بدات بكذبة

الجزء 37

رجعت للدار مع بدر و سعد لي كانو بداو لحرب ديالهم، دخلت لبيتي هربت منهم و سديت عليا لباب، حطيت راسي على لمخدة و بديت سارحة بأفكاري، شنو علاقة كمال بناني بماما، شنو لي خلاها تلاح من طوموبيل؟ ديما شي حاجة كتبرزطني على تفكير ديالي، هاد لمرة صونيط ديال بورطابل لي برزطني، هزيت بورطابل بانت لي نمرة ماكانعرفش، قبلت المكالمة: ألو" جاوبني صوت بنت ماغريبش عليا: ماباغاش نطول معاك لهضرة، أنقول لك جوح كلمات، بعدي على آدم" ضحكت بجهد و جاوبتها: هادو را تلاتة لكلمات، و من لفوق آدم شحال مابقيت هضرت معاه و نسيتو كاع" بقات ساكتة شوية و قالت: مابغيتش نبان راني قبيحة ولكن خاصني ضروري نبقى مع آدم، إلى نتي عرفتيه غير ديك نهار أنا كنعرفو مني كنا صغار، وخا سمحت فيه في واحد لوقت ولكن ماكنتش فاهمة، دابا مانقدرش نخليه يتخلى عليا..." قاطعتها حيت حسيت بالملل و قلت: دابا شنو مطلوب مني؟" -ليان: بعدي على آدم عافاك، را سميتك عقداتني، اﻹعلام ديال المشاهير كلشي كيهضر على العلاقة ديالك مع آدم، آدم براسو نسى سميتي، فينما يبغي يعيط لي كيعيط سندس" لسبب ما فرحت ولكن بقات فيا ليان، حاولت نجاوبها بصوت حزين: ماعندي ماندير ليك...بغيت نقولك..." و هي تقطع لخط، ناري زدت عصبتها، تعاود لراسها! رجعت غمضت عويناتي و بديت باغا نفكر ولكن عاوتاني تبرزطت بصوت بدر لي غوت بجهد: كنيتك بناني؟ نتا ماشي خويا، كداب" خرجت من لبيت كنجري نشوف شنو واقع، بدر شاف البطاقة الوطنية ديال سعد و بانت ليه كنيتو بناني، بصح كنيتو ماشي بحالنا، بقى بدر شحال و هو كيغوت، نضت حتى أنا كنغوت عاد سعد بردنا و بدا كيشرح: غير سمعو بعدا، حنا خوت غير من اﻷم، أما أنا بابا سميتو كمال بناني" ياربي منين سلطتي عليا هادشي، أنا ماكان فيا لا فضول لا والو بحال لبطلات في اﻷفلام باش كيعرفو الحقيقة و أسرار العائلة، أنا لا، أنا كدبة هي لي جبدات لي لحقيقة، أما أنا باغا غير نعيش هانية! دابا شنو ندير؟ طلعات ماما مزوجة قبل من بابا! خاصني مادام بنسودة أولا جداتي لي تكمل لي حكاية أمي! في داك لوقت لي كنتسنى نتلاقى مع جداتي و تعاود لي حكاية مي،رجعت لبيتي تخشيت فيه، سهيت بأفكاري حتى تفكرت مطابقة لموت ديال بابا مع لموت ديال بابات آدم، مايمكنش يموتو بجوج في نفس نهار و بنفس الطريقة، يكون بابا حتى هو متنكر تحت إسم واحد آخر؟و نطلع أنا و آدم خوت؟ عند هاد لفكرة غوت في نفسي لااا مايمكنش، علاش ياربي تزيد تعدبني على كديبة وحدة،حسيت بالخلعة و هزيت تيليفون باش نعيط لآدم،أصﻻ كنت كنقلب على سبب باش نسمع صوتو، ماتحشمونيش ولكن توحشتو! بالفعل عيطت لآدم و دغيا جاوبني بحالا كان كيتسنى فيا و قال:ألو سندس" رتابكت و ماعرفت مانقول، فكرت ندخل نيشان صلب الموضوع و قلت: آدم! بغيت غير نسولك على..على لموت ديال باباك عافاك" تقل شوية عاد جاوب: مرحبا، شنو؟" خديت نفس عميق عاد هضرت: مني خبيتو لموت ديال باباك، قلتي بلي لمساعد ديالك قالب اﻷشخاص، خدا شخص آخر و دارو زعما هو لي مات في بلاصت باباك لا؟" آدم جاوبني بدون تردد: آه فعلا" عاودت سولت: ماعرفتيش شكون داك الشخص؟" -آدم: مانعرف، شي واحد لقاو البطاقة الوطنية ديالو طايحة" تعصبت، كيفاش توصل بيهم اﻷنانية يقالبو لموت ديال اﻷشخاص، سولت: ماعرفتيش شكون داك الراجل أولا اﻹسم ديالو؟" بقى ساكت شوية بحالا كيتفكر و قال: مم مامتأكدش مزيان، بلاتي نسول سمير و نجاوبك، علاش؟" جاوبتو: لا والو غير بغيت نعرف، بسلامة" و قطعت عليه، رتابكت و ماعرفت شنو مازال نزيد نقوليه، بقيت جالسة شوية و أنا نوض نطل من شرجم، بقيت كنشوف في ناس غاديين جايين، شوية بان لي نفس راجل لي بان لي قبل و شبه لي لبابا، و دابا نفس شي وجهو ماباينش، حلفت هاد لمرة حتى نوصل عليه، نزلت طايرة مع دروج، وقفت قدام لباب، ضورت عيني على ناس كاملين حتى قشعتو أتا بورطابل صونا، كان آدم عاود عيط عليا، جاوبتو و أنا كنجري جيهت راجل: ألو؟" -آدم: مم عطاني سمير اﻹسم ديال السيد" قلت ليه و أنا مازال عيني على راجل لا يتوضر لي مرة خرى: إوا" -آدم: شوفي كيقدر يكون تشابه في النسب، هدا ماكيعنيش راه باباك" حسيت بتبوريشة و سخونية طلعات معايا،باﻷخص كنت قربت من راجل لي ضار مع واحد الزنقة و أنا تابعاه، غوت على آدم من بورطابل: شنو كتعني قول" -آدم: واخا غير تهدني..." راجل أتا على غفلة وقف قدامي، تخلعت و طلعاتني لقفقافة، شنو ممكن يوقع إلى راجل ضار شاف فيا؟