بدات بكذبة

الجزء 32

آدم بقى ساكت شوية عاد جاوب بصوت كامل حزن: لا... مات...ضربو تران" غمضت عيني و عاودت حليتها باش نستوعب شنو قال، حتى أنا بابا ضربو تران، تكون صدفة زعما ماتو بجوج في نفس نهار و بنفس الطريقة؟!تبت و بلا مانعيق عاودت سولت: و كيفاش خبيتو لقضية، أتكون صعيبة شوية لا؟" -آدم: الصراحة سمير لمساعد ديالي لي شفتي داك نهار هو لي ساعدني، و هو لعقل المدبر، مني وصلنا لخبر جا من ميريكان حيت أنا ماكنتش في المغرب، و قالب لموت ديالو مع لموت ديال شي راجل آخر مات نفس نهار، غير هو مات موتة عادية و رجعو ضربو تران" بدا كيدخلني الشك، أنا بابا دفنوه على أساس منتاحر، هو لي لاح راسو لتران، وخا كنا على يقين بلي بابا مايديرهاش ولكن تقبلنا لوضع، مادرناش عليه لجنازة، و رجعنا السبب ديالو للفقر، حيت كان يالاه طرد من خدمتو و ماعندو فين يخدم، دوزنا أيام صعيبة ماكنحملش نتفكرها. وقفت من بلاصتي و قلت بصوت صارم: آدم خرج" أصلا كان بدا كيصبح صباح، آدم شاف فيا مصدوم، عاودت قلت بصرامة: خرج عافاك دابا قبل ماندير ليك شي فضيحة هنا" يالاه مانعرف أش بغى يقول غمضت عيني و قلت بجهد: قلة ليك خرج، مابقيتش حاملة نشوف وجهك مازال، خرج من دارنا" آدم بدا نايض بالعرض لبطئ، تهاوشت و أنا نبدا نجر فيه، جر يا ماتجر، هو داير بحال لحلوف، حلف واش يتزعزع، غير حال فمو و مخرج عينيه مافاهم والو، شوية مع أنا مخروعة و صحيحتي على قدي، دايرة جهدي كنوض فيه أتا زلقات بيا رجلي و جيت مليوحة على آدم حتى عنقتو، مع أنا باغا نوض سمعت صوت من مورايا قال: سندس؟؟ شنو هادشي؟" ناري ميمتي قفارت، ضرت و أنا كنتمنى كون مانضورش و نشدها بجرية وحدة حتى نبعد، حتى أنا صكعة، ماجاني زهر نتلاح فوق آدم غير مني خويا بدر دخل؟غمضت عيني و زميت فمي، بديت ضايرة بشوية، غير حليت عيني و شفت بدر درت راسي غوت بالفرحة: بدر خويا، توحشتك" و تلاحيت عليه بتعنيقة ولكن ماتجاوبش معايا، عرفت راها قفارت و بلي فهم كلشي بالمقلوب، بطبيعة لحال يفهم بالمقلوب، واش مدخلة معايا ولد للدار و الدار خاوية؟ و من لفوق معنقاه؟! أولا كيبان را معنقاه وخا غير خطأ، بان لي بدر مخرج عينيه في آدم و قالي: شكون هدا؟" يالاه بغيت نجاوب و أنا كنترعد أتا سمعت آدم قال و هو ماد يدو لبدر: سلام، أنا آدم العمراني" خويا زاد خرج عينيه و قال: آدم العمراني، آدم العمراني؟" قبل مايجاوبو آدم خويا تلاح عليه بتعنيقة، و كيضحك بجهد و فرحان، جرو جلس و قالي نوجد أتاي، ماخلى كيف مرحب بيه، بقيت مصدومة أنا، شوية و هو بدر قال: ياك أ ختي؟ غبرت عليك يوماين وليتي تخبي عليا؟" شفت فيه مستغربة، عاود قال: بانت لي ديك نهار واحد لبنت مصدية مسكينة قاليك راها خطيبة آدم، شبهتها ليك أ سندس ولكن قلت لا، سندس ماخيباش لهاد الدرجة، أديك الساعة طلعتي نتي" أناري وصلات لخويا؟! تزيزنت أنا، تا كلمة مابقات باغا تخرج، شاف في آدم و كمل: را أنا ولي أمرها دابا، خاصك تطلب يدها مني أنا" هادا أش ساير يقول؟ هزيت عيني في آدم بان لي حاصل، ماعرف مايقول، كملها و جملها بدر مني قال: وا را عيب لبنت تبقى جالسة مع لولد الراس في الراس بلا عقد، إمتى ناويين ديرو لعقد؟ ديروه سيمانة لماجية ماحدي أنا كاين هنا في المغرب" أنا و آدم ولينا غير براسنا كنقولو آه وخا، سرطنا لساناتنا!
جريت بدر لكوزينة و سولتو: شنو جابك دابا و على غفلة؟ لا تليفون لا ستة حمص" بدر جاوبني و هو كيوشوش: را هضرت مع ماما شي يوماين دابا، باغي نجي باش نكمل ديني حتى أنا، مالك مسمومة باغا تزوجي بوحدك" هدا علاش كيهضر؟ ماعارفش زعما على ماما؟ زدت تأكدت مني قال: شفتك فايقة قبل من ماما، ماموالفاش ليها تفيق معطلة" و بدا غادي جيهت لبيت ديالها باش يفاجئها، حبستو و قلت: لا ماما ماكيناش؟" -بدر: آه نسيت، مازال مارجعت من العرض" زدت ستغربت، إلى كان هو بصح عاد جا شكون دا ماما لكلينيك على حساب را هو ولدها؟ رتابكت و ماعرفتش كيفاش نخبر بدر بالخبر ديال ماما في سبيطار، بدر غير من التعابير ديال وجهي عرف واقعة شي حاجة شي لي خلاه أصر عليا باش نقول، ترددت بزاف ولكن تشجعت و قلت: بدر...ماما دارت حادت و راها في كلينيك" بان لي عينين بدر خرجو بالصدمة، آدم دغيا عتق الموقف و جر بدر من يدو، ماعرفتش فين غادي بيه، بدر كان غير كيسول: كيفاش؟ شنو وقع؟ كيدايرة ماما؟" سول أسئلة بزاف لي ماكانش كينتاظر لجواب ديالها، آدم وشوش لي في ودني: نزلي لطوموبيل، خاصنا نديو خوك يشوف ماماك" فعلا داكشي لي درنا، نزلنا بدر لطوموبيل لي كان مازال مصدوم، دموع نزلو لي من عيني بلا مانشعر!