بزز حتى شديت التوازن على رجلي أتا بان لي واحد لولد جاي قاصدني و مبتاسم، ضرت نشوف حدايا لقيت راسي وسط شمع لي شاعل ولكن في ديك اللحظة بان لي بحالا واقفة وسط لعافية، حاولت نبقى واقفة متبتة حتى بان لي داك لولد مزيان، كان آدم، جا شد لي بيديو بدا كيقول شي حاجة مافرزتهاش، ضرت نشوف بشرى بانت لي واقفة كضحك و فرحانة، شداتني لخلعة حيت داكشي كامل كان مازال كيبان لي فلو، بنادم كان كيبان لي بحال جنون أو اﻷشباح،زدت تخلعت و ماشعرت براسي حتى طلقتها بغوتة و ضرت شديتها بجرية وحدة، بقيت كنجري كنجري حتى واحد لوقيتة بان لي عرمة ديال بنادم تابعيني و كيقولو:شد شد شد شد"بحالا تابعين شي شفار،أنا زدت في السرعة و وليت كنجري حتى ركبتي وﻻت كتقيس وجهي،شوية أتا كنحس بشي حد تلاح عليا من سما بحال شي قنبولة، طحت مخبوطة معنقة اﻷرض، كاع الرملة كليتها، هزيت راسي كنشوف مخلوعة و كنغوت يسحب لي لقصف لجوي حتى كيبان لي غير شي ولد من لي كانو تابعيني باش يشدوني هو لي تلاح عليا، مع دلك بقيت كنغوت، ماقدرتش نحبس من لغوات، وليت كنسد في فمي بيدي و لغوات حلف واش بغى يحبس حتى وقفات عليا بشرى و قالت: واقيلة كتساليني شي تصرفيفة" مازال ماستوعبت كلامها حتى كنحس بحنكي عواج، بشرى صرفقاتني ولكن عتقاتني ستعقلت و حبست لغوات، مازال ماوقفت على رجلي بان لي آدم جاي و جلس حدايا و بقى كيشوف فيا، بغيت نهضر لقيت راسي كنقول غير:أبا أبا أبا" تزايزنت، و كملات لباهية مني آدم ضحك و سنيناتو بانو، وليت باغا نخنزر و نغوت عليه ولكن صوت مابقاش باغي يخرج، آدم قرب لي و قال: ضروري تنوضي لعجاجة؟ حتى مني نبغي نطلبك للزواج؟" خرجت عيني و بغيت نقول أشنو؟ زواج؟ ولكن لي خرج مع فمي كان: أبا؟ أبا؟" آدم زاد ضحك بجهد، بديت كنكحب كنكحب باش صوت يرجع، درت بت تجريبي و غوتت: شنو؟ زواج؟" آدم نقز من حدايا،بشرى سمعتها كضحك و كتقول: غير سمعتي زواج و هو يرجع ليك صوت؟!" ماجاوبتهاش و وقفت كنقز على رجلي، شنقت على آدم و عاودت قلت: زواج؟ باغي تزوج بيا؟" آدم جاوب: كنت باغي نتزوج بيك ولكن نتي حرقتي ديكور" قلت و أنا مخرجة عيني: إنا ديكور؟ هداك شمع لي ليهيه؟" جريتو من كرافاط ديالو و بديت كنجري بيه لفين مشعول شمع و قلت: ها حنا نعاودو من اﻷول، نتا واقف هنا و ها أنا جايا" وقفتو وسط شمع، مشيت كنجري بعدت عليه و درت راسي عاد جاية و مني شفت شمع و شفت آدم تفاجئت زعما و بديت كنتعوح و نعوج في يدي و فمي و كنقول: واو على مفاجأة شحال زوينة"بديت كنش على راسي بيدي زعما غادي نسخف بالفرحة و آدم كان غير واقف كيشوف فيا و زام الضحكة في فمو، بديت كنغمز فيه باش زعما بجبد لخاتم ولكن هو قال: سندس، شعرك" مال شعري، بشرى جات كتجري لعندي بدات كتقاد لي في شعري و أنا كنجري عليها، حتى قاداتو و مشات، رجعت كنشوف في آدم لي كان كيضحك بجهد، بدا كيحاول يجمع الضحكة و جبد لي خاتم، كيف شفتو و قبل هو مايقول شي حاجة قلت: شفار، هدا خاتم ديالي لي لقيت في سانسور" دار ضحيكة صغيرة و قال: هدا خاتم ماما كنت ديما كنهزو معايا ولكن كان توضر لي و مابقيتش عرفت فين هو حتى بان لي في يدك داك نهار" بقيت غير كنشوف و ماعرفت مانقول، آدم عاد قال: كديديبتي كنبغيك، تزوجي بيا؟" بديت كنمسل عويناتي شوية عاد جاوبت، تزوج بيا آه و كديديبة علاش؟" خطفت لخاتم من يدو و قلت: كون ماكدبت ماكونتش نقبل نتزوج بيك دابا"
دازت مدة، ليان و سعد تزوجو، بشرى و بدر تزوجو، سندس و آدم تزوجو، بغيت نقول أنا و آدم تزوجنا، آدم و بدر دارو تحالف ضد سعد، و الحرب مازال نايضة بيناتهم! يالاه قولو تشيز باش نديرو صورة عائلية! و كلشي تزوج و كلشي فرح و عشنا بسعادة إلى اﻷبد.... النهاية! لا بلاتي فين غاديين، دابا عارفين لعيب ديالي هو ماكنحكمش لساني و كنكدب، بيني و بينكم أش عرفكم بلي هادشي كامل لي كنحاجيه عليكم من صباح راه ماشي كدوب؟ 😂😂😂😂
☆☆النهاية☆☆
لي قراتها تخلي رايها على القصة وكيف جاتها باش نعرف راسي واش نبقا نحط القصص ولا لا 😘😘
أنت تقرأ
بدات بكذبة
Romanceقصة واعرة بزااااف بزااف بالدارجة المغربية بعنوان #بدات_بكذبة فيها الرومنسية و الضحك و كلشي من أروع ما قريت 😍😍😍😍😍 القصة منقولة #خولة ✌
