بدات بكذبة

الجزء 7

وصلت للدار، عطيت لماما لخيط لي صخراتني نجيب و فكرت نعاود ليها على لكدبة لي كدبت، تقدر تعاوني، يالاه قلت:ماما بغيت نقولك شي حاجة" في نفس الوقت ماما قالت: جابك الله أ سندس، شوفي عافاك هاد لقفطان، كيف جاك؟" واو قفطان في لكرونة رائع، كيبان بحال ديال اﻷميرات، كنحسد بعض المرات ماما على الموهبة لي عطاها الله ديال لخياطة و لفصالة، فنانة مبدعة بامتياز، ماشي بحالي، ماكنعرف لا نطيب، لا نخيط، لا نشطح لا نغني، عسرية في كلشي، فنانة غير في لكدوب. ماما كتشوف فيا و كتسناني نجاوبها:الصراحة أماما هادا أحسن قفطان شفتك درتي" ماما نقزات بالفرحة و جمعات يدها عند سدرها بحالا صفقات:بنتي هاد لقفطان أنشارك بيه في واحد المعرض" فرحت كتر من فرحتها بزاف، أخيرا جزء من طموحاتها أتحقق، و طموحات ماما هي طموحاتي حتى أنا، مني شفتها فرحانة ما بقيتش باغا نصدع ليها راسها بمشاكلي، باﻷخص مشاكيلي بايخة و باديين غير من تخربيق. طلعت لبيتي و سديت عليا، من بعد هاد اﻷحداث كاملة لي وقعات لي مؤخرا حتاجيت شوية ديال لوقت نجلسو مع راسي و نراجع حساباتي وخا مافيهم مايتراجع، راني دايراها قد راسي! من بعد ماتغديت رجعت تلاحيت فوق ناموسيتي، حطيت راسي على لمخدة و حسيت براسي ترخيت، شحال خايب تولف نعاس مورا لغدا! نعست شي ساعتين أتا فيقني صونيط ديال بورطابلي مجهد، بعيني مغمضين لحت يدي لجيهت بورطابل و هزيتو، قبلت المكالمة، حطيت بورطابل على ودني،سمعت صوت بشرى بحالا كتغوت:سندس، الحمد لله جاوبتي" بصوت غليض و معرعر بحال ديال سكايرية جاوبت: و علاش مانجاوبش، شنو واقع؟" سكتات شوية حتى كنت غادي نرجع نعس عاد قالت:هي مازال مافيخباركش، مازال ماشفتي والو؟" ماجاوبتش، كنت باغا غير نرجع للنعيسة لحلوة ديالي حتى سمعتها قالت بحالا صرفقاتني: لخبار داعت في كل قنت، الجرائد اﻹلكترونية لي مهتمين بالمشاهير كاتبين على العلاقة ديالك مع آدم العمراني" حليت عيني حتى بغاو يخرجو من بلاصتهم، ماحسيتش براسي حتى غوت:شنو؟ مايمكنش" نضت كنجري شعلت pc ديالي و دخلت لفيسبوك، طلعت و هبطت الصفحة، كيبان لي "سعد المجرد حامل؟ محاولة خطف الدوزي من طرف معجبة؟ تعرف على الفتاة التي خطفت قلب الرجل اﻷعمال الوسيم آدم العمراني" شنو؟ لا لا مايمكنش! صوت بشرى في بورطابل كيقول:كيفاش حتى داعت لخبار؟ يسحب لي غير لي في المدرسة لي عارفين هاد لخبر" كليكيت على الرابط و جاوبت:آه، هادشي لي..." لهضرة مابقاتش باغا تخرج من فمي مني قريت:صدقي سندس، فتاة من حي شعبي نجحت في خطف قلب أحد اصغر أغنياء العالم و أشهرهم بالوقت الحاضر آدم العمراني، كيف حدث دلك؟ زميلنا الصحفي حميد الزايدي قام بمقابلة حصرية مع سندس صدقي و وفقا لما قال، إن استمر هدا الثنائي إلى حد الزواح فقد يكون أحد أشهر و أجمل زوجين في العالم، ثنائي أسطوري من حكايات ألف ليلة و ليلة" ماكرهتش نغوت على حر جهدي، كيفاش نسيت داك الصحافي الفاشل حميد الزايدي؟ طلعت أنا لي كدابة فاشلة و غبية. را ثنائي أسطوري نيت، شهرزاد عمرها كدبات؟ مالها كانت غبية؟ لا، بطبيعة لحال لا، أنا أندخل لموسوعة غنيس لﻷكبر كدابة في العالم!