عشق الجيران

البارت الرابع

رند ... اووو هاي شنو شبسرعه همزين راح اكمل ما بقه شي بس الامتحانات واكمل الثالث ..

من الفرحه راح اركص ولعد شلون اذا اخلص منهه اسوي عرس ...
خلصت العطله تركض واني ماشايفته لغيث هواي ولو اني شعليه اشوفه او ما اشوفه ...

الحمدلله بدت السنه ع خير وكملت الثالث وكمت اقره وهسه باجر اول امتحان اسلاميه سهله مو صعبه ...

جنت اقره واسمع اغاني ..
ادري شلون احفظ واني اسمع بس هاي ميزه عندي ..

طبعاً ماشتغل بس شويه اغسل اماعين لان عندي قرايه وامي ماتخليني اشتغل ماتقبل تكول شعندي اني ماعندي شي ..

كملت وحضرت ملابسي واقلامي وبطاقة البكلوريا ..
ضليت افكر لحد مانمت ..

كعدت سبحت بسرعه وبدلت ورحت للمدرسه ويا صديقتي غاده وهم جواريني بنهايه الشارع ..

طبعاً علاقتي بيهه من زمان بس مو صديقات ولا شي ..
انروح سوه ونرجع وخاصةً بلمتوسطه كل يوم انروح سوه وشوي نحجي مو هلكد علاقتنه ..

رحت امتحنت ورجعت ..
طبت بيتهم هي لان بيتهم اول واني ضليت امشي لحد بيتنه ..

وصلت واشوف واحد كاعد بوحده بسياره صفره ..
ظل يباوع عليه من بعيد ..

اتقربت اكثر ونزل طلع غيث ...
انصدمت برتباك وبلكوه امشي ..

هو ماحاول يرقمني او شي مثل بقيه الولد هو حباب وفقير حسب ظني ...
ضليت امشي وعينه مافاركتني ..

طبيت للبيت وظليت كله مبتسمه ماعرف ليش حته نسيت الامتحان ..

- امي ... ها رند بشري ؟
- رند ... ها يمه شكو ؟؟
- امي ... شبيج جاوبتي لا ؟
- رند ... اي ماما جاوبت الحمدلله
- امي ... الحمدلله يله روحي سبحي ونامي اكيد تعبانه ونعسانه
- رند ... اي ماما حروح ..
- امي ... ما جوعانه رندوش ؟
- رند ... لا ما جوعانه عود من اكعد اكل ..

من اكعد خلي انام اني حته اكعد ..
هسه اني ليش دافكر بهذا غيث ..

شعليه بي .. خلي يباوع ..
هو مثل كل الولد بس يريدون يكضون وقت براسنه ..

امتحنت نص المواد وهم نفس الشي كلما اجي اشوفه وبعدين وياه شيريد ..
لا وكام من اجي مرات اشوفه بمحل براس الشارع مالتنه قريب علينه بيناتنه بيتين ..

ومن يشوفني يجي يوكف يم السياره او يم بابهم ويباوع ...
كلما اطب البيت ابتسم وبعدين اضل افكر بي لحد مانام واني اكول لنفسي كافي عاد ..

ليش دافكر بي خلي يولي .. خلي انام ...

صادف اخر ثلاث امتحانات برمضان اني صمت مايهمني ومستحيل ماصوم ..

جنت ارجع تعبانه وصايمه ميته عطش وانوب حار الجو وخوفه بيه خاف ماجاوبت ومانجح هيج شي ..

واضوج من اشوفه يباوع واني بهاي الحاله حته شكلي مو حلو هلكد .. بلرغم من اني اكول هيج بس اخر يوم ماكو ماشفته ..

شكد ضجت بيومهه اتعكر مزاجي وضليت هيج طول العطله بس بحاول انسه ومافكر بي ..

بعد فتره ... جنت اساعد امي بلفطور وسمعت صوت موبايلي ينبه عن رساله فايبر ...

رحت شفت صديقتي كالتلي النتائج طلعت ..
كتبتلهه صدك ..
كالت اي ..
كتلهه دزيلي الرابط ..
اوك ودزتلياه ..

دورت بلمواقع ماكو اسم مدرستنه شلون حظ ...

ضليت كاعده اكلب بلنت وامي تشتغل كالت معليج ..
صار المغرب وآذن واني بعدني ادور ...

بعدين كالولي تعاي فطري مايصير اتضلين مافاطره وهو آذن ..

داكوم افطر .. شفت رساله من شخص غريب ماعرفه علفيس ..

كتب بيهه ...

مبرووك ناجحه وان شاء الله تنجحين بلسادس العلمي الاحيائي وطلعين معدل وتصيرين مثلي حته تشتغلين وياي وهذا الرابط ...

شنووو .. فرحت بس نسيت اكلهم لأهلي اني نجحت وامي كلبهه نار عليه ..
انصدمت شفت الاسم غيث اكرم ..

ماصدكت هو نفسه ..
رحت دخلت لبروفايله هو نفسه وصوره هم ..

كلت لأهلي صديقتي دزتلي رساله ناجحه اني ..

سويت ارشيف للرساله واتحفظت بيهه ماعرف ليش واني احب احتفظ بهيج اشياء ..

كلت اكيد راح ياخذون اخواني مني الموبايل حته يشوفون نتيجتي ..

صحيح جنت ناجحه بس معدلي ٨٠ واني سبق كلت لأهلي مراح اطلع معدل لان مايفيد هو مو سادس ..

كعدت فطرت واني فرحانه والفرحه فرحتين ..
عبالي نساني ..

زين هو شلون عرف هذا مالتي حساب الفيس ..
لا بعد متأكد منه هم ..

خلص رمضان واني افكر اجاوب عليه ع الاقل اكله شكراً او شي ..
او حته اسأله شلون عرف الفيس مالتي لان اني مامسميته ع اسمي او شي يدل عليه ..

اووف هذا راح يخبلني بسوالفه ..
بس لا اكوم احبه ...
مصيبة اتصير ...