فخري طلع سريع ..رجع تاني لبيت ناس شاشوقة .. وكت وصل ..الحجة قالت ليهو .. اها ان شاء الله خير ياولدي ..قال ليها انا لازم اخد اقوال شاشوقة ..لازم لازم يا حجة ..
قالت ليهو ده متل السما للوطا .. مابتطلع ليك ..
اول حاجة انا راجلي حالف علي ..دايرني اكسر حليفتو هو ميت؟
قال ليها ياحجة راجلك الله يرحمه .. خلينا نمشي مع القانون .. قبل ماتحصل ليكم مشاكل وجرجرة محاكم .. وسجون وفضايح انتو غنى عنها ..
قالت ليهو خلاص امش اتكلم معاها .. من خشم الاوضة من بره ..
الاوضة كانت مقفولة .. جا وقف جنب الباب وسمع صوتها بتقرا في القران ..
قال ليها يا اشتياق سلام عليكم .. انا اسمي فخري .. امك في خطر واحتمال تتسجن .. وبتك الولدتيها عايزة تنتحر .. لو ماجيتي طالعة .. ربنا بحاسبك والله ..
طوالي وقفت القراية وجات فتحت الباب ..
فخري ده لمن شافها اتخلع قرب يقع .. من شدة الشبة البينها وبين نور ..
المراة بالله زي النجفة ..نار مولعة .. نفس وقفت نور .. ونظرتها وعيونها .. وعلامة الصلاة مسودة على جبهتها ووشها يشع نور ..
قال ليها تعالي وراي للصالون ..
جات وراهو .. ماشة نفس مشية نور .. والتكفو والهدوء .. وقعدت في طرف السرير .. ولامة جسمها وكرعيها ومدنقرة ..
فخري ده لمن جاتو خوفة من شدة الشبه والتشابه بين البت وامها ..
وامها قاعدة فوق الكرسي الهنا داك .. وفخري قاعد في كرسي مقابلها .قال ليها سيبي المسكنة..واحكي لي الحصل معاك براحة كدا وبهدوء ..
قالت ليهو انا ماعملت غلط .. انا عايزة بتي..
انت عرفتها كيف انها بتي انا؟ قال ليها البشكير البمبي والخيط الاحمر متذكراهم ..
طوالي دميعاتها كبن ..وقالت ليهو .. انا عارفة بتي بترجع لي وان طال الزمن ..
انا كلمتهم هم ماصدقوني .. قلت ليهم البت بت عبد الرحمن .. ما بت حمد ..
انا ماعملت حرام ..
قال ليها عبد الرحمن منو؟
الحجه : قالت ليهو عبدالرحمن الجياشي .. لكن ياولدي عبد الرحمن ده لاشافها لاشافتو .. وهاجمه فوقو القصة دي .. عشان هو مات في الجنوب .. وتاني مابجي .. دي واحدة كضابة .. الا كانت معاهو قبال العقد .. لكن بعد العقد كضابة كضابة ..
شاشوقة قالت ليهو انا مابقدر احكي اكتر من كدا ..
الحجة قالت ليهو .. اها ياهو ده الكلام الماسكه فيهو عشرين سنة ..
فخري قال ليها لازم تحكي ياشاشوقة.. وسريع عشان انا ماعندي وكت ..
بتك في خطر .. واحتمال تقتل روحها ..في اي لحظة بتك حية .. وبجيبها ليك والله ..
قالت ليهو خلاص .. قول لي امي تطلع برة ..
امها طلعت قعدت في كرسي تحت النيمة البرة ..
شاشوقة قالت ليهو انا خجلانة من الكلام لكن بحكي ليك ..
عبد الرحمن ده حبيبي .. وعلاقتنا استمرت خمسة شهور .
يوم العقد زاتو عبد الرحمن جاهو استدعاء من الجيش .. انو يبلغ القيادة الساعة 7صباحا تاني يوم .. الاستدعاء كان بعد العقد بساعة بس ..
قام ضرب لي تلفون في تلفون البيت .. وقال لي لازم نتلاقى بالليل .. وانا امي محذراني اني الاقيهو ..
وقالت لي عيب تلاقيهو بعد العقد .. الا بعد العرس والكرامة ..
وهو كان مصر يلاقيني .. وانا سمعت كلامو هو .. وقلت ليهو طيب نتلاقى كيف ؟
وكنت متشوقة اني الاقيهو .. قال لي انا بخت ليك جركانة فيها موية فوق الحيطة .. انت بعد العشاء خلي امك وابوك وعثمان اخوك يشربو منها ..انا عامل فيها منوم ..
وبجيك بالليل في البيت .. وهم ماحيصحو بينا ..وفعلا خت الجركانة وانا شلتها ودسيتها .. وكبيتها في جك العشاء وكلهم شربو ونامو نوم شديد ..ضربت ليهو
وعبد الرحمن جاني وعدا معاي الليل داك كله ..
ووعدته اني ما حأكلم زول نهائي وحلفت ليهو ..
وعبد الرحمن سافر تاني يوم .. ورسل لي ورقة الطلاق وكتب لي معاها .. قال لي انا تاني ماجاي راجع ..
نحن كتيبتنا عاملين تعاهد على النصر او الشهادة .. وفعلا فيما بعد قالو استشهد .
اها لمن اتقدم لي الزول التاني الاسمو حمد . ماقدرت اقول ليهم عبد الرحمن دخل علي ..
وفعلا حمد مامساني نهائي .. والحمل ظهر وشكو فيني .. وانا ماقادرة اقول كلام ..لاني مابقدر اقول لناس ابوي وامي انا عملت ليكم منوم ودخلت عبدالرحمن البيت ..
وعليك الله ماتحكي لامي الكلام ده .. في النهاية عبد الرحمن استشهد .. وانا ماعايزة اطلع فيهو كلام شين ..
قال ليها بالجد انتي زولة مسكينة والغنماية تاكل عشاك ..
احسن تقولي كدا ولا احسن يتهموك بالحرام .. وتشردي بتك عشرين سنة .. وهي محرومة منك وانتي محرومة منها ..
قالت ليهو مرة حكيت . لامي جزء من الكلام وماخلتني اكمل كفتتني .. وقالت لي انتي كذابة .. انتي قلتي عبد الرحمن مالاقيتو .. عشان كدا نحن عرسنا ليك بدون عدة .. دايرة تفضحينا انتي ..
فخري قال ليها فعلا دي مشكلة .. وعقدة كبيرة لكن انا بحلها .. انتي ماتشيلي هم ..
وانا بوعدك ان شاء الله .. القى ليك مخرج .. انتي ونور واجمعك بي بتك قريب ..
والحجة برضو لمن هو جاي طالع .. قالت ليهو اسمع ياولدي .. اوعك تجيب لينا بت حرام في البيت ده .. نحن مابنقبلها .. قال ليها بوعدك ياحجة لو اتأكدت انها كدا .. مابجيبها ليكم ابدا .. وفحري طلع فرحان سبحان الله عكس الحالة المرق بيها قبيل ..
ياسلاااااام والله فخري ده فرح فرح .. مع انو كلام الحجة .. بيوحي انو اشتياق كذابة كبيرة .. بس هو عايز يتعلق بالكلام ده ..
نشوفو الزول المسلط ده ح يسوي شنو؟
..الى اللقاء
أنت تقرأ
المسؤولية .. طارق اللبيب
Short Storyمن الروايات التي ربما تسبب للقارئ نوع من الحيرة والانشغال الفكري .. ولكنها قضية .. قضيه في مجتمعنا تحتاج منا للنظر الفاحص .. والذهن المتفتح .. في علاج المشكلات.. والوقاية منها قبل وقوعها .. وهي رواية قد تختلف عندها الاراء .. وتتباين فيها وجهات النظر...
