حبيبتي ... هل انا حقا حبيبته

الحلقة 21

==== اميرة و تامر في المكتبة ====
تامر : اختاري بقى الكتاب الي تحبيه .. وانا اشتريهولك ..
اميرة : ممم مفيش في دماغي كتاب معين ..
تامر طلع يجري ع كتب وصلت حديثا للمكتبة ..وسابها في نص الكلام ..أميرة ضحكت ع منظره ..وقعدت تبص شوية ع الكتب ..
بس بعد شوية بصت عليه ..ولقت في بنت تانية واقفة معاه ... بنت طويلة ، شعرها ناعم و حلو ..و ابتسامتها ولا جينفير لورانس .. وهو بيضحك معاها ..والحوار شكله شيق ..
اميرة عندها فضول تعرف مين دي ..بس بعدين قالت وانا مالي .. ولفت رأسها ..وكملت تدور ع كتاب ..
بس فضول الانثى عيب فيها من الخليقة .. بصت تاني وتالت ورابع ..وحست ال3 دقايق دول ولا 3 سنين ..
مين دي
بيضحكو ع ايه
بيتكلمو في ايه ؟؟
بيعملو ايه ..كل ده
ومطلعتش من الي هي فيه ..الا و عينها وعين تامر اتقابلو ..و قام عملها باي باي ..وشاور لها بايده الي هو تعالي ..اميرة استغربت ..بس قررت تروح هناك تشوف في ايه
تامر : اعرفكو ... بسنت .. اتعرفت عليها في ندوات المكتبة الي كانت بتتعمل بعد قراية كل كتاب ..
اميرة : اهلا وسهلا ..
بسنت : انتي اميرة !! يااااااااه ..تامر بيتكلم عنك كتير اوي ..
اميرة ابتسمت : يارب بالخير ..
بسنت : اه كل خير .. كل خير والله ..
تامر : عشان تعرفي يا ست اميرة ..مسيطك اهو ..
اميرة : ههههههههههههه خلاص مصدقة ..
بسنت : هو خالد راح فين ؟؟
تامر : هتلاقيه واقف عند السيديهات ..هيروح فين يعني ..
بسنت : طب تمام .. صدفة حلوة يا اميرة ..اني شفتك ..باي يا تامر ..(ابتسامة روعة)
تامر : عسولة وخفيفة ..
اميرة : اه عسولة ...
تامر : خالد ده علطول بيتوه منها ..
اميرة رفعت حواجبها عشان متعرفش مين خالد ده ..
تامر اه ..نسيت اقولك ..خالد ده خطيبها ..
اميرة من جواها ارتاحت ..وقلبها دقاته هدت ..وابتسمت

بعدها بثواني ..اميرة بصت لتامر ..واستغربت !! هي ليه حست كده !! ليه ارتاحت ؟!! ليه فجأة حست زي ما يكون في صخرة اتزاحت من قلبها ..

تامر : بتبوصيلي كده ليه ؟؟!
اميرة : ها !!
تامر ابتسم : تعالي نأكل ايس كريم ..
اميرة : ها !!
تامر ضحك : ايه ؟ مركبة ودانك القديمة ولا ايه !!؟؟
اميرة ابتسمت
تامر : يلا يلا .. النهاردة الخروجة ع حسابي ..
اميرة : ايه ده انت ورثت ولا ايه !!؟؟
تامر : اه .. ههههههههههه ..يلا


== وليد تلفونه رن ..و وشه اصفر ..امنية تاني ===

وليد :الو ..
امنية : ايوة يا وليد ..انا امنية ..
وليد : امنية مين (بيمثل)
امنية : امنية .. صحبتك من الكلية ..
وليد بكل برود : اه ..ازيك ..
امنية : كويس انك لسه مغيرتش رقمك ..عشان اعرف اوصلك ..
وليد : خير ..
امنية : عايزة اقابلك ضروري ..
وليد : خير .!!؟
امنية : هتعرف لما اقابلك ..اقابلك فين ؟
وليد (مش عايز اصلا يقابلها ): طب ممكن نتقابل .في الكافيه الي جنب الشغل ؟
امنية : مفيش مشاكل .. هات العنوان واجيلك ..
وليد ع مضض اداها العنوان ..

وليد وشه مقلوب ..زي ما يكون ميتله حد ..وشايل طاجن سته ، وزهقان ، ومش مركز مع حد

انجي لاحظت ده في وشه .. وافتكرت انها السبب ..عشان المناقشة الي حصلت بينهم الصبح ..قعدت تفكر في الي حصل ..وهل هي زودتها ولا ايه ..
بس هي شايفة انه مينفعش ..عشان والدها صعب ..
وهي لسه بتقول وبتكلم عن والدها ..لقيته قدامها في الشركة ..بيتمشى في الممر ..وبدون اي مقدمات .. لقيته داخل مكتب المدير علطول ..استغربت
بس في حاجة شدت انتباها اكتر ..ان وليد عدى من قدامها من غير ما يقول ولا كلمه .. افتكرته زعلان ..طلعت تمشي وراها ..
لقيته داخل كافتريا الي جنب الشركة .. ووشه مقلوب ..
ومفيش دقايق الا ودخلت بنت وراه ..وقعدت ع نفس الطرابيزة ..
انجي مقدرتش تمنع نفسها انها تدخل الكافتيريا وراه ..او وراها ..وقعدت وراهم ..تسمع الي بيتقال ..
انجي استغربت هي بتعمل كده ليه !! ..بس اهي هناك دلوقت ..وقاعدة بتسمع ..

امنية : عاش من شافك يا وليد .. لسه زي ما انت ..
وليد ابتسم ..
امنية : اوعى تكون لسه زعلان مني ..
(انجي ..عقدت حاجيبيها !! زعلان !! )
وليد : يا ستي الي حصل حصل ..وفي الماضي ..
امنية : انت عارف انا انفصلت عنك لأسباب خارجة عن ارادتي .. مش كده
وليد : ما قلنا خلاص انا نسيت ..
امنية : نسيت ايه ..انت من ساعة ما قعدت مبصتش في وشي ثانيتين ع بعض ..
وليد : ما تقولي عايزة ايه ؟
امنية : مش قادرة ..لازم ازيل سوء الفهم نهائي ..
وليد : هتقولي ايه ؟
(انجي ..بقى هي دي الي كان بيحبها !! .. اوباا ..كان بيتكلم بصحيح ..وانا افتكرته بيواسيني وخلاص ..)
امنية : احنا كنا صغيرين في الوقت الي كنا فيه مع بعض ..وصدقني مشاعري مكنتش متأكدة منها ..فعشان كده قررت اهرب منك
وليد : انتي حتى مقولتيش كلمة .. زي ما اكون شراب قديم اتقطع ..
امنية : ما انا خفت لو قررت اكلمك تاني ..واعتذرلك اضعف قدامك وتصعب عليا ومقدرش اعملها ..بس وقتها صدقني انا مكنتش متأكدة من مشاعري ..وبعدين مش لوحدي الي قصرت ..انت كمان لما مشيت لا سألت عليا ؟ ولا سألت انا رحت فين .. ولا حتى كلمتني مرة ..ساعتها اتأكدت ان الصح الي انا عملته ده ..
وليد : مين قال كده ؟؟بالعكس قعدت ابعتلك في رسايل ومسجات ..بس انتي الي مردتيش ..فقلت اكيد هي مستريحة كده
امنية : امتى ده !! والله ما في اي حاجة وصلتني منك ..ولا جالي منك اي حاجة ..ولا حتى تلفوني رن بأسمك ..ولا الفيس بتاعي جاله نتفوكيشن منك .. ده انا كنت بستنى الثانية الي هلاقي منك اي اهتمام ..
وليد : بنصب عليكي انا ..؟؟
امنية : مقلتش انك كداب ..بس انا بردو مش بكدب ..
وليد : مصدقك ..
امنية : ممكن نبقى زي الاول ؟
وليد : مش متأخرة شوية ؟
امنية : صدقني انا المجروحة اكتر منك هنا ..
وليد : والله !! متعرفيش انك اول واحدة اثق فيها ؟ و اول واحدة في حياتي احكيلها تفاصيل عني ..أنا وثقت فيكي ..وقلت انتي الوحيدة الي هتكملي معايا للممات ..وقلتلك قد ايه انجرحت من الناس ..وقد ايه الي بثق فيهم بيسبوني .. ومع ذلك عملتي كده فيا ؟؟... ايه الي انتي بتقوليه ده ؟؟@@
امنية : طب انت جوه قلبك عندك خبرة من الفقع مع الناس ..لكن انت كنت اول حبي .. انا كنت متوقعه منك انك هتتمسك بيا اكتر من كده عشان محتاجني ..عشان وثقت فيا ..لكن فضلك مكانك ومجرتش ورايا مرة .. ولا حتى دورت عليا .. انا فكرت ان كل ده كان لعب عيال .!!
وليد : ملهوش لزمة الكلام ده دلوقت ..
(انجي ماسكة قلبها لصوت دقاته يعلى .. ازاي وليد الشخصية المرحة اللعوبة دي مستخبي وراها كل ده )
امنية : بس كان لازم اوضح نفسي قدامك ..انا بقالي اكتر من سنة نفسي اقولك الكلمتين دول ..لازم تعرف قد ايه انا حزينة اننا افترقنا ..وانك حتى محاولتش تتمسك بيا ..قال ايه ..جي تقولي دلوقت .."انك مفكر اني كنت وقتها مرتاحة" ؟؟ انت بتهزر ؟!! .. يبقى مفهمتنيش ..
وليد : بس مش هينفع نرجع زي الاول ..
امنية : صدقني انا كمان متأكدة اننا مش هينفع نرجع زي الاول .. عشان كل ما اشوفك او ذكرياتك بتيجي في خيالي ..بتألم ..انت كل ذكرياتك مؤلمة :( ..
وليد : يا شيخة ؟ مفيش يوم حلو معايا ؟
امنية : لو هقارن ..واعمل نسبة وتناسب ..انت اهملتني ..و شغلتني بمشاكلك اكتر ما اهتميت بحبنا ..
وليد : ما عشان كده قررت اتغير ..
امنية : صدقني في واحدة مناسبة هتحبك زي ما انت ..وتقريبا مكنتش انا هي دي ..
وليد : كلامنا طول اوي ..
امنية : انا ارتبطت ب حامد ..لو لسه فاكره
وليد : مبروك ..
امنية : من غير نفس ؟
وليد بابتسامة : مبرووووووووووووووووووووووووووك
امنية ضحكت : يا سم ..
(انجي حست ان نفس الموقف بيتكرر ..زي ما حصل معاها ..قررت انها تنسحب من الطرابيزة وهي متخفية وتظهر للعلن قدامهم ... وانجي بتتسحب ..الحوار اخد مجرى تاني )
وليد : يا ستي من قلبي والله مبروك
امنية : مش هنفرح بيك ؟؟
وليد : لسه ..
امنية : المهم انا وش عزماك ع الفرح ..بس عندي طلب
وليد : لو قدرت اعمله ..اوعدك
امنية : حامد ..عايز يشتري اسهم في الشركة الي انت شغال فيها ... انا عارفة كويس ان والدك رئيس مجلس ادارة ..وكلمت حامد اني هقولك .. واعتمدت انك تسهل الاجراءات ..
وليد بص حواليه ،ليكون حد من الشركة حواليه : هس ..وطي صوتك
امنية : ايه ؟؟
وليد : محدش يعرف اني ابن صاحب الشركة .. يعني قرايب من بعيد ..تشابه اسماء ..كده ..
امنية : هي تهمة يعني ..
(ساعتها وش وليد كان مخضوض ومخطوف .. انجي افتكرته خلاص مش قادر يكمل القعده دي مع البنت الي جاية تكلمه عن ازاي حياتها بقت احسن ..)
انجي دخلت ع الطرابيزة وقالت : اوه .!! وليد .. انت هنا وانا بدور عليك ؟
وليد فجأة تف الماية الي كانت في بقه ..استغرابا واندهاشا
امنية تنحت في انجي وبصت لوليد : انت تعرفها ؟
انجي : كلمني هنا يا وليد ؟؟مين دي ؟!
امنية بلعت ريقها وبصت لوليد ..وليد مش عارف يقول ايه ..!! بجد هيقول ايه .. لقى انه الاسهل يقدم امنية لأانجي
وليد : انجي ..دي امنية ..صديقة الطفولة ..و العمر ..سليمي عليها .. دي الي حكتلك عنها قبل كده ..(واتك ع الحروف)
انجي : طبعا طبعا .. اهلا واسهلا يا انسة !
امنية : اهلا بيكي ..(شاورت بايديها لوليد ..مين دي ؟)
انجي : مش يلا يا وليد ..اتأخرنا ع الشغل ..
وليد قام من الطرابيزة بسرعة ..,امنية عينيها بتلف في كل مكان ..
وليد : هعمل الموضوع الي انتي عيزاه لا تقلقي ..
امنية هزت رأسها : شكرا ..
انجي : يلا بقى ..

انجي اخدت ايد وليد ..وطلعت بسرعة من المطعم .. وليد مصدوم ..
انجي : ها ؟ جيت في الوقت المناسب ؟
وليد : ايه جو النينجا ده ؟
انجي : مش بس انت الي بتنقذ الناس وبتساعدهم ..انا كمان ..(وعدلت ياقة الفستان)
وليد فطس من الضحك : انتي طلعتي حكاية ..
انجي لوت بوزها : حكاية ايه ؟ انت طلعت حاجة من جوة غير برة ..
وليد : مش فاهم ..
انجي : انا اسفة انا سمعت كل الحوار ..وعرفت امنية والي عملته معاك في الماضي.. اسفة بس سمعت من غير ما اقصد وليد بسخرية : ازاي من غير ما تقصدي !! الكلام مشي لحد ودنك ..ولا كنا بنتكلم في الاذاعة وانتي ضبطي المحطة ع التردد
انجي : اسفة بجد ..
وليد : فاكس .. المهم انا حاسس اخيرا اني شميت هوا ..زي ما يكون الدنيا بقت ربيع فجأة ..
انجي ابتسمت ..
وليد : ايه ده !! ضحكتي ... ايووووووووووه يا جدع اخيييرا ..
انجي : هو انا كشرية يعني ؟!!
وليد : مش قصدي بس اخيرا ..حاسس قلبك مال شوية ..
انجي ضحكت ووطت رأسها في الارض .. ومشت للشركة
وليد اتنطط ع الرصيف ..ايووووووووووووه ايووووووووووه

Yes yes :D
انجي : انت مجنون ..

وليد : في حبك .. و ابتسم
،
،
،
،
يتبع
،
،
،