عشق الجيران

البارت السادس عشر

بمراهقتي جنت بعالم ثاني ..
عالم خيالي خاص بس إليّ ..
جنت احب اعيشه ويا غيث بس هو طلع كل البعد عنه..

جنت احاول بخيالي اعيش حياتي الي اريد اعيشهه بلواقع ..
حياة صدك خيالية ..
أحلم اعيش بأمريكا واحب واحد يشبه توم كروز ..

جان صدك شعور حلو لما اباوع بعينه الزرك الي اضيع بيهن وانسه كلشي كأنو واقع ..

بس يختفي كلشي من افتح عيني والكه الواقع كأنو جحيم ..
ماكو حب ، عاطفة ، احترام ، بيئة ومجتمع وثقافة مثل الي اتخيلهه ..

بلد حلو يطغي عليه الامان والمحبة والسلام ..
شعب يحب وطنه ويتمنى اله الخير ..
مو داعش تخرب بعض محافظاته ..

ولا أمان اكو بمكان ..
ولا الكرادة سلمت منهم وشكد شهداء أبرياء راحو وقسم منهم ماكالوهم بس رماد ع الارض ..

الاهل يبجون ع ولدهم الي بعمر الورد واكو بيهم اطفال ماشافوا من الحياه شي ولا وعوا عليهه ..
يموتون بدون ذنب او خطاً مسوينه بس حبوا ينفهون عن نفسهم واكتشاف وطنهم ..

ناس اتروح اضحي بنفسهه بدمهه بختيارهه حته لا تموت بعدين بدون انذار سابق ..
تخدم الوطن ودافع عنه بأسم الحشد الشعبي ، الجيش العراقي ..

من نطلع لازم نشاهد لان ايجوز نموت بأنفجار ومن انام كذلك ..
نخاف قصف جوي يجي علينه ...

اهلنه يخافون علينه من الطلعه لان تعب السنين والشغل بتربيتهم مايريدون يروح بثانيه ويقدم دمه فداء بدون مايدري ..

هاي اشياء شفتهه ابلدي وغير بلدان كذلك ..
من عدا الخطف وطلب فدية مقابل جثة شخص مايتنفس ..
ناس تبيع الي اغله شي عليهم في سبيل يوفون فلوس الفدية وتالي مايحصلون شي ..

بعض ذكور مايخافون الله ولا يعرفون شي عن الدين والاخلاق والشرف بداخلهم ..
يضحكون ع البنات ويتحرشون بينهن وماكو ضمير يمنعهم ولا قانون ولا شي ..

مرات اكره نفسي من اشوف احد يباوع عليه بطمع مو مادي لا ..
طمع جسدي الي يخليني اكره نفسي ويخليني اعتزل العالم وابقه بلبيت ..

عبالهم بعض شرف البنات لعبه ومثلهم ..
مايعرفون هاي بنات هم تخاف الله وتعبده وماتعصي اوامره حتلو جانت ماتلبس جبه او بوشي ..
لان هذا الشي مو دلاله ع الايمان ..

هاي اوضاع بره البيت وجوه البيت هم اوضاع تعبانه ..
كلهه اسباب تخليني اعيش بعالم اني اخلقه بوحدي محد عايش بي ..
كلشي بي غريب ، ناس ، مجتمع ، شكل ، ديانه وحته لغه ..