عشق الجيران

البارت الخامس عشر

ماعرف شلون انكضه يومي بس انكضه وفات ومات ..
شكد ادمرت من شفته وهو يصيح احبها ..
تمنيت هاي الكلمة الي تكول ..

كلسع اروح اشوفه وهو يحجي وينفعل ويا اصدقائه ..
واني اموت بداخلي ..
مو بيدي ،،هذا بسبب كلبي وحبي اله ..

ماعرفت اتلوك او اكون مثل هذني البنات اتموع ..
حبيت صدك وماوفالي ..
اذا اتحب وحده ثانيه شكو تحجي ويايه ..

بس اكول ان شاء الله تنسعد بحياتك واتكون وياهه ..
لان برغم ماريد احد يكون يمك بس اني ..

ماحب اكون انانيه واريدك تكون سعيد دائماً ..
رحت غسلت ونمت ،، ماعندي شي اسويه ..

كملت العطله وبدت المدارس وبديت شويه انساه ..
وهو ماكو شي ، لا خطب ولا سمعنه شي عنه..

التهيت بدراستي وكلت غيث كتاب كامل وراح اسده مو بس صفحه واطويهه..

كمت اتواصل ويا البنات اكثر ويا صديقتي تبارك هم ..
اتغيرت شويه اجتماعياً وياهه ، اشاقيهه ونسولف هوايه سوه ..

ونقره هم طول الوقت لان هدفي اطلع معدل وهيه هم ..
بس هيه ماتريد كلش عالي مثلي ..

اني اريد اطلع طب او صيدله او حته تحليلات ..
هيه اتريد تكمل بره دراسه وعادي لو اتروح أهلي عدهه امكانيه اكثر مني بهواي  ..

شديت حيلي واغلب وقتي اكضي بلقرايه واني ما ماخذه خصوصي ..
اعتمدت ع نفسي وبس و وفرت ع اهلي الفلوس ..

جنت ماعرف قسم التحليلات من خلال غيث عرفته ..
وحبيت اروح لهذا القسم وحته نفس الكليه ..
بس هيه اهليه واراد هواي مصاريف من عدا الخط والملابس ..

واني ماريد اتعب اهلي ، اتعب نفسي احسن واروح حكومي ..
كملت دوام ودخلت البكلوريا وكعدت ٣ اشهر للقرايه واستعداداً للامتحانات ..

اني عايشه بخوف من الامتحانات والنتائج ..
شعور مايوصف ..

قريت وبدت الامتحانات واجاوب بيهن ..
كلما ارجع اشوف غيث برأس الشارع يم اصدقائه ..
هوه تخرج هاي السنه وماعندهً شي ..

يضل وياهم يسولف بس ابد ماشفت نفس الضحكه الي شفتهه ذاك اليوم ..
اشوفه وادعيله برغم اني ادعيله مرات بصلاتي لحد الآن ..

من كالو النتائج يوم الخميس ينشروهن ..
اعتقد جتني جلطه خفيفه ..
ياربي ، شلون خوف عندي وتوتر مو طبيعي ..

١٢ سنه دراسه ، هسه راح يتحدد مستقبلي ..
ضليت اكلب بلمواقع واني ايدي ع كلبي ..