عشق الجيران

البارت الرابع والعشرون

رند ... كعدت من النوم مسطوره..
راسي دوختي وعيوني بلكوه افتحهه..

كعدت شويه ماتحملت والدنيا تفتر بيه ..
رجعت نمت وغمضت عيني ...

هاي شبيه يالله ..
شنو مريضه بس اني عايشه لو ميته ..

فتحت عيني مره ثانيه وشفت كلشي حقيقي واني عايشه ما متت ..
وياريتني ميته ولا اعيش هلعيشه ..

للحظة نسيت كلشي مثل الي يولد من جديد ..
بس اذكرت كلشي من صارت عيني ع الشباك ...

ياربي رحمتك نزلهه عليه ..
ضليت نص ساعه بلفراش استذكر شريط حياتي الشين ..
اريد اذكر شي زين بس ماكو وماعرف ليش ..

شفت موبايلي بصفي ع الشحن ..
جريته وفتحت نت اشوفه كلعاده ..

مابطل هاي العاده شوكت اووف تعبت ..
ايدي بلا وعي تروح تكتب رقمه واشوفه متصل لو لا ..

ضل بالي عليه من شفت اخر اتصال البارحه الصبح ..
اي اكيد ليش لا هسه بأحضان المدام ..

شغلت اغاني عالي وشمرته الموبايل ..
طلعت روحي من بدت اغاني اليسا ..
اووف اليسا حسي بينه وكافي هاي الاغاني ..

بطليهه مثل ماتكولين بأغنيتج ، بطلي تحبيه ..
شلون ابطل احبه وانساه كوليلي ..

ضجت كمت رحت ع الشباك ..
كل يوم اشوفه او اشوف احد منهم ينطي شبه اله ..

هسه ماكو ولا احد ..
باوعت ع الحايط مال غرفته وهي تصير بنهاية البيت ..
كمت اتخيله هو وياهه ..

اريد اصرخ بكل صوتي المبحوح ..
اريد اطلع كل الي بكلبي من وجع مكتوم ..
كلشي اقدم بس اريد شوفته الترد الروح وطيب الجروح ..
كافي عاد جروح مليت بس هموم ..

اجتني امي واختي وجابولي اكل وشرب ..
ضايجه اني فكمت اكل هواي بلا معنه ولا شعور ..

ضلوا يمي كاعدين يسولفون ع بنيه اسمهه ريام لخويه مصطفى ..
احنه تقدمنالهه قبل مانسافر لتركيا ..

وهمه هسه موافقين مثل مافتهمت من حجيهم ..
اصرفت طبيعيه ولا كأنو صاير شي لان ماريد يأخذون مني موقف ..

- امي .. رند اليوم حنروح نقره الفاتحه وانتي اكيد تجين !!
- رند .. اي ماما اكيد اجي فد شويه احضر روحي ..
- ساره .. اي احنه كلنه نعقد سيد هم مو احسن ؟؟
- رند .. اي احسن
- امي .. حته نخلص يمعوده ونفضهه بيوم واحد وره شهر انزوجه منريد انطول قبل مايبدي الدوام ..
- رند ... اوك زين

راحوا واخذوا الصينيه ..
رحت سبحت وشويه ارتاحيت ..
سويتلي كهوه وشربتهه واكلت شويه كاكاو حته احسن من مزاجي ..