بدات بكذبة

الجزء 4

كانت تصويرة ديال لغلاف ديال شي مجلة فيها واحد لولد باين لاباس عليه و مزيود في فمو ملعقة من دهب، لابس كوستوم كلاس و حاط يدو على كرافاط ضايرة على عنقو بحالا باغي يحيدها و كتبان واحد لمكانة فاخرة في يدو، غير من شوفة ديالو كيبان شي رجل أعمال غني، a gentlemen، و أنا كنحقق في تصويرة بشرى قالت:متكدخلش لعقل، يالاه 24 عام و عندو أكبر الشركات في ميريكان و أكبر لفنادق في المغرب، من أصغر لبيليونيرات في العالم... أولا إفريقيا مانعرف، مهم مزدوج الجنسية و سعدات هاد لبنت لي غادي طير بيه" ستغربت و قلت:24 عام و بيليونير؟! كيدار ليها؟!" -بشرى: وا في الصراحة را هو الوريث الوحيد ديال أم أمريكية و أب مغربي، يعني را لقى كلشي مكسكس، ماماه ماتت مني كان عندو 20 عام و كانت قبل مخليا ليه في إسمو الشركات ديالها، و شي شهر دابا مات باباه و ورت جميع اﻷملاك ديالو لي أغلبها هنا في المغرب، و بهادشي ولى بيليونير" بقيت ساكتة كنسمع ليها حتى سالات و قلت:مسكين!" شافت فيا و هي مستغربة:مسكين؟ را نتي لي مسكينة" ضرت جيهت حوايجي و قلت:كنفضل يكون عندي واليديا على تكون عندي لفلوس" بشرى مابقات قالت والو حيت عرفاتني تفكرت بابا، و موضوع لموت ديال بابا موضوع حساس عندي، بقى واحد الصمت غريب في لبيت لشي ثواني و أنا نقول:يالاه نوضي شوفي معايا شنو نلبس" فعلا ناضت بدات كتشوف معايا في لحوايج، دازت واحد المدة عاد قررت شنو نلبس، صاية طويلة كحلة و شوميز قصيرة في لغوز و درت فوقها جاكيت ديال دجين، درت شوية ديال لماكياج و صافي خرجنا من لبيت، نزلت عند ماما لتحت علمتها راني غادا للحفلة، ركبت في طوموبيل ديال بشرى و شدينا طريق للحفلة لي منها أتبدل حياتي، أولا إن صح القول أنبدا فيها لكدوب...
وصلنا لقدام باب لمدرسة، دخلنا و تاجهنا جيهت لقاعة لي كينظمو فيها الحفلات، اﻷساتدة جالسين في قنت و الطلبة في قنت آخر و المنصة في جنب القاعة، دخلنا، جلسنا على كرسي بعيد على بنادم و بقينا حاضيين لغادي و جاي، شوية سمعت صوت المدير على المنصة كيقول في كلمة تهنئة للطلبة اﻷوائل، بشرى طلعات المنصة باش تلقى الجائزة كيفما متوقع و أنا بقيت جالسة بوحدي، حسيت بشي حد وقف حدايا، ضورت راسي بشوية باش نلقاه أيوب، واقف و كيشوف فيا بعينيه لكحلين، بتاسمت و أنا كنتسناه يهضر، في نفس الوقت مستغربة حيت لجين مالاصقاش فيه، من نهار تصاحبات معاه و هي مخشية فيه، ماكينش ثانية كيبقاها بوحدو مسكين، من بعد عاد لاحظت لجين واقفة حدا المنصة و هازا ميكروفون في يدها، ماعرفتش علاش ولكن مزيان تبعد شوية حيت توحشت نهضر مع أيوب لي صوتو كسر التفكير ديالي و قال: سندس cava؟" بابتسامة صغيرة و عينيا كيشوفو في رجليا جاوبت: الحمد لله" حسيت بيه قرب لجيهتي، حط يدو على كتفي و قال:ماعرفتش شنو لمشكل بينك و بين لجين ولكن مايمكنش صحبة سبع سنين ضيع في نهار" لحاجة لوحيدة لي مافضحاتش لجين هي اﻹعجاب ديالي بأيوب، و الدليل هو تاواحد ماعارف را حنا مضاربين على قبل ولد، واقيلة حتى لجين ماراضياش تكون مخاصمة مع صحبتها على قبل ولد! هزيت راسي شفت في أيوب و يالاه بغيت نهضر أتا قاطعنا صوت لجين: أيوب بغيتك عافاك" -أيوب:شنو؟" -لجين:أجي معايا نقوليك" -أيوب:بغيتي تقولي شي حاجة قوليها لي هنا، ماغادي معاك فين" حاولت مانضحكش ولكن خرجات لي الضحكة بزز، لجين ماحملاتش راسها، خنزرات فيا و قالت:سمعتي شي حاجة كضحك؟"جاوبتها و انا دايرة يدي على فمي باش مانزيدش نضحك:لا والو" قربات ليا و هي كتلعب بلميكروفون لي في يدها و قالت:شوفي نتي، أتبعدي على حبيبي أولا مايعجبك حال" دفعت لكرسي و وقفت باش نواجهها:غير بصحتك بيه، تاواحد ما ماديها فيه غير واحد النصيحة في وجه الله باراكة ماتبقاي لاصقة فيه، راك خنقتيه " دارت يدها على جنابها و قالت: ولات لقضية هاكا؟" درت حركة براسي باش نقول آه، طلعات و هبطات فيا مزيان بحالا ناوية على خزيت، طلعات حاجب و نزلات حاجب و بدات كتعوج في فمها، سكتات شوية و قالت: عارفاك غير كتغيري" مارضيتش نبان راني بصح كنغير قدام أيوب، يالاه بغيت نهضر و هي تعاود تقول: عارفة بلي كان كيعجبك أيوب، ولكن ديك ليام سالات، أيوب ديالي أنا" حسيت براسي تزنكت و مارضيتش حيت أيوب واقف حدانا و كيشوف فينا و دابا أيكون عرف بلي راه كيعجبني، ولكن دغيا جاوبتها و قلت: علاش أنغير؟" درت ضحكة مجهدة ماعرفتها منين خرجات، مابقيت حتى عارفة أنا شنو كندير، مابقيتش كنحاول نهضر، لكلام ولى كيخرج بوحدو من فمي: أنا على علاقة مع فارس أحلام كل بنت، حسن من أيوب بمئة درجة" لجين ستمرات في تخنزير،ربعات يدها و قالت بصوت ديال مامتيقانيش:و شكون هو؟" دابا حصلت، ماكنتش ناوية هادشي يوصل لهاد الدرجة، عقلي حبس التفكير و وليت كنحاول نقول أي إسم جاني في بالي، أي إسم كيفما كان، ديال بلعاني أولا ديال بصح، مهم إسم يخرجني من هاد لفضيحة مع لجين و صافي، ولى واحد سقيل في لحفلة، مارديتش ليه لبال حتى شوية سمعت شي صوت جاي من مكبرات الصوت ماكنتش متأكدة بلي راه صوتي: أنا على علاقة مع آدم العمراني" قلت و أنا مربعة يدي باش نخبي صباعي لي كيترعدو، فينما كنكدب صباعي كيبداو يترعدو بوحدهم، ولكن بلاتي، مكبرات الصوت؟ أش جاب مكبرات الصوت للهضرة؟! حدرت راسي، بان لي لميكرو شاعل،لجين كانت شاعلة لميكروفون و لهضرة لي قلنا كاملة تسمعات