قلتي لأميرة ..
ندى : مممممممممممممم

في الوقت ده ..تلفون وليد بيرن .. والظاهر ان الاسم الي بيرن ..مش ظريف ..لان وش وليد اتقلب ..

امنية ...

وليد قفل التلفون ..وطلع ع المكتب يفكر .. هي عايزة مني ايه ؟؟!!