بدات بكذبة

الجزء 29

رجعنا لسبيطار و أنا في كامل استعدادي باش نواجه ماما لي موحال واش أتكون عقلات عليا، تاجهت جيهت الغرفة ديالها حيت خرجوها من اﻹنعاش، دفعت لباب و دخلت باش تبان لي الغرفة خاوية، السرير خاوي، شداتني الدوخة، فين هي ماما، تقدر تكون وقفات على رجليها خرجوها تمشى؟ لا مايكمكنش الليل هدا! مشيت كنجري عند واحد لفرملية و سولتها و أنا كنحاول نتبت صوتي: عافاك لمرا لي كانت في ديك لغرفة فين هي؟" جاوبتني: لي فقدات الداكرة؟ ... را نقلوها لمستشفى خاص" ستغربت و عاودت سولت: شكون عطاكم لحق؟" جاوبتني: جا واحد لولد قال بلي راه ولدها..." قاطعتها و قلت: شنو؟ بدر جا؟" لفرملية بقات كتشوف فيا مافاهمة والو، سولتها على لمستشفى و عطاتني لعنوان، مشيت كنجري عند سعد وصلني ليه. كيف وصلنا دخلت و سولت على الغرفة لي فيها ماما، كانت في الطبقة اﻷولي، طلعت كنجري مع وصلت ضرت باش ندخل مع واحد لكولوار تساطحت مع شي حد، رجعت خطوة لور حتى كيبان لي آدم واقف كي الصنم، بقى غير كيشوف فيا بلا ماينطق بكلمة، ميكت عليه و دزت بغيت ندخل الغرفة حتى سمعتو قال: را ناعسة" ماحملتوش يهضر معايا و ماحملتش نسمع صوتو، رجعت لعندو و قلت بصوت قاصح: شكون نتا؟ أش كدير هنا؟ سير فحالك" ماجاوبنيش الشي لي فقد لي أعصابي، جيتو من مورا ضهرو و بديت كندفع فيه، و كنقول: سير فحالك، سير فحالك" و هو بحال شي دري صغير، عرص و حلف لا يتزعزع، بديت كندفع فيه بحر جهدي و كنتعصر حتى وصلتو لدروج صافي و مابقاش عندي الجهد باش نزيد ندفعو أتا بان لي سعد جاي مخنزر، شاف في آدم و شاف فيا و قال: هادا مالو؟" آدم جاوب: it's none of your business ماشي شغلك" سعد جاوبو: what's wrong with you؟ شنو لمشكل ديالك؟" -آدم: what's wrong with you؟ شنو لمشكل ديالك نتا؟" -سعد: she told you to stay away from her, so stay away, undertand؟ قالت ليه عطيها تيساع إوا عطيها تيساع فهمتي؟" -آدم: you're a pity, she doesn't like you, she doesn't even care about you, you're the one to stay away from her داير من راسك ضحكة، را ماكتعجبهاش، ماكتسوقش ليك أصﻻ، نتا لي عطيها تيساع" -سعد: hahaha you're so funny, don't forget that she left you for me هاهاها كضحك، ماتنساش را خلاتك نتا على قبلي أنا" نكدب عليكم ما فهمت تا زفتة من هضرتهم، يالاه كنبغي نترجم هضرت هادا كيجاوب لاخر، وليت بحال جمهور تينيس، حاضية لكرة عند هدا و رجعات عند هدا، الحمد لله واحد لعكاز جر سعد من عنقو حتى طار بالخلعة، و صوت ديال مرا قال: ناس را مراض هنا و نتوما منوضين قربالة؟" ضرنا كاملين في دقة نشوفو، كانت مادام بنسودة، ولكن أش كدير هنا؟ أتعقد صفقة مع آدم في سبيطار ولا شنو؟ سعد حدر راسو للأرض بحال شي دري صغير و قال: ماسحبش لي أتجي في هاد الليل" كملات طريقها جيهتي، عنقاتني و قالت: ماكاتحشمش، سندس را بنتي، شكون غادي يبقى معاها و ماماها مريضة؟" أنا مانطقت بحتى كلمة كنت غير مستغربة، علاش سعد قال لمادام بنسودة را ماما في سبيطار؟ وخا ضريف ولكن كيدخل راسو في شبوقات بزاف! مادام بنسودة شدات لي بيدي و قالت: ماتخافيش أبنتي، أيكون خير، ماماك غادي تفيق صحة سلام" ترددت شوية قبل مانقول: طبيب قالي بلي فقدات الداكرة" مسحات لي دموع لي نازلين على حناكي و قالت: آه عارفة أ بنتي، أحسن طبيب كاين أنجيبو ليها و غادي تنوض بخير و على خير" جاوبتها: إنشاءلله" قالت لي: سعد قالي بلي مازال ماشفتي ماماك" وايني سعد غير بروال، جاوبتها: لا مازال، خفت لا نشوفها و كاتعقلش عليا" بدات كضحك و قالت: كاين شي أم كتنسى على بنتها لي والدة من كرشها؟" بديت كنضحك و جراتني معاها باش ندخلو نشوفو ماما في الغرفة ديالها. حلات لينا لفرملية لباب و دخلنا، كنحس بيدي كترعد ولكن مع مادام بنسودة حدايا حسيت براسي تشجعت شوية باش نشوف ماما. مادام بنسودة كانت غادا قدامي و شادة لي بيدها، و يدها لخرا هازة بيها لعكاز، من لور كيبانو دوك جوج زغيبات جامعاهم فوق راسها، بقيت ملاهية كنحسب في شحال من زغيبة في شعرها أتا وقفات على غفلة قدامي و كنت غادي ندخل فيها، طلقات من يدي و طيحات لعكاز من يدها، كلمة وحدة لي سمعتها قالت: مايمكنش"