بدات بكذبة

الجزء 20

وصل نهار عيد ميلاد آدم، تافقنا على كلشي، كيفاش غادي نديرو التمثيلية ديالنا قدام مادام بنسودة لي هدا هو اﻹسم ديالها باش نكونو أحسن ثنائي و آدم ينجح باش يعقد معاها صفقة! كنت خارجة كنتسكع في لوطيل، حفظتو كامل، ماخليت كولوار مادزتش منو، حتى من لكوزينة حفظتها، عييت و أنا نرجع للغرفة ديالي، حليت لباب دخلت كيبان لي شي حاجة محطوطة فوق ناموسية، قربت و بانت لي كسوة طويلة حمرة ديال الحفلات و بلكمام حد المرفق و مشبكين، هزيتها فرحانة، محطوط فوق منها ورقة مكتوب عليها "wear me" أو "لبسيني" حدا لكسوة محطوط صباط عالي حمر حتى هو، مونطو شيك في لبيض و قفازات أو ليكات بيضين، مع عقيق و حلقات بيضين، عرفت آدم لي حط هاد لحوايج هنا على قبل العيد ميلاد، ولكن بيني و بينكم الدوق ديالو راقي واخا حول، ماشي ديما ولكن مني كيتعصب كيحوال و عينيه كيكحالو! شفت الساعة كان وصل الوقت باش نوجد راسي على حساب الحفلة لي أتبدى مع 7h، لبست لحوايج لي جاب لي آدم، درت لماكياج ولكن هاد لمرة بكل فرح، ماعرفتش شنو تبدل فيا، ولكن كنت باغا نحاول نبان زوينة، هزيت واحد لعكر حمر و درتو على فمي، وليت كنبان بحال لكلونة، يالاه بديت كنمسح فيه سمعت دقان في لباب، أيكونو غير خدمة الغرف، خليت لعكر حتى نرجع و نمسحو، حليت لباب كيبان لي آدم واقف في كامل أناقتو و شياكتو، كيف شافني و هو يبدا يكحب بحالا شي حاجة وحلات ليه، عينيه غرغرو، كان خاص التدخل السريع، هزيت يدي حتى لسما و نزلت عليه بتقرفيدة على عنقو حتى غوت: سندس قصحتيني" دغيا جاوبت:سمح لي ولكن..." تفكرت لعكر لي دايرة و عرفت بلي خلعتو، غطيت وجهي بيدي بجوج و رجعت كنجري بغيت ندخل للغرفة حتى حسيت بيد آدم جراتني من يدي خلاتني نضور نشوف فيه، كنت قريبة منو بزاف، حيد لي ليد اﻷخرى لي كنت مازال كنحاول نخبي بها وجهي، شاف فيا مزيان و قال: علاش مخبيا وجهك" جاوبت و أنا كنتفتف، ماعرفت شنو وقع لي: كنت مخبية...حمر...كلون" هادشي لي قدرني عليه الله نخرج مع فمي، آدم بتاسم و أول مرة نلاحظ بتسامتو زوينة أولا أول مرة يبتاسم بلا مايكون عايرني، قال بصوت هادئ و حنين: لا..." هز لي راسي بيديه حتى عيني تقابلو مع عينيه، كيبانو عاديين ماشي حولين، بالعكس كيبانو زرقين و كيبريو، كمل و قال بنفس اﻹبتسامة و الصوت:كتباني زوينة" حسيت براسي تزنكت ولكن الحمدلله دايرة فاراجو يعني مابانتش تزنيكة، حدرت راسي بالخف و دخلت كنجري الغرفة و سديت الباب شحااال حتى سمعت آدم قال:ماناوياش تخرجي؟ أنتعطلو" شحال و أنا كناخد في نفس عميق عاد زعمت حليت لباب و خرجت، مشيت مع آدم و أنا حادرة راسي، ماشي حشمانة، عجبني صباط حمر و بقيت فينما نزيد خطوة كنطل عليه حيت لكسوة مخبياه! طلعنا في سانسور و نزلنا للسفلي، العيد ميلاد كان دايرو في قاعة حفلات لي ماعارفاش فين كاينة أولا شنو سيمتها واخا هدر ليا عليها آدم بزاف ولكن ماتسوقتش ليه، خرجنا مع لباب ديال لوطيل، بانت لي طوموبيل كحلة واقفة يسحب لي هي ديال آدم، مشيت مكدمة حليت لباب و طلعت أتا كيبان لي واحد بنادم عمري ماشفتو، كيبان مازال صغير حروفو كحلين ولكن أش كيدير في طوموبيل ديال آدم، يكون زعما شي صاحبو؟! بصوت مخلوع سولت: شكون نتا؟ و شنو كدير هنا؟" جاوب و هو مستغرب : أنا؟ نتي لي شكون؟..نتي لي في طوموبيلتي" خرجت عيني و بديت كنتقابح معاه: شنو؟ جمع راسك، هادي طوموبيل ديال آدم" جاوبني و هو مبتاسم، عرفني واقيلة متلفة نوامر و قال: لا أ زويونة، هادي طوموبيلتي، أنا سعد... سعد لمجرد" طلعت حاجب و نزلت لاخر باستغراب، كمل، قال و هو كيضحك: لا غير كنضحك، أنا سعد بناني" ضحكت حتى أنا حيت قولبني وا بعدا ماشي كاع ناس لي لاباس عليهم معقدين بحال آدم، عندهم سنينات و كيضحكو، جاوبت سعد و قلت: و أنا سندس،..." مازال ماكملت لهضرة لباب ديال طوموبيل لي تحل قاطعني، كان آدم كيطل عليا و قال: سندس ها نتي، شحال و أنا كنحاول نقوليك بلي طوموبيل ديالنا هي لي لور و ماشي هي هادي ولكن نتي تخشيتي في هادي... خرجي" كان موقف محرج ماعرفت ماندير من غير نقول بسلامة لسعد و نزل، وقفت حدا آدم لي قال: سمح لي على... سعد؟!" -سعد: هي نتا هو آدم!" شنو وقع لشخصيتو لمرحة ديال قبيلة؟! كيبان بحال شي واحد شاف أعدى شخص عندو، بحال لجين مني كتشوفني، آدم حتى هو قال: saad....how long has it been؟! سعد...شحال دابا ديال لوقت؟!" ماكانش كيتسمع فرحان، علاش ماكيتحاملوش؟! يكونو خوت زعما؟ لا ماعندهمش نفس النسب! سعد جاوب من بين سنانو:" years hasn't؟! سنوات لا؟!" التعابير ديال وجههم خلعوني، جريت آدم من يدو و قلت بصوت حادر:آدم يالاه...غادي نتأخرو على الحفلة ديالك" آدم ضار شاف فيا بلطف و قال: واخا حبيبة" أجي بلاتي، واش يالاه آدم قالي حبيبة أولا كدبت؟! آدم رجع شاف في سعد و قال: كيبان لي بلي تلاقيتي بخطيبتي..سندس" كنحس براسي بحال ضبعة مافاهمة شنو واقع قدامي، غير حالا فمي و كنشوف، آدم عاود قال: well see you later okay؟! إوا نتلاقاو من بعد وخا؟!" سعد طل عليا من داخل طوموبيل و قال بابتسامة:بسلامة سندس، شرف لي نتعرف عليك" جمع اﻹبتسامة و بصوت حاد شاف في آدم و قال: see you later adam نتلاقاو من بعد آدم" آدم سد لباب بجهد شوية و مشينا جيهت فين كاينة طوموبيل لي كان خاصني نركب فيها