بدات بكذبة

الجزء 19

دازت من حدا لكار طوموبيل ديال آدم، شفتها تفكرتو و بقى فيا لحال، كون غير تلاقيتو في شي وضع آخر بلا كدوب بلا والو، واخا نبقى غير نضارب معاه نهار و ماطال، ولكن أنا أصلا بادياها بلكدوب، إوا لكدوب عمرو ماكيطول، هو دابا مابقى كاع كيحملني! و أنا كنهضر مع راسي سمعت لجين قالت: إوا دابا فين هو آدم العمراني؟ أولا حبيبك تفرق عليك؟" ماتسوقتش ليها و مافكرت حتى نجاوبها، كنتساءل كيفاش كنت كنتسوق ليها و عاطياها حتى هي وقت، تصاحبات مع أيوب بصحتها بيه، و كنتساءل حتى كيفاش كان كيعجبني داك لمصدي ديال أيوب، كنت عمية لهاد الدرجة؟! ماكرهتش نشد ديك سندس لي كانت مضاربة مع لجين على قبل مصدي و نشبع فيها عصا، لهبال فيه و فيه، و تولي كادبة و حاصلة في كدبتها على قبل بنادم ماكيستاهلش حاجة أخرى! ضرني راسي و حسيت براسي فشيشكل، ماحاملة والو، غمضت عيني و حاولت نعس شوية، حسيت بلكار زاد واحد لمسافة أتا وقف، سمعت توشويش، كل واحد كيهضر مع لي حداه و كيتساءلو شنو واقع، كنت دايخة بنعاس و مرخية و ماراشقاش ليا جاني لعكز نحل عيني، بقيت مغمضة عيني أتا في ثانية سمعت صقيل، جاني لفضول و أنا نحل عين وحدة باش نبركك، كيبان لي كلشي كيشوف فيا، بديت كنتفكر، شنو هاد لفضيحة لي درت عاوتاني؟ تاحاجة، مابقيت كدبت تا كدبة، ضورت عيني بشوية كيبان لي شي حد واقف لي عند راسي، لابس costume،شوية سمعتو قال: آنسة صدقي؟"جاني بحال آدم و أنا نرجع غمضت عيني، عرفت حالتي ولات صعيبة حتى آدم ولى كيتخايل ليا فينما مشيت، حسيت ببشرى كتزعزع فيا و كتقول: سندس فيقي، را آدم العمراني واقف" حليت عيني و ضرت شفت فيها: حتى نتي كيتخايل ليك؟" حسيت بشي حد بصح واقف من مورايا، ضرت بشوية كيبان لي آدم العمراني، غمضت عيني و عاودى حليت باش نتأكد واش بصح أولا كانتخايل، دخلني الشك و أنا نقرصو حتى سمعتو غوت و قال: سندس قصحتيني" صافي دابا تأكدت را هو بصح ماكنتخايلش، هزيت حجباني كنتساءل شنو بغى، دار لي حركة باش نزل معاه، ترددت ولكن مني شفت كلشي كيف كانو كيشوفو فيا وقفت بكل فخر و نزلت معاه، ماكنتش ناوية نديرها، ولكن آدم العمراني يوقف كار على قبلي؟! لا هادي بزاف، لجين أتكون نفاجرات هههه! نزلت من لكار و من مورايا آدم، بعدنا شوية و قلت:شنو باغي؟ ياك قلتي لي نمشي فحالي، لاش تابعني؟" بدا كيحك في راسو و قال: ممم محتاج ليك" ماتيقتش شنو سمعات ودني، واش بصح آدم العمراني هدا؟ باش نتأكد قلت: عاود شنو؟" آدم مارضاش ولكن قال: سندس محتاج ليك" قلت ليه: للاتي بلاتي نستمتع باللحظة" شفتو خنزر فيا و أنا دغيا قلت: فاش محتاج ليا بعدا؟" -آدم: واش أتعاونيني بعدا؟" درت راسي كنفكر و قلت: وا مانعرف، على حساب، را حتى أنا عندي سمعة خاصني نحافظ عليها" آدم حدر راسو و بصوت حادر قال: عافاك" شنوووو؟ آدم كيطلب فيا؟! واو تقدم كبير! قلت ليه: ماسمعتش مزيان، شنو قلتي؟" خبى واحد اﻹبتسامة و قال: باركة راك سمعتي" بالفرحة بديت كنقز و كندير حركات غريبة و كنضور و كنجري حتى لاحظت لي في لحافلة كلهم مكبوبين على شراجم و كيطلو علينا، يسحب ليهم مساكن شي لحظة رومانسية! رجعت لوعي ديالي و قلت: شنو باغي؟" -آدم: عيد ميلادي كاين من هنا ليوماين" ضورت عيني يمين و شمال و قلت: باغيني نجيب ليك كادو متلا؟ عيد ميلادك و أنا مالي؟" آدم سكت شوية قبل مايقول: مهم أنا عندي خطة باش ندخل للسوق التركي، و كاينة واحد سيدة أعمال مسيطرة على السوق في تركيا إلى عقدنا معاها صفقة أتكون خطوة مهمة نحو الطموح ديالنا" تساءلت و قلت: و شنو الدور ديالي في هاد الصفقة؟"-آدم: شافت الصورة ديالك في شي مجلة واقيلة و هضرات معايا سولاتني عليك، قالت لي بلي شبهتي ليها لشي بنتها بزاف و بغات تلاقى معاك" عاودت سولت: إوا؟ مازال مافهمت، شنو علاقة الصفقة بالعيد ميلاد و بيا أنا؟" آدم قال بسرعة حتى بدا كيسرط لكلام تحت لسانو: قلت ليها بلي راك خطيبتي، فرحات بزاف و زادت بغات تلاقاك في الحفلة ديال عيد ميلادي، حيت أصلا غادي تحضر غير على قبلك" ضحكت بجهد و قلت: هي باغيني نمثل معاك دور خطيبتك؟" زدت ضحكت بجهد و عاودت قلت: حتى نتا تعلمتي تكدب؟!" خنزر و قال: لي يتعرف على كدابة بحالك أش أتنتاظري منو" خنزرت فيه حيت بقى فيا لحال و رجعت مقلقة باش نطلع في لحافلة حتى سمعتو جاي كيجري من مورايا جرني من يدي و قال: سندس عافاك" كيبان محتاجني بصح، أتر عليا بالنظرات ديالو حتى حسيت بقلبي بدا كيضرب بجهد، قرب لي و عاود قال بصوت حنين: عافاك" صافي حسيت براسي دبت في بلاصتي، قلت ليه و أنا كنتفتف: أنا...أنا...فاليز...نجي" يالاه ضرت باش نطلع لكار نجيب فاليز ديالي لقيت بشرى واقفة مدات ليا لفاليز و غمزاتني، عرفتها أتشبع عليا ضحك، خطفت لفاليز لي من بعد هزها لي آدم و رجعنا لوطيل!