عشق الجيران

البارت التاسع

- رند ... شكد حلو الشعور من تحجي ويا التحبه اووف اريد احجي وياك كل يوم وماريدك تطلع ويا اصدقائك لان اعرف همه الي فسدوك ..

شلون هاي وياه شلون اخلي يبتعد عنهم .. خلي اسكت احسن هو اذا يعبدهم عباده عبالك مو اصدقائه عائلته مادري منو ..

- امي ... ولج رند تعالي نزلي !!
- رند ... شكو نزلت ؟؟
- ماتتعشين ؟
- بعد وكت ليش سويتي عشه جان صحتيني
- لا عادي .. اني وساره سوينه عشه تعاي اكلي
- اوو ماما فلافل ليش هيجي راح تخليني اكل بليل واسمن مو تعرفين اني احبهه.. ليش جبتيهه؟؟
- ههههه ديله تعالي
- اجيت ..

انوب اني فرحانه شهيتي انفتحت بلزايد خررررب ..
ماريد اسمن ..انوب بيبسي هم ..

اكلت الحمدلله وغسلت الاماعين وضليت العب ويا حمدوش بلموبايل .. جان تجيني رساله من غيث ...

- شدعيلج ؟؟
- شنو !! شمسويتلك اني..
- ولج لا .. مو دازور وهسه راح اطب للامام ..شتريدين ادعليج بشنو ؟
- اهااا ،، ادعيلي بالنجاح و الموفقية بحياتي
- تدللين نوره
- شكراً ..هاي منين طلعتلي نوره
- شعليج انتي
- هسه  اتعرفت عليهه جديده موو؟؟
- بكربله اني شلون اصادق .. ياربي عقلج وين ؟
- يمك
- اهاا
- اي
- يله حروح اني خبصوني اصدقائي
- اوك .. باي ترجع بلسلامه
- الله يسلمج .. باي

عفتهم وصعدت فوك اتوضيت وصليت حمد وشكر لله ..

و كمت ادعي لغيث مثل كل مره ان شاء الله ينهدي اكثر ويحافظ ع صلاته وصومه يارب ..

.. اذا تحب شخص صدك بس هو مايحبك او ماتكدر توصله او متكدرون تكونون سوه ..
بس ادعيله بصلاتك والله يهدي ..

طبعاً اخويه حيدر قرر ايروح لالمانيا تهريب وراح ..
هو اكثر شي راح علمود رجله مكسوره وخطيه هو كلش ماعنده حظ .. راح احجي عنه وعن الي صار وياه ..

جان حيدر يداوم بمعهد قسم رياضيات بديالى ..
هناك حب وحده اسمهه رؤى ..

شكد ينطيهه فلوس وهدايه لان هو يشتغل ويا خالي عدنان ابو شيماء وهو مهندس معماري ومدير شركة ..

جان عنده ماطور يروح ويجي بي واندعم من وراه مرتين بس بلمره الثالثه اتأذه هوايه .. سووله عمليتين ابغداد ..

وبعدين رحنه خطبناله رؤى بس صدمته وماوافقت ..

انقهر حيل بسببهه وهو جان مرحله اخيره فتخرج ورجع لبغداد يمنه اشتغل ويا مصطفى بلجمله وجمع فلوس وره سنتين سافر للهند ويا بابا علمود يسوي عمليه لان رجله ماتنثني بس هم مافادت وبقه امله الاخير المانيا ..

من صار لجوء وتهريب راح هناك ..
ورؤى ازوجت وصار عدهه ولد وعاشت حياتهه واخويه ادمرت حياته وحبه الهه ..

هاي السنه .. طبعاً احله سنه بحياتي .. مو كلهه يعني بدايتهه مو حلوه جنت ما اتواصل ويا غيث بس نهايتهه للسنه كلش حلوه تبدي من شهر السابع تموز ..
ماعرف احس السنه الارقامهه زوجيه بلنسبه اليه احسن بهواي من الفرديه ..

بشهر الخامس قرر اخويه مصطفى وعلاوي يشترون دجاج وبطة .. كمت اني اداريهه للبطه اكثر احبهه بس هي ماتحبني واني كلش احب الحيوانات وعندي مربيه بلبل هم ..

كلما يموت واحد اشتري غيره ..
وغيث يغار من البطه لان اداريهه هههه مخبل مو صاحي ..

ضلينه نحجي اني وغيث ٢٤ ساعة كل يوم .. والصراحه ماذكر ع شنو نسولف ...

وخصوصاً اني ماحجي هواي وماعرف افتح مواضيع بس هواي احاول اخلق من جوه الكاع مواضيع حته مالهه معنه في سبيل نضل نحجي ..

- مصطفى ... ولج رند هاي شنو معلكه الموبايل بركبتج وتحجين ٢٤ ساعه .. ويامن ؟؟
- رند ... ويا صديقاتي .. انت شعليك؟؟
- اهاا هسه صار عندج اصدقاء انتي معقوله ؟؟
- اي ليش لا !!
- اي هاهيه ..

اووف كلسع طالعلي واحد يكلي ويامن تحجين .. شوكت اخلص ..

- امي ... رند .. وينج ؟؟
- رند ... ها ماما هياني 
- روحي بدلي حنروح لبيت ابو امير
- اهاا ليش ؟؟
- ابنهم امير مسوي عمليه .. هذا خطيه هم رجله مو زينه
- اي .. هسه حروح ابدل
- لا اطولين
- اوك