بدات بكذبة

الجزء 16

دخلنا مع باب لقاعة لي فيها لحفلة، اﻷنظار ديال الناس كاملين تحطو على آدم و عليا، بدينا داخلين وسط الحفلة والناس، كيتسمع صوت الناس واحد كيوشوش مع لي حداه مع صوت الكمان لي كيتعزف، الناس كانو كتار، عرفت منهم غير لي كيقراو معايا مخرجين عينيهم فيا، أنا هزيت راسي لسما و درت يدي في يد آدم لي حدر عينيه و شاف فيا مستغرب، دار واحد اﻹبتسامة باش يدرق طلوعية الدم ديالو، قرب لودني و قال: شنو كديري آنسة صدقي؟ واش نسيتي لقوانين؟" درت حتى أنا بتسامة و بينت سنيتاتي مزيان، قربت لودنو و قلت: لا، و بلا فرشة أ بنادم" ضورت عيني بانت لي لجين، بشرى و أيوب، كل واحد واقف في قنت، جات عندي بشرى و حتى آدم جاو عندو شي ناس و كانت فرصة باش صافي نتفارقو، بشرى بدات كضحك و قالت: الصراحة جيتي مع آدم العمراني" ضربتها في كتفها و قلت: باركة من لبسالة، أصلا هو مافيه مايتشاف، كيدير لعصاب، عصبني أنا بعدا و فقصني" قلت و أنا معصبة، بشرى طلات على آدم لي كان واقف بعيد علينا شوية و قالت: هاداك زيونات عصبك؟ سيري راك مصوطي لي شي فيزيبل" ضحكت و قلت: تي أشمن زوين أشمن زوين؟ راه حول!" -بشرى: كيفاش حول، عويناتو كيحمقو" عاودت ضربتها و قلت: كنهضر معاك بصح، مني كيتعصب عينيه كيتزاكلو شوية" -بشرى: على مالو كيتعصب؟" ضحكت بجهد و ماجاوبتهاش، طلع ليها الدم و قالت: و بطبيعة لحال يتعصب و هو الله مسلط عليه وحدة بحالك" جمعت الضحكة و خنزرت، درت راسي مقلقة و مشيت بوحدي ناخد كاس ديال لعصير و ياريت مامشيت! أنا غادا أتا وقف عليا واحد قالي: واش بصح نتي حبيبت آدم العمراني؟" كيفما تافقت مع آدم ممنوع نتكلمو مع الصحافة، حاولت نبعد من طريقو ولكن زاد عمر لي طريق و عاود قال: بغيت غير جواب" وقفت، خنزرت فيه و قلت:بعد من طريقي عافاك" حيدتو بيدي من طريق و زدت حتى حسيت بيه جرني من يدي و قال: واش بصح؟"، طلع لي الدم و غوتت: ماتقربنيش، هادا را ولى تحرش بعينيه" خديت اﻹنتباه ديال لحضور كامل، حسيت بيد تحطات على كتفي، كان آدم العمراني طالع ليه الدم ولكن مامبينش، شاف في الصحافي و قال: بعد من السيدة عافاك" عاود الصحافي قال: بغيت غير جواب... آدم العمراني واش كتبغيها؟" حاولنا نميكو عليه أتا تجمعو صحافيين آخرين، أغلبيتهم كيبانو أجانب و كيهضرو باﻹنجليزية، تابعينو حتى المغرب الله يجعل السلامة.دوخوني كترة الصحافيين بفلاش ديال كاميراتهم و كل واحد و أش كيسول، كانو في الصراحة غير شي خمسة ولكن جاوني كتار، فلاش ضرني في عيني و أنا نضور نشوف بعيد عليهم، جات عيني نيشان في لجين لي كانت كتشوف فيا شوفة ديال "أنا قربت ربح" مستحيل نخليها تربح، مع رجعت شفت في الصحافة جاني سؤال في ودني: واش مخطوبين؟" حدرت راسي شفت يدي، لقيت راسي مازال دايرة لخاتم لي لقيت في المصعد، بدون سابق إندار أولا تفكير،قربت من آدم لي كان مبعد عليا، ضورت يدي على جنبو، زدت قربتو ليا، بتاسمت و هزيت يدي للصحافة و قلت بكل ثقة في النفس: آه أنا و آدم العمراني مخطوبين" الجزء 21 بعد داكشي لي درت مازال باغين تعرفو شنو وقع من بعد؟!! مازال باغين تعرفو التسرع ديالي فين غادي يوصلني؟ في نظركم شنو وقع؟ شوهة أخرى، كيفاش غادي نتفك من هادشي دابا؟! جلست خديت كاس ديال لعصير نبرد بيه راسي، آدم مابقاش ضار جيهتي، الحفلة قربات تسالي، بدات كتخوى و أنا ساعة و أنا كنشرب في لعصير و جالسة على كرسي عالي، رجلي مهزوزين في سما، كل شوية نشرب جغيمة و ندم في في راسي حتى واحد لوقيتة بان لي واحد العصفور زوين دايز كيطير، عجبني بقيت حاضياه حتى داز و أنا ضرت بلكرسي ديالي و كنضحك حيت كيبان زوين، شوية ماعرفتش شنو وقع تشقلبت من لكرسي اﻷرض، بدا كيبان لي غير تشاش، جات وحدة من هادوك لي كيجمعو دنيا مدات ليا يدها باش تعاوني نوقف، ماعرفتش شنو كان واقع بالضبط، مامديتش ليها يدي و قلت: مانقدرش نوقف، لغول أيخرج من اﻷرض و ماغاديش يخليني نوض، غير سيري عتقي راسك و عتقي ناس، ماتخافيش ماغاديش نخليه يوصل ليكم، أنضحي براسي على قبلكم" كنهضر بصوت مرخي، و بحالا في شي حرب، ماكانت عندي أدنى فكرة علاهاش كنت كنهضر، بانت لي لبنت كتشوف فيا مستغربة، مافاهما والو و قالت: سمحي لي؟!" كتبان كضحك، ماقدرتش نبقى ساكتة بلا مانضحك بحر جهدي، شوية صوت غليض، قاطعنا و قال: غير خليها أ حياة، أنا أنتكلف بيها" صوتو كيتسمع كيغلاض و كيرقاق، كيضحك، كلشي كان كيتسمع كيضحك، ماعرفتش شنو وقع ليا، وليت غير كنضحك، شوية حسيت براسي مهزوزة من اﻷرض و داك صوت قال: واو شحال تقيلة!!" بقيت كنشوف فيه شحال و بصوت مرخي قلت: شكرا! فارس أحلامي جيتي في وقتك! عتقتيني من لغول..." كان هازني بين يديه، ضورت يدي على عنقو و عاودت قلت: عتقتيني من لغووول" و بديت كنشم الريحة لي داير، بقيت كنقرب لجيهة الريحة حتى سمعت الصوت قال: سندس حبسي، شنو كديري؟ سندس" قلت بصوت مرخي: شنو؟ ريحة زوينة!" رجعت شفت فيه، كيبان وجهو مرة كيغلاض من لفوق و كيرقاق من لتحت، مرة عين كتخرج و كتغلاض و لخرى كتصغاار، سنانو كيخرجو بحال لمسندر شوية كيصغارو، نيفو ولى كبير بزاف و ودنيه كبااار ماقدرتش نصبر بلا مانضحك بحر جهدي، كيبان بحال لكينكووات، شوية جريت ليه حنيكاتو بيدي و قلت: وينو وينو على قريد شحال غزيواان" كيبان لي لعينين تعكدو و سمعت صوت جاي من الفضاء: حيدي عليا يديك، حتى تسعقلي و نوريك لقرد كيف داير أ سندس" هئ تخلعت! سندس؟ شكون هاد سندس؟ واش كيهضر معايا ؟ هاد الراجل شفتو دايخ، شكون هاد سندس! بديت كنحس بيدي و راسي تقال عليا، عيني حتى هما مابقيتش قادا نحلهم، دخت بنعاس!