حبيبتي ... هل انا حقا حبيبته

الحلقة 5

اميرة روحت البيت وكل تفكيرها في السكة ، في تامر !! هو الواد ده طبيعي !! هي كمان بتحب تقرأ !! بس هو مش طبيعي !! صح ؟؟ ولا ايه ؟؟
وصلت البيت ، اختها فتحت لها الباب ..وقالت لها اتأخرتي كل ده ليه ؟؟
اميرة : بصي يا هاجر ، مش وقتك ؟؟ انا تعبانة ع اخري ..مش وراكي مذاكرة ذاكري ..
هاجر : ما انا كنت بذاكر ، انا غلطانة اني فتحت الباب ..كنت سبتك تباتي برة الباب ..
اميرة مسحت بايديها ع رأسها في تعب ...علامة انها مرهقة ومش قادرة تكلم
هاجر :خلاص يا اختي ..
اميرة : ماما فين ؟
هاجر : ماما عند خالتو .. العشا بتاعك في المطبخ ..سخني بقى وكلي
اميرة : طيب ، كملي مذاكرة انتي .. عاوزينك تطلعي الاولى ع الدفعة !!
هاجر : يا ستي دي كلية طب !! اطلع الاولى فين بس ..وبعدين سنة خامسة !! مش هاجي احقق احلامي دلوقت
اميرة : بطلي لماضة ..كنتي ذاكرتي بدل اللماضة دي ..

اميرة اخدت دش سخن ..وسخنت الاكل وقعدت تتعشى ..المفروض كانت تنام شوية ، بس ساعات الواحد من التعب بيبقى مش قادر ينام ..فتحت الفيس وقعدت تقلب شوية .. وفجأة زمارة الشات نورت .. ولقتها من سامي
اميرة انتي هنا ؟
اميرة : اه ..
سامي : هي ندى لسه مخنوقة ؟
اميرة : مخنوقة من ايه ؟
سامي : انتي مش غريبة !! اصل انا وهي متخانقين ..وهي مش بترد ع تلفوناتي ..وانا قلقان ..
اميرة : تاني يا سامي ، اتخانقتو تاني ؟
سامي : يا بنتي الموضوع مش زي كل مرة ، هي متنرفزة جامد من ناحيتي !! مش عارف مالها
اميرة : طب مامتك عاملة ايه دلوقت
سامي : لا الحمدلله بقت كويسة خالص .. نشكر ربنا ..الحمدلله ..
اميرة : الحمدلله ، ربنا ينعم عليها بالصحة يارب ..
سامي : ربنا يخليكي يا اميرة ..
سامي : معلش لو بتقل .. بس برتاح لما بكلمك ، وكمان انتي صحبتها ، حاولي تعرفي ايه الي مضايقها مني
اميرة : انت عارف ندى .. الجن الازرق بس الي بيعرف مالها ..
سامي : عشان خاطري ..انتو صحاب واكيد بتفضفضلك
اميرة من جواها ، احنا بقالنا كتير بطلنا نفضفض لبعض : حاضر يا سامي ..، بس هاتلها ورد ولا حاجة ، وقولها انك اسف بكل حواسك ..احنا البنات بنصدق الكلام لما يبقى طالع من القلب بجد ..
سامي : حاضر ، هعمل كده .. لو هي سامحتني خلاص مش لازم اعرف هي كانت زعلانة ليه اصلا ..
اميرة : ربنا يهديكم ..ويصلحلكم الحال ..
سامي : امين يارب..
سامي : هنفرح بيكي امتى يا اميرة بقى .. والله لأرقص في فرحك .. انتي اختي الصغيرة يا مرمر ..!
اميرة بحسرة : ان شاء الله .. طب انا جاية من الشغل تعبانة .. عاوز حاجة تانية ، هقفل ؟
سامي : لا انا اسف معلش !! واسف لو طولت عليكي ..
اميرة : لا مفيش حاجة ..اي وقت يا سامي احنا صحاب..
سامي : ده العشم بردو ..وهعتمد عليكي تخلصيلي موضوع ندى
اميرة : ان شاء الله .. سلام
سامي : سلام ..

اميرة عضت ع شفايفها حسرة .. وقالت لنفسها "أختي الصغيرة " .."مرمر" ..عمره ما شافني كبنت يحبها ، علطول واحدة بيحميها ..علطول بنت مفعوصة ..اميرة راحت تعمل عصير فراولة ، وذاكرتها رجعت لأيام الثانوي .. لما كانت هي وسامي جيران .. واهلها واهله اصحاب ..وكانو بيذاكرو سوا ..نادرا لما تلاقي في مصر وخصوصا في الثانوية العامة ، اهل بيشجعو العيال الي المفروض منافسة انهم يذاكرو سوا ، ويقعدو مع بعض يشرحو لبعض ..سامي كان شاطر في الرياضيات زي اي واد .. وهي ميح ، بس كانت شاطرة في الانجليزي .. تقعد تشرحله ، ويشرحلها ..والنتيجة ظهرت ..والاتنين كانو زي بعض بالضبط .. وكانو فرحانين اوي .. اميرة كانت علطول بصاله انه السند والظهر ، وانه المنقذ لها من اي حاجة في البيت ، مكنتش تعرف هينقذها من ايه ..بس اي وقت تقع فيه في مشكلة ، اول واحد في بالها ..امها لما تزعق لها .. تكلم سامي ,, كلامه معاها مريح .. بينهم مفيش اسرار ..ولا بيعرفوا يخبو حاجة ع بعض ..سامي في عينيها ، الواد الشاطر الي محافظ ع نفسه ، عمره ما كلم بنت بطريقة تانية ،، حاطط خط وماشي عليه ..استرجلته في مواقف كتير ، لما كانو العيال في الشارع يعاكسوها وهو يضربهم ويتخانق ..معاهم ، ويقولهم دي اختي محدش يجي جمبها .. ع قد ما كانت بضايقها كلمة اختي دي ، ع قد ما كانت بتقول امال هيقول لهم ايه .. وقد ايه حلمت بيه بالبدلة السواد جنبها وهي بالفستان الابيض ....وامها و امه ، قد ايه كانت بتسمعهم لما كانو بيبقو مع بعض ..انهم لايقيين ع بعض ..ودي تقولها : مش هلاقي احسن من سامي لبنتي ، وهي تقول : مش هلاقي احسن من بنتك لسامي ..الاتنين تربية ايدينا ..وازاي كانت بتعترض بشدة وتقول : يععععع انا اتجوز سامي !! يا ستي احنا اخوات .. انا ابص لسامي ده .. ده كله ديفوهات ..!! وهو كان بيسمع الكلام ده ..كان نفسها ينكشها ، يغيظها يقول لها تلاقي احسن مني فين يا مفعوصة .. بس مكنش بيقاوح .. ولا بينطق ..يقعد يضحك ويقولها : يلا نركز في المذاكرة ..
مش ناسية مرة لما كانت مسرحة شعرها وقالها تسريحتك حلوة ، بس مش كبرنا ، ولازم نتحجب
اي بنت كانت هتضايق وتقول هو مين عشان يتحكم فيا ..بس كنت حساه راجلي ..اتكسفت اوي اني سمعت كلمة زي دي ..وبعدها بشوية اتحجبت ..ويومها اداني مصاصة .. مردتش اكلها يومها واحتفظت بيها ..سامي كان احلى حاجة في حياتي في الفترة دي ..اه كان ..لحد ما كنا بنذاكر مرة في المكتبة ، كان عندنا امتحانات اخر السنة في الكلية ، ولقيته بيقولي : اميرة انا بثق في رأيك وعاوز اخد مشورتك ..انا معجب بواحدة
لوهلة كنت بتمنى اني اسمع اسمي ..شكيت انها تكون انا ..وليه متكنش انا ..بس بعدين بصيت لعنيه ولقيتها راحت لحتة تانية وخدوده احمرت ..عرفت علطول انها مش انا ..وفي حاجة اكسرت جوايا ..حاولت يومها اجيب ليسته البنات الي ممكن هو يعرفها ،، أمل اجمل واحدة في دفعتنا ، هو كذا مرة لمح انها جميلة و امورة ..وبنت عن حق ..ولا اسماء الي قال كذا مرة انها بنت مثقفة اوي .. وهو معجب اوي بالبنت الي دماغها فيها معلومات كتيرة ..مش كلها ميكياج ولبس وبتاع ...ولا جيهان البنت ام دم خفيف ..والي ضحكتها سكرة ..فاكرة مرة قالي انتي مكشرة ليه ،بصي لجيهان وانتي تضحكي علطول .. سامي مش يعرف بنات كتير ، ومش بيعلق ع بنات كتير ،، كل دول الي في بالي .. مين هي مين ..ولسه هيقول الاسم ..لقيت امينة المكتبة بتقولنا ..يلا ساعات المكتبة خلصت ، هنقفل ..من ساعتها معرفتش هي مين ، ولا سألت حتى ..ولا عاوزة اعرف , طالما مش انا .. مش ههتم ..
بس ي خبر النهاردة بفلوس بكرة يبقى ببلاش ... لقيت ندى اعز صديقاتي في الكلية جات تقولي : أميرة عندي خبر حلو اوووي ..
طريقة كلامها كانت بتنط من الفرحة وعينيها بتطلع قلوب ، كنت فرحانة من منظرها و فرحانة وياها .. لحد ما قالت لي ان سامي اعترف لها انه بيحبها !! وعاوز يتقدم كمان لبابا .. مسكت ايدي واتنططت وانا متنحة في مكاني ..
قلتلها : ايه ؟؟
ندى : اتصدمتي صح !!! .. انا بردو مش مصدقة .. !! ..اتصدمت بردو لما قالي .. بس انا فرحانة اوووي .. سامي شخصية محترمة اوووووي .. والف من تتمناه ..
حاولت وقتها اني اضحك و ابين اني فرحانة ع الرغم من اني بتقطع من جوايا ..مش عشان اكتشتف ان سامي بيحب ندى لأ .. عشان ندى كمان طلعت بتحبه ...
ومفيش امل اني اتوقع سيناريو تاني
وكده حضرت خطوبتهم .. وفرحت لندى ولسامي ..
وفضلت جمبهم ، اساعدهم ينجحوا في علاقتهم ..
ومع الوقت جمرة حبي لسامي خفت .. مقدرش اقول بقت رماد ..بس مش متوهجة زي الاول ..فكراه بالخير وبدعيلهم ينجحو في علاقتهم ..
اصل انا اتنسيت قبل ما الحق اقول اي كلمة ..
بس انا بشر ، مش قادرة ابقي صديقة ليهم الاتنين زي الاول انا موجودة اه .. بس من جوة حاسة عاوزة ابعد عنهم جامد ، عاوزة اتنفض من حواليهم ..بس كل الصدف بتجمعنا نبقى سوا .. قدرنا نبقى سوا

وعشان كده مسكت كتاب ..عشان ابعد عن العالم ده .. عشان كده مليش في الدنياغير القراية ..
وتامر ده هعلمه الادب ..الي مستهتر بالكتب وبيقرأها مجرد قراية عشان يخلص كتب ..