المسا .. كوثر قالت لمحمد نحن طالعين يامحمد.. قال ليها طيب اوصلكم بالعربية وانتظركم في حته.. قالت ليهو لا نحن تلات حريم بناجر لينا تكسي.. ولا نركب مواصلات الواطة بدري والحتة قريبة .. (قريبه يا ثعلبانه؟ )
المهم محمد قاليها ماشي يا كوثر راحتكم..
طلعت ولقت تهاني لابسة راجياها .. قالت ليها ياتهاني انتي مستعجله اكتر مني،
شنو الحكايه؟ لكن لقيتك اسنانباي .
تهاني قالت ليها بصراحة .. انا حارقني الشمار.. دايره اشوف الكاتل الجداده منو فيكم .. هههه الاتنين ضحكن وطلعو ..
طول الطريق كوثر تكرر لتهاني . والله ياتهاني.انا اصلو ما مرتاحة .. كوني امشي وما اكلم محمد..
قالت ليها ياكوثر عليك الله ماتلخميني .انت هسي قايلاهو قاعد يكلمك باي حاجه.؟هو زاتو تلقيهو بعمل في حاجات بوراك بدون مايقول ليك. الرجال ديل يالطيف .. غايتو انا ابو المعز ده مابثق فيهو نهائي .. ده زوجها .. (والله دي مشكله) .
اها يازول وصلن الدكتوره . وعملن الكشوفات والتحاليل المعمليه .. والدكتورة قالت ليها ياكوثر انت ماعندك اي مشكله .. بالعكس كمان خصوبتك زايده .. المساله بتتوقف على زوجك .لازم يعمل الفحص المعملي ...
اها طبعا كوثر فرحت فرح مخوزق .
زي الزول القالو ليهو .. (انت جيت اول السودان.وابوك مات).. !!
اتاكدت انها سليمه .. وحبيب قلبها عاقر !!
نفسها تجيب طفل يملا حياتها .. ويخرس السنة الناس.ومتمسكه بمحمد وبتحبو . فقدامها خيارين.. يااما تفارق محمد .. وتتزوج تاني .. وتحققا امنية حياتها. يااما تستمر مع محمد ..وتقنع من حاجه اسمها جنا..
قامت قالت لي تهاني .. ياتهاني انتي رايك شنو؟ .. وانا اعمل شنو ؟
قالت ليها انتي كدا عرفتي العيب من محمد .. الاجابة على السؤال ده بتتوقف عليك ..
يامحمد .. يا الجنا .. لازم تختاري وبسرعة لانو الزمن مافي صالحك .. اذا عايزة الجنا لازم تقنعي من محمد .. وتطلقي بسرعة .. عشان تشوفي راجل من بدري تجيبي ليك منو طفل طفلين قبل العمر مايسرقك .. ولوكمان بقيتي على محمد ..المفروض تبقي لابتة ورضيانة .. وتاني ماتجيبي سيرة الجنا ..
لكن انا نصيحتي ليك امسكي في راجلك ده .. والله الزيو نادر في زمنا ده . تمشي تكوسي للجنا تقعي ليك في راجل عواليق .. تكرهي الجنا وتكرهي روحك .. وتندمي على فقدان محمد وحيث لاينفع الندم ..
طبعا زي ماشايفين تهاني زولة منطقية لحد بعيد ..وماعندها اي عواطف وبتحسب الامور حسابات بتاعة ناس امسك لي واقطع ليك ..
وجات راجعة البيت ماعارفة تقرح وللا تزعل .. وبقت شايفه محمد بمنظار مختلف من الماضي لانها قبيل ماعارفها العيب منها وللا منو .
لكن هسي اتاكدت انو العيب منو .
وكل السرحات والحاجات ديك راحت .. ومحمد ما اكتشف انو هي مشت للدكتور بوراهو ..
ومرت الايام وكوثر بدت تسرح من جديد .. ياربي انا اعمل شنو .. خصوصا وقت تمشي ليها مناسبة .. وتشوف الشفع بلعبو . وبدلعو فوق امهاتهم .. تحس بي حسرة من جواها ..
اها يوم يازول كانت في مناسبة .. شافت ليها مرة نايمة جوة الغرفة والغرفة مسخنه والمراه عرقانة .. جا ولدها عمره اربعة سنة .. بدا يقش ليها في العرق من جبينها ..
المشهد ده أثر علي كوثر تاثير شديد خلاص .. وقررت الليلة تتكلم محمد وتطلب منه الطلاق بطريقة دبلوماسية ..
وبقت تتكلم براها زي المجنونة . ااي انا بحبو ومابقدر اتخلى عنه .. لكن انا اعمل شنو ؟ هو عاقر ومابيلد .. يعني انا عشان بحبو لازم اضحي بي حياتي وسعادتي؟؟
ومالو انا ممكن اعرس تاني؟؟ والقى لي راجل احبو اكتر من محمد .. ويحبني .. والقى منو الجنا .
ولمن جات البيت اترددت تردد غريب .وماقدرت تقول حاجة ..
اها يوم من الصباح حصل بيناتهم نقاش عادي ..زي البيحصل بين اي راجل وزوجته .
قامت قالت ليهو في اثناء النقاش . انت اصلك زول اناني وبتحب روحك ..
قال ليها انا ؟ انا اناني..!! وبحب روحي ؟ !!سبحان الله ياكوثر !!..
قالت ليهو ايوة .. انت لو ما اناني ..كان مشيت معاي الدكتور .. وكشفت على روحك .. انا خلاص تعبت يامحمد ..
قال ليها بس انتي القلتي نمشي الدكتور .. وانت الاجلتي الموعد . وانا منتظرك لي شهر . منتظر اليوم البتقولي لي فيهو ارح .. انا اصلا" ما مصر شديد على الحكاية دي ورضيان باي حاجة ..
قالت ليهو بس احتمال يكون في مرض .. موش المفروض نتعالج..؟
قال ليها خلاص فهمت ياكوثر .. بعدين نمشي طوالي .. ماعندك مشكلة ..
وبالاختصار كدا المساء مشو للدكتور .. وعملو فحوصات وتحاليل كاملة .. الاتنين مع بعض .. طلعت النتايج كالاتي ..
محمد سليم مية في المية وبكمية حيوانات منوية مهولة ..
كوثر التهابات حاده في المبايض .. ههههههههه
طبعا ..كوثر اتفاجات مفاجأة شديدة .. وبقت تقول لي لمحمد مستحيل مستحيل .. انا ما كان عندي اي حاجة .. انا كنت كويسة .. وخشت للدكتور وبدون ماتحس قالت ليهو بس انا يادكتور .. دكتورة فلانة قبل شهر ..قالت لي انتي سليمة ..
محمد بقى يعاين ليها مندهش .. وفي عيونو الف سؤال ..
الدكتور قالت ليها الاخطاء في التشخيص واردة يا مدام .. واحتمال الالتهاب جاك قريب ..
انتي استعملي الحبوب دي .. وتعالي لي بعد اسبوع ..
ومحمد مربوك ربكة غريبة في كلام كوثر بتاع انها الدكتورة قالت ليها ..وقالت ليها ..وجواهو سؤال هو (المراة دي متين مشت لدكتورة؟.. وليه ماكلمتني؟ )
وهي زاتها ماعارفة الكلمة دي طلعت منها كيف.. المهم نشوف البيحصل ..
الى اللقاء ..ان شاء الله ..
أنت تقرأ
المسؤولية .. طارق اللبيب
Short Storyمن الروايات التي ربما تسبب للقارئ نوع من الحيرة والانشغال الفكري .. ولكنها قضية .. قضيه في مجتمعنا تحتاج منا للنظر الفاحص .. والذهن المتفتح .. في علاج المشكلات.. والوقاية منها قبل وقوعها .. وهي رواية قد تختلف عندها الاراء .. وتتباين فيها وجهات النظر...
